“Ang Akong Gugma Kang Jehova Nakatabang Nako nga Makalahutay”

Komunista ko sa una, pero nganong nag-Saksi man ko nga kining relihiyona gidumtan man pag-ayo sa gobyerno? Ug sa unsang paagi ang gugma ni Jehova ug ang iyang pagbansay nakatabang nako nga mapauswag ang akong kinaiya dihang naa ko sa lisod kaayong mga kahimtang?

Pagpangita sa Hustisya ug Kalinaw sa Hunahuna

Gipanganak ko niadtong 1930, sa Tabani, usa ka pobreng baryo sa norteng bahin sa Moldova. Ang akong mga ginikanan nagkugi sa pagtrabaho sa usa ka farm aron matagan-an ang panginahanglan namong unom ka magsoon. Pobre kaayo mi. Ang akong mama membro sa Russian Orthodox Church, ug ang akong papa Katoliko. Pirme silang maglalis bahin sa grabe ka daotan nga binuhatan sa mga pari.

Dihang mi-graduate ko sa edad nga 18, miapil ko sa Komsomol, usa ka organisasyon sa mga batan-on nga nagpasiugda sa mga pagtulon-an sa Komunismo. Tumong ani nga tudloan ang mga batan-on nga mahimong membro sa Komunistang Partido. Wala madugay, natudlo ko ingong sekretaryo sa lokal nga grupo. Ganahan kaayo ko sa ilang mga gitudlo nga ang tanan magsoon ug angay trataron sa patas nga paagi. Pero dihang nakita nako ang grabeng inhustisya ug korapsiyon sa akong palibot, naguol kaayo ko.

Ingong membro sa Komsomol, wala koy laing mahimo kondili suportahan ang mando sa gobyerno sa Soviet Uniona nga sirad-an ang mga simbahan ug wad-on ang relihiyosong mga grupo. Naay mga Saksi ni Jehova sa among baryo. Nakita nako nga matinud-anon ug buotan sila. Pero para nako, panatiko gihapon sila. Wala gyod ko magdahom nga usa ka Saksi ang makatubag sa daghan nakong pangutana.

Ang akong uyoan nga si Dimitriy, nga nagpuyo pod sa among baryo, usa ka Saksi ni Jehova. Usa ka adlaw niadtong Mayo 1952, iya kong gipangutana, “Georgiy, unsa may plano nimo sa imong kinabuhi?” Nakaingon ko nga siya ra gyoy naghunahuna nako kay siya ra may nangutana ana. Sa tinuod lang, daghan gyod kog pangutana nga wala pa matubag. Pananglitan, dugay na kong naghunahuna, ‘Kon naay Diyos, nganong gitugotan man niya ang grabeng pag-antos?’ Sa misunod nga walo ka adlaw, gitubag ni Dimitriy akong mga pangutana gamit ang Bibliya. Naa pa gyoy mga higayon nga sa sige namog hisgot bahin sa Diyos maabtan mig alas tres sa kaadlawon!

Human sa among mga panaghisgot, nakadesisyon ko nga tun-an pag-ayo ang Bibliya. Naamgohan nako nga naa diay koy langitnong Amahan nga nagmahal gyod nako. (Salmo 27:10) Bisag gamay pa kaayo kog nahibaloan bahin sa Bibliya, ang akong dakong gugma kang Jehova nakatabang nako nga himoon kon unsay kinahanglan nakong himoon. Mihawa ko sa Komunistang Partido bisan pag gihulga ko sa tsirman. Paglabay lag upat ka bulan sukad nga nagtuon ko ug Bibliya, nagpahinungod na ko kang Jehova ug nagpabawtismo niadtong Septiyembre 1952.

