Nagpadayon Ako sa Pagpangita ug Akong Nakaplagan Kana
—Sumala sa giasoy ni William Roddis
Nakiggubat siya didto sa Vietnam ug migamit ug mga droga aron makaikyas sa mga kalisang sa gubat. Gumikan sa aksidente naparalisis siya sa kamot ug tiil, ug migamit siyag daghang droga sa pag-ikyas sa kasakit sa kinabuhi diha sa silya sa bakol. Nakapanunod siyag kuwarta, ug duyog niini midaghan ang iyang mga higala nga dili gayod tinuod nga mga higala. Nangita siya sa kamatuoran uban sa mga pilosopo ug sa may kinaadmang mga tawo ug nakakaplag lamag walay hinungdang mga pulong. Diha lamang nga nangita siya sa tukmang tuboran nga iyang napalgan ang iyang gipangita.
ANG pundasyon sa akong kinabuhi nabungkag sa 14 anyos pa ako. Nagbulag ang akong mga ginikanan. Ang akong gituohang malig-on ug normal dili na malig-on ug normal. Ginabutad ako ngadto nganhi tali sa akong amahan sa Wisconsin ug sa akong inahan sa Arizona. Sa akong ulahing katuigan sa pagkatin-edyer mihunong ako sa pakiglangkit niining nabugtong kinabuhing panimalaynon. Busa sa 1967 misulod ako sa pagkasundalo.
Miadto ako sa Vietnam, nga sakop sa grupo diha sa tigpangatakeng helikopter ingong tigmasinggan ug unya mibalik ug nagtrabaho diha sa gieksperimentohang ayroplano sa kasundalohan. Tinguha ko gayod nga mahimong piloto sa kasulupan sa Alaska. Apan kalit lamang nga nahugno kining planoha. Sa 1969, sa hinapos nga semanang bakasyon diha sa Panama City, Florida, naligo ako sa dagat, midayb ug natuarok ang akong ulo sa pasil. Dihadiha naparalisis ako. Sa milabay ang walo ka bulan migawas ako sa VA nga ospital sa Long Beach, California, ug misugod ako sa akong kinabuhi diha sa silya sa bakol.
Nakabaton ako ug apartment sa Long Beach, nahaipon uban sa kuwestiyonableng mga tawo ug sa kataposan nagbukas ug tindahan uban kanila diha sa Sunset Boulevard. Gitawag kadto nga head shop—nga nagpamaligyag mga poster nga may makahahadlok nga mga larawan, mga kuwako sa hashish, mga gamit sa pagtabakog ampiyon, mga sugang itom ug ubang binuang nga mga butang may kalabotan sa droga. Aron makabuntog ako sa kinabuhi diha sa silya sa bakol, migamit akog droga—marijuana, cocaine, hashish, mescaline ug uban pa. Migamit akog droga sa Vietnam aron makaikyas sa mga kalisang. Karon gigamit ko kini aron maantos ko ang kinabuhi diha sa silya sa bakol.
Uban sa akong gitawag nga mga higala, nalangkit ako sa pag-apod-apod sa mga petisyon sa pagpalegal sa marijuana, ug kami, lakip sa uban, ang nagpalakaw nga mahimong legal kini pinaagig balota diha sa California. Among gipatik ang usa ka tinagong pamantalaang, The Long Beach Free Press.
Buweno, mao kana ang dalan nga akong gisubay sa kinabuhi sa sayong katuigan sa 1970. Niadto usab nga tuig nga misugod sa pagkahitabo ang tulo ka butang diha kanako. Ang usa kanila bugos nakabag-o sa akong kinabuhi.
Una: Nakapanunod akog duolan sa usa ka milyong dolyar. Lakip niana nagpangabot ang akong bag-ong mga higala, nadani sa salapi ug sa mga droga nga akong mapalit. Duyog sa ubang may puhunan nakapanag-iya akog restawran ug mga tindahan sa bino. Wala moasenso ang negosyo ug sa kataposan nahapay. Samtang nagkamenos ang akong kuwarta nagkamenos usab ang akong mga higala. Nahimo akong matahapon, maduhaduhaon sa pagbaton ug suod nga higala. Nagpalain ako, misugod sa pagbasa sa sinulat ni Nietzsche ug sa ubang mga pilosopo, ug misugod sa pakig-uban sa ubang may kinaadman sa University of California sa Santa Barbara.
Nagpangita ako sa kamatuoran. Wala pa ako mahibalo niadtong higayona, apan nagpaingon na ako sa dalan sa pagsinati sa katumanan sa saad ni Jesus: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagabuksan.”—Lucas 11:9.
Ikaduha: Naamgohan ko nga anam-anam ug kadaot ang akong lawas gumikan sa akong paggamit ug droga. Nawala ang akong gana sa pagkaon tungod sa cocaine. Kon dili ako mokaon, maniwang ako ug, sa akong kahimtang, kon maniwang, magkapilas ako sa paghigda. Nasayod ako nga kinahanglang hunongon nako ang mga droga—ah, oo, sayon nga isulti pero lisod nga buhaton!
Ikatulo: Misugod sa pagduaw ang mga Saksi ni Jehova. Nagpuyo ako sa dapit nga gilantawng puloy-anan sa mga dato duol sa Los Angeles, ang Palos Verdes Estates. Ang balaod nag-ingon nga walay pasudlon sa among maanindot nga komunidad sa pagpanukot ug amot, busa sa miduaw ang mga Saksi ni Jehova gitawag nako ang kapolisan.
“Sila adunay katungod sumala sa balaod sa pagsangyaw sa pultahan ug pultahan,” gisultihan ako. “Sa pagkatinuod, nakadaog sila sa Korte Suprema sa Tinipong Bansa.”
Nakadayeg ako. Misugod ako sa pagdawat sa ilang Watchtower ug Awake! nga mga magasin. Dayon dihay usa ka lalaki nga wala lamang magbilin sa magasin kanako—misugod siya sa pagpatin-aw. Buweno, madaog ko ra kini! Usa siya ka diyanitor, ug itom, ug bag-o pa lang akong nakabasag libro bahin sa tagna sa Bibliya. Busa nasayod ako nga daghan akog kahibalo! Nga sobra pa sa pagsukol niining tawhana!
Buweno, ingon sa gisangpotan, kulang diay ang akong kahibalo. lyang gipaluyohan ang tanang butang nga iyang isulti gikan sa Bibliya. Apan kining gipakita niining tawhana kanako karon nga gikan sa Pulong sa Diyos nakahatag kadanagan sa akong ulo! Ang diskusyon miresultag pagtuon sa librong The Truth That Leads to Eternal Life.
“Magsultihanay lang kita, apan dili ko gustong mahimong usa sa mga Saksi ni Jehova,” maoy akong pasidaan kaniya sa sinugdanan. Daw wala lamang siya mabalaka. Nakadungog na siya niana sa nangagi.
Wala ako maikag sa unang tulo ka kapitulo. Ang ikaupat, “Kon Ngano nga Kita Matigulang ug Mamatay,” nakapukaw sa akong kaikag. Apan ang sunod nga kapitulo, “Hain ang mga Patay,” ang midulot kanako. Daw may mipitik. Nakausisa ako sa pilosopiya ug sa pagsabot sa tawo sa kamatuoran, nagpangitag mga tubag sa kinatayoktokang pangutana: Kinsa kita? Nganong ania kita dinhi? Asa kita padulong? Kinsa ang Diyos?
Sa gihisgotan kanang kataposang pangutana sa mga pilosopo, modangop lamang dayon sila sa panulagma. Dili modawat sa Pulong sa Diyos ingong tuboran sa impormasyon, ang ilang mga panaghisgot walay kapuslanan. Nagtuo gayod ako ug Diyos, apan kon kinsa siya—wala gayod ako masayod niadto. Wala akoy suod nga relasyon kaniya. Sa unsang paagi makab-ot ko kini? Wala akoy nahibaloan bahin kaniya.
Busa sa midangat ang Saksi sa kapitulo “Hain ang mga Patay?” nabuhi ako. Kinsa may makasulti kon hain ang mga patay? Walay tawo, walay pilosopo. Walay unod ang ilang pamanabana. Apan karon, sa kataposan, nakita nako ang mga butang gikan sa Pulong sa Diyos.
Dayon miabot kami sa ulohan bahin sa kamatuoran: Unsa ang kamatuoran? Kanunay ba gayod kining magkaharmoniya sa iyang kaugalingon? Akong nasayran nga si Satanas mao ang diyos niining presenteng kalibotan, ug ang kagubot nga nasudlan niini mas nasabtan. Giabot ako ug bag-ong pagkamatikod. Ang kasaysayan sa nangagi ug ang nagakahitabo karon nagkatakdo sa akong nakat-onan bahin sa organisasyon ni Satanas ug sa gisaad nga Gingharian sa Diyos ilalom ni Kristo, nga haduol na nga ipahinabo niini nga matuman ang kabubut-on sa Diyos dinhi sa yuta. Sama gayod sa akong pag-ampo sa Pag-ampo sa Ginoo! Ang kamatuoran nahimong tinuod. Si Jesus nagpamatuod sa kamatuoran. Unsa ang kamatuoran? Nakigsulti sa Diyos diha sa pag-ampo, si Jesus miingon: “Ang imong pulong mao ang kamatuoran.” (Juan 17:17) Sukad nianang panahona nangahulog sa akong mga mata ang “mga himbis.”
Misugod ako sa paggamit sa bag-ong napalgang kamatuoran sa Bibliya ingong sukdanan sa pagsusi sa tanang butang. Nakig-uban ako sa ubang mga Pentekostal. Nadani ako sa ilang kainit. Kadto maoy usa ka makapukaw sa emosyon nga relihiyon. Apan karon akong nadumdoman ang ilang gisulti kanako, “Kasangkapan ang bino sa Yawa!” Migamit sa Bibliya ingong sukdanan, akong nakita nga dili kini tinuod sanglit mihimog unang milagro si Jesus pinaagi sa paghimo sa tubig nga bino.
Miadto usab ako sa pari sa Episkopal nga nangutana mahitungod sa Pinadayag. “Gitun-an nako ang basahon sa Pinadayag sulod sa duha ka tuig sa eskuylahan sa teolohiya,” matud pa niya. “Dili nimo masabtan kini ug ayaw na lang pagsamok pa bahin niana. Apil sa politika. Pauswaga ang kalibotan.”
Lain pa, misantop sa akong hunahuna ang Bibliya ingong sukdanan: “Ayaw higugmaa ang kalibotan ni ang mga butang diha niana.” “Ang tibuok nga kalibotan anaa sa gahom sa daotan.” “Ang pakighigalaay uban sa kalibotan maoy pakig-away batok sa Diyos.”—1 Juan 2:15; 5:19; Santiago 4:4.
Apan, adunay, usa ka sikolohikal nga suliran nga kinahanglang buntogon padulong ning puntoha. Tungod sa garbo, nalisdan ako sa pag-atubang sa kamatuoran nga daghan akog nakat-onan gikan ning itom nga diyanitor nga tig-anhi sa akong balay. Namatikdan mismo sa tawo ang suliran ug iyang gisulbad kana. Miabot siya usa ka gabii niana nga nagdalag laing Saksi ug miingon:
“Abi gud nimo, dili kami mga henyo sa Bibliya. Adunay daghang mga butang nga wala namo mahibaloi. Kinahanglang magtuon usab kami sa among mga tigom. Kon dili nimo igsapayan, dinhi kami magtuon.”
Busa manglingkod sila sa akong sala ug magtuon alang sa ilang tigom sa Martes sa gabii sa Pagtuon sa Libro sa Kongregasyon samtang mangandam ako sa akong leksiyon sa librong Truth. Karon mibati akog kahayahay. Nahupayan ang akong garbo. Kaming tanan pulos mga estudyante. Kinahanglang magtuon usab diay sila!
Ug may nahimo usab niini. Matinguhaon ako sa pagkasayod bahin sa ilang tigom sa Martes sa gabii. Busa misugod ako sa pagtambong nianang tigoma. Dayon miadto ako sa ilang tigom sa Dominggo, ug human niana sa ilang tigom sa Huwebes sa gabii nga nagbansay sa mga Saksi alang sa pag-alagad sa kanataran. Sa kataposan misangyaw ako sa pultahan ug pultahan.
Alang kanako, ang nakahatag kalainan ning relihiyona sa uban mao ang pultahan sa pultahang pagsangyaw. Akong gibati nga kinahanglang ako gayod mismo ang mohimo niana, bisan pa sa akong pagkabaldado. Gawas pa, sa atong presente, dili-hingpit nga kahimtang pulos baldado ang tanan. Mas baldado lang ang uban. Busa miuban ako sa grupo, ako sa silya sa bakol. Diha sa kadaghanang pultahan dili ako makaabot sa pagpislit sa batingting sa pultahan, busa magdala akog taas nga kahoy nga maoy akong gamiton sa pagpislit.
Kanunayng kauban nako ang usa ka Saksi diha sa kongregasyon nga tigulang na ug baldado. Giatake siya sa alta-presyon, hanap ang iyang panan-aw, may pagkabungol pa, apan duolan sa 40 ka tuig na siyang nagsangyaw. Magpares kami sa buluhatong pagsangyaw. Siya ang tigtulod sa akong silya sa bakol ug ako ang momaneho sa awto ug ako ang iyang mga mata ug dalunggan. Daw ako ang katunga ug siya ang laing katunga, apan kaming duha nahimong usa ka tibuok nga Saksi!
Sa karon hapit nang makab-ot ang akong ikatulong tumong—ug daghan pang uban. Ang sayon nga isulti kaniadto gibuhat na karon: Aron mahimong Saksi gihunong ko ang tanang droga. Tungod niini dihay laing panalangin nga miabot: Gumikan sa paghunong sa mga droga nahimong himsog ang akong panglawas ug mibalik ang akong kusog nga tungod niini makalakaw na ako nga may sungkod!
Kaslonon ako niining higayona. Si Patsy maoy usa sa mga payoner—bug-os panahong mga ministro—sa kongregasyon. Kon manggawas ang grupo sa pagsangyaw, kanunay kaming magkauban. Sa ulahi nagminyo ug nagpayoner kaming duha.
Tulin kaayong nahitabo ang mga butang kanako sukad sa unang pagduaw sa mga Saksi kanako. Sa Enero sa 1974 misugod ako sa pakigsulti sa mga Saksi. Sa Pebrero misugod ako sa pagtuon uban kanila. Sa Mayo miuban ako sa pag-alagad sa kanataran sa unang higayon. Sa Hunyo natapos nako ang akong pagtuon sa librong Truth. Sa Hulyo mitambong ako sa akong unang distritong kombensiyon sa mga Saksi ni Jehova. Sa Agosto nabawtismohan ako. Sa Septiyembre misakna ako sa kaminyoon. Sa Disyembre nagminyo ako. Sa Enero 1975 nagpayoner ako. Pagkaokupadