Gikan sa Among mga Magbabasa

Nganong Mabalaka sa mga Grade?

Salamat kaninyo sa praktikal ug realistikong tambag diha sa artikulong “Mga Batan-on Nangutana . . . Nganong Mabalaka sa mga Grado?” (Agosto 22, 1984) Sumala sa akong kaugalingong eksperyensiya nasayod ako kon unsa ka tinuod sa mga pahayag. Usa ako nga nakadawat ug dagkong mga grado sa eskuylahan. Ngano? Mamati ako pag-ayo kon mosulti na ang among magtutudlo, ug kanunay akong makigbahin sa mga diskusyon sa klase ug tigbangon ug mga pangutana.

R. V., Italya

Ang inyong artikulo mahitungod sa mga grado mapuslanon kaayo. Ang akong kabalaka bahin sa mga eksaminasyon namenosan labing kubos 50 porsiento. Mabalaka ako kanunay sa mga eksaminasyon kaniadto, nga wala man untay angay nga kabalak-an niana, sanglit maayo man ang akong lakat sa eskuylahan.

M. M., Federal Republic of Germany

Ang mga Obispo ug ang Bomba

Gikuwestiyon sa inyong artikulong “Ang mga Obispo ug ang Bomba” (Agosto 22, 1984) ang baroganan ug pagkatempo sa mga pahayag sa Katolikong mga obispo ug sa uban. Ang relihiyon ning ang-anga sa kasaysayan ug ang atong mga paningkamot sa atong mubong pagpuyo sa yuta labing maayong ipatumong sa panaghiusa, dili panagbahin. Ang pag-atiman sa sekular nga mga butang (i.e. militarismo) nga kaharmoniya sa mga sugo sa Diyos maoy OK nga kalihokan ug labi nang gikinahanglan karon kon palandongon ang gidaghanon sa mga armas, maayo. Apan ang batok-Katolikong mga pahayag ug pagpanaway sa samang Kristiyanidad ug mga paningkamot sa pag-alagad sa samang Diyos dili gayod madawat.

J. T., California

Wala namo sawaya ang Katoliko ug Protestanteng mga pangulo sa relihiyon sa pagsulti batok sa gubat. Ang among nakita nga salawayon mao nga ang Katoliko ug Protestanteng kaparian, sa nanglabayng kasiglohan, nagpaluyo sa mga gubat nga migamit ug mga espada, mga bangkaw, mga posil, mga bomba, ug bisan ang nukleyar nga bomba sa dihang unang gigamit kini, nga walay pagpakitag tukmang kabalaka sa kaguol, pag-antos ug sa kamatayon nga midangat diha sa dili maisip nga minilyong katawhan, ug sa kalaglagan nga nagdaot sa mga kultura ug sa mga sibilisasyon. Among gibating makataronganon na lamang ang pagpangutana: “Ang ila bang baroganan ning ulahi nang panahon gisagop lamang tungod kay tataw man nga kaylap na kaayo ang pagdaghan sa nukleyar ug nga ang nukleyar nga gubat naghulga mismo sa ilang paglungtad? Madawat ba ang kombensiyonal nga gubat [walay paggamit ug nukleyar nga hinagiban] tungod kay ang gidaghanon sa mangamatay ug kalaglagan mas menos kay sa nianang ipahinabo sa nukyeyar nga gubat? Among gituohan nga mas maayong soblion ang pahayag sa usa ka nukleyar nga pisikong si Harold Agnew: “Nagtuo akong mga salingkapaw kini sila tungod kay ilang ginadawat nga O.K. ang kombensiyonal nga gubat ug ang nukleyar nga gubat dili. Sa unang higayon sa kasaysayan, gumikan sa gahom sa nukleyar nga mga hinagiban, nameligro usab kadto silang tighimog mga desisyon sa pakigbahin sa gubat duyog sa mga batan-on nga sa naandan ginapadala sa pagtuman sa mga desisyon sa mga tigulang. Busa ang mga iglesya ug ang tanang bahandi ug mga propidad sa mga tighimog desisyon mangalaglag kon mahitabo ang nukleyar nga gubat. Mapagan kitang tanan niana.”—ED.