Ang Akong Gugma Kang Jehova Nasulayan

Kaniadto, gidili ang mga buluhaton sa mga Saksi ni Jehova. Bisan pa ana, gusto nakong ipakita ang akong gugma kang Jehova pinaagig buhat, maong miboluntaryo ko sa paghatod ug mga literatura sa Bibliya ngadto sa mga igsoon nga nagpuyo sa kabaryohan. Peligroso ni kay kon naay tawo nga wala mailhi sa mga nagpuyo didto, basig ila ning dudahan ug ireport nila sa awtoridad. Gani, bisan ang ubang igsoon nagduda pod nako. Nahadlok sila nga basig espiya daw ko nga gisugo sa awtoridad nga magpakaaron-ingnong Saksi. Pero wa madugay, napamatud-an ra nga dili ko espiya. Duha ka bulan lang human sa akong bawtismo, gidakop ko ug gikasohan sa paghatod ug gidiling mga literatura.

Samtang naghulat ug husay, gipriso ko ug halos usa ka tuig. Nianang panahona, gisukitsukit ko sa mga polis kay gusto nila nga dili ko magmatinumanon sa Diyos. Pero gihigugma na gyod nako si Jehova nga Diyos. Paglabay sa panahon, publiko nga gihusay ang akong kaso sa siyudad sa Odessa, Ukraine. Ang akong mga ginikanan ug mga igsoon, nga niadtong panahona dili pa mga Saksi ni Jehova, gipatawag sa korte.

Sa husay, ilang gipagawas nga nailad kuno ko maong miapil ko sa peligroso kaayong sekta. Gipatuo pa gani sa mga opisyales ang akong mga ginikanan ug mga igsoon nga nabuang na kuno ko. Tungod sa presyur, nahadlok ang akong mga ginikanan. Mihilak tawon sila ug ila kong giingnan nga moundang sa pagka-Saksi. Pero nagpabilin kong kalmado. Akong giingnan si Mama: “Ayawg kabalaka, Ma. Wala man ko mailad. Ako nang nakaplagan ang dugay na kaayo nakong gipangita, ug dili gyod nako ni ibaylo sa bisan unsa.” (Proverbio 23:23) Dili pa gyod ko ingon ana ka sinati sa Bibliya, pero ang akong nahibaloan bahin kang Jehova igo na aron dili ko mobiya niya. Paglabayg mga unom ka tuig, naapresyar sa akong mga ginikanan ang akong gituohan, ug nahimo pod silang mga Saksi ni Jehova.

Gisentensiyahan ko ug 15 ka tuig sa pinugos nga pagtrabaho ug ila kong gidala sa rehiyon sa Kolyma, Siberia. Daghan kaayo ug kampo sa pinugos nga pagtrabaho didto. Gikulata mi ug wala pa gani pakan-a sa mga guwardiya ug mga opisyales kay gusto kaayo nilang kontrolahon ang tanang piniriso. Naghunahuna ko sa primero kon makalahutay ba kaha ko.

Giatiman ug Gibansay Ko sa Diyos

Wala madugay dihang nakaabot ko sa kampo, pipila sa mga 34 ka Saksi nga napriso na daan didto mainampingong nangutana nako: “Naa bay Jonadab diri sa inyong grupo?” Nahibaloan dayon nako nga mga igsoon sila kay mga Saksi ra may mogamit ato nga termino. Gitudloan ko nila kon unsaon pagpadapat ang mga prinsipyo sa Bibliya sa lisod nga mga kahimtang ug gitabangan pod ko nila nga maugmad ang Kristohanong mga hiyas sama sa katakos sa pag-ila.

Nagtrabaho ko sa kampo ingong mekaniko. Usa ka adlaw, nanghambog ang akong katrabaho nga si Matphey nga na-memorize daw niya ang ngalan sa 50 ka santos. Dihang akong giinsulto ang iyang mga santos, sumbagon unta ko niya, pero midagan ko. Unya nalain ko kay nangatawa ang mga igsoon. Miingon ko: “Nganong nangatawa man mo? Gusto ra man unta kong mosangyaw!” Gipahinumdoman ko nila nga tumong nato ang pagpaambit sa maayong balita, dili ang pagpanginsulto sa uban. (1 Pedro 3:15) Bisag si Matphey supak sa politika, nakadayeg siya sa pagtahod nga gipakita sa mga Saksi ngadto sa mga guwardiya ug sa awtoridad. Sa ngadtongadto, nainteres siya sa mensahe sa Bibliya. Dili gyod ko kalimot adtong gabii nga sekreto siyang gibawtismohan sa bugnaw kaayong tubig diha sa baril.

Adtong bag-o pa mi sa kampo, giingnan ko ug ang duha ka batan-ong brader nga moapil sa klase diin tudloan mi bahin sa politika. Sa primero, mibalibad mi. Nagtuo mi nga kon moapil mi adto, makompromiso ang among neyutralidad. (Juan 17:16) Ingong resulta, gibutang mi sa ngitngit nga selda sulod sa duha ka semana. Dihang gibuhian na mi, giingnan mi sa mahigugmaong mga brader nga dili ra makompromiso ang among neyutralidad kon mosulod ra mi sa klase. Hinuon, puwede ni mahimong kahigayonan nga makasangyaw mi. Nakatabang gyod namo ang maong mahigugmaong mga brader nga mahimong mas maalamon ug mapadapat ang mga prinsipyo sa Bibliya dihang maghimog mga desisyon.

Ang ilang mapailobong pagbansay klarong pamatuod nga giatiman gyod ko ni Jehova. Pananglitan, dihay piniriso nga pari sa una nga nahimong chief accountant. Kada kita namo inigpangaon, iya kong ingnan, “Oy, anak sa Yawa!” Gitudloan pod ko sa laing piniriso nga ingnan daw nako ang pari, “Oy, Pa!” Ako gyod tong gisulti, ug ingong resulta, gikulata na hinuon ko pag-ayo. Dihang nahibal-an ni sa mga igsoon, ilang gipasabot nako nga dili maayo ang akong gihimo. (Proverbio 29:11) Human niana, nangayo ko ug pasaylo sa pari.

Sa wala pa ko gidala sa kampo sa pinugos nga pagtrabaho, tigtambongan ko ug Kristohanong mga tigom nga tagotagong ginahimo sa gabii ug sayo sa buntag. Pero didto sa kampo, wala gyod mi katagoan. Maong kada adlaw magtapok ming mga brader, bisag kita kaayo mi sa mga guwardiya, aron maghisgot ug mga teksto nga gisulat na namo daan sa gagmayng piraso nga mga papel. Tumong namo nga maka-memorize ug daghang teksto ug dili ni kalimtan. Kon naay polis nga moduol namo, amo dayong dalidalion ug tulon among nota.

Nabati Gyod Nako ang Gugma sa Diyos

Dihang gipagawas na ko sa kampo niadtong 1959, gi-deport ko sa rehiyon sa Karaganda, sa Kazakhstan. Bisag giobserbahan pa ko sa awtoridad, mihangyo ko pabakasyonon ko nila ug 20 ka adlaw aron magminyo. Niadto ko sa rehiyon sa Tomsk, sa Russia, aron makigkita sa matinumanon ug guwapang sister nga si Maria. Ako dayon siyang giingnan sa akong tuyo. Miingon ko: “Maria, wala koy panahon nga makigdeyt. Minyoi na ko!” Misugot siya, dayon nagpakasal mi. Naapresyar ni Maria ang akong paglahutay sa daghang paglutos ug gusto niyang tabangan ko nga mopadayon sa pag-alagad kang Jehova.—Proverbio 19:14.

Niadtong mga tuig sa 1960, dili mi makasangyaw sa balay ug balay, pero mangita mig mga kahigayonan nga makasangyaw sa impormal nga paagi. Dihang naay mangimbitar namo sa ilang balay o dihang magbakasyon mi, among ginasangyaw ang among paglaom nga mabuhi hangtod sa hangtod sa yuta. Mangita pod mig paagi nga maestorya namo ang uban. Pananglitan, moadto mig mga balay nga ginabaligya, estoryahon namo ang tag-iya, ug mangita mi ug kahigayonan nga makasangyaw. Tungod ani nga pamaagi, nakasugod mi ug pagtuon sa Bibliya sa unom ka tawo nga sa ngadtongadto nahimong mga Saksi ni Jehova.

Usahay makasangyaw pod mi panahon sa eleksiyon. Usa ka adlaw, dihay mga tawong wala magpaila nga mga polis. Miadto sila sa pabrika nga gitrabahoan namo uban sa pipila ka mga igsoon. Atubangan sa mga 1,000 ka trabahante, ila ming gipangutana kon nganong ang mga Saksi ni Jehova dili mag-apil-apil sa politika. Gidepensahan mi sa chief engineer ug sa ubay-ubay namong katrabaho. Ilang giingnan ang mga polis nga mga responsable mi ug kugihang mga trabahante. Ang ilang gibuhat nakahatag namog kaisog sa pagdepensa sa among baroganan gamit ang mga teksto nga among na-memorize. Ingong resulta sa among maisogong pagsangyaw, upat ka trabahante ang nagpakitag interes sa kamatuoran sa Bibliya ug wala ray usa ka tuig, nabawtismohan sila.

Sa sayong bahin sa mga tuig sa 1970, daghang sinserong tawo ang nahimong Saksi ni Jehova sa Kazakhstan, maong nakita namo nga kinahanglan ming mag-organisar sa among unang asembliya. Pero unsaon namo na paghimo nga dili mahibal-an sa mga awtoridad? Nakadesisyon mi nga mag-organisar ug usa ka adlaw nga asembliya ug idungan ni sa usa ka kasal diha sa baryo duol sa siyudad sa Almaty. Ug mao gyod toy nahitabo! Ang maong okasyon gitambongan sa kapig 300 ka bisita. Ang akong asawa ug pipila ka sister naghago pag-ayo sa pagbutang ug dekorasyon ug sa pag-andam ug lamiang pagkaon. Pero mas naapresyar gyod sa mga bisita ang espirituwal nga pagkaon pinaagi sa mga pakigpulong nga gihatag sa mga 12 ka brader. Niadtong adlawa, sa unang higayon sa akong kinabuhi, nakahatag ko ug pakigpulong atubangan sa daghang tawo.

Ang Gugma sa Diyos Nakatabang Namo Panahon sa Kalisdanan

Ang akong pinalanggang asawa nga si Maria nagpabiling matinumanon nga katimbang nako sa kinabuhi. Lumo siya ug mapinasakopon, nga kanunayng nagpokus sa mga buluhaton sa Gingharian. Himsog man unta si Maria, pero kalit lang nga nagkasakit siya ug grabe nga klase sa osteoporosis, ug tungod niana naglubog na lang siya sa higdaanan sa halos 16 ka tuig. Ako ug ang among kamanghorang anak nga babaye nga si Lyudmila ang nag-atiman niya hangtod namatay siya niadtong 2014.

Adtong panahon nga nag-antos ang akong pinalanggang si Maria, mibati ko ug kaluya. Pero hangtod nga namatay siya, magdungan gyod mig basa sa Bibliya ug makapadasig nga mga artikulo. Magsige mig estorya bahin sa paraiso. Usahay, maghilak ko sa hilom diha sa iyang tapad. Pero sa matag higayon nga magbasa mi sa nindot nga mga saad ni Jehova, mobati ming kalmado ug makabaton mig kusog nga mopadayon.—Salmo 37:18; 41:3.

Sukad sa unang higayon nga nabati nako ang gugma ni Jehova, kanunay nakong makita nga iya gyod kong ginatabangan. (Salmo 34:19) Niadtong batan-on pa ko ug wala pa kaayoy eksperyensiya, nabati nako ang iyang gugma pinaagi niadtong mapailobong mitabang nako nga mapauswag ang akong kinaiya. Dihang nakaagi ko ug mga kalisdanan niadtong napriso ug nadeport ko, nabati nako nga gitabangan ko ni Jehova pinaagi sa iyang Pulong. Gihatagan pod ko niyag kusog nga akong gikinahanglan sa pag-atiman sa akong pinalanggang asawa nga si Maria hangtod namatay siya. Karon, makaingon gyod ko nga ang akong gugma kang Jehova nakatabang nako nga makalahutay sa tibuok nakong kinabuhi.