Unsa ang Duha ka Rason Kon Nganong Wala Dungga sa Diyos ang Ubang Pag-ampo?

Tubag sa Bibliya

May mga pag-ampo nga wala dungga sa Diyos. Tagda ang duha ka rason kon nganong dili dunggon sa Diyos ang pag-ampo sa usa.

1. Ang giampo supak sa kabubut-on sa Diyos

Dili dunggon sa Diyos ang mga pag-ampo nga supak sa iyang kabubut-on, o sa iyang mga sukdanan, nga naa sa Bibliya. (1 Juan 5:14) Pananglitan, ang Bibliya nag-ingon nga likayan nato ang kahakog. Ang sugal makapahimo sa usa nga hakog. (1 Corinto 6:9, 10) Busa, dili dunggon sa Diyos ang imong pag-ampo kon moampo kang modaog sa lotto. Ang Diyos dili genie nga puwede nimong sugoon sa pagtuman sa imong gusto. Sa tinuod lang, angay kang magpasalamat niana. Kay kon ingon pa niana ang Diyos, basin mahadlok ka sa kon unsay ipabuhat sa uban kaniya.—Santiago 4:3.

2. Ang nag-ampo masinupakon sa Diyos

Ang Diyos dili mamati niadtong tinuyong nagbuhat ug mga butang nga supak kaniya. Pananglitan, ang Diyos nag-ingon niadtong nag-angkong nag-alagad kaniya apan nagbuhat ug daotan: “Bisan pa kon kamo maghimog daghang mga pag-ampo, ako dili mamati; ang inyong mga kamot napuno sa pag-ula ug dugo.” (Isaias 1:15) Apan kon nagbag-o pa sila ug ‘nagtul-id sa mga butang’ atubangan sa Diyos, dunggon unta niya ang ilang mga pag-ampo.—Isaias 1:18.