TABANG ALANG SA PAMILYA
Kon Unsaon Pagkontrol sa Imong Kasuko
Naay gisulti o gibuhat ang imong bana o asawa nga nakapasuko nimo, pero imo rang giluom ang imong kasuko. Apan namatikdan niya nga morag suko ka, maong gisukitsukit ka niya. Busa misamot kag ka lagot. Unsaon nimo pagkontrol ang imong kasuko sa maong mga situwasyon?
Ang angay nimong mahibaloan
Ang pagpadaog sa kasuko makadaot sa imong lawas. Gipakita sa pagtuon nga kon dili makontrol ang kasuko mas dakog tsansa nga ma-high blood ka, ma-depress, ug magkaproblema sa digestive system. Ang kasuko lagmit moresulta pod ug insomnia, sobrang kabalaka, mga sakit sa panit, ug estrok. Busa sakto ang giingon sa Bibliya: “Ayaw kasuko . . . kay kana makadaot.”—Salmo 37:8, Ang Bag-ong Maayong Balita Biblia.
Ang pagluom sa kasuko makadaot sab. Ang pagluom sa kasuko samag sakit nga makadaot nimo. Pananglitan, lagmit mahimo kang maduhaduhaon ug hinawayon. Kana nga mga kinaiya makapahimo nimo nga lisod ikauban ug makadaot sa imong kaminyoon.
Ang imong mahimo
Tan-awa ang maayong mga kinaiya sa imong kapikas. Paglistag tulo ka kinaiya nga naangayan nimo sa imong bana o asawa. Sa sunod nga masuko ka tungod sa iyang nahimo, hunahunaa ang nakita nimo nga mga kinaiya niya. Makatabang ni nga makontrol nimo ang imong kasuko.
Prinsipyo sa Bibliya: “Magmapasalamaton kamo.”—Colosas 3:15.
Ugmara ang pagkamapinasayloon. Una, paningkamoti nga masabtan ang hunahuna sa imong kapikas. Makatabang ni nga maugmad nimo ang empatiya—nga gitawag sa Bibliya ug “pagbati alang sa isigkaingon.”(1 Pedro 3:8) Dayon pangutan-a ang kaugalingon, ‘Bug-at ba gyod kaayo ang rason sa akong kasuko nga dili ko makapasaylo?’
Prinsipyo sa Bibliya: “Katahom sa iyang bahin ang pagpalabay sa kalapasan.”—Proverbio 19:11.
Isulti ang imong gibati sa maayo ug matinahoron nga paagi. Gamita ang pulong nga “ko.” Pananglitan, imbes moingon, “Pagkawala gyod nimoy konsiderasyon, di man lang ka manawag kon asa na ka,” sultihi hinuon siya, “Mabalaka gyod ko kon di ka makaulig sayo kay basig naunsa na ka.” Ang lumo nga pagsulti makatabang nga makontrol nimo ang imong kasuko.
Prinsipyo sa Bibliya: “Himoa ang inyong sinultihan nga kanunayng madanihon, tinimplahan ug asin.”—Colosas 4:6.
Paminaw nga matinahoron. Human nimog sulti sa imong gibati, paminawa ang isulti sa imong kapikas ug ayaw siyag baraha. Pagkahuman niyag sulti, isulti ang iyang giingon aron mahibaloan kon sakto ba ang imong nasabtan. Ang pagpaminaw dakog tabang aron makontrol nimo ang imong kasuko.
Prinsipyo sa Bibliya: “Magmaabtik sa pagpaminaw, magmahinay sa pagsulti.”—Santiago 1:19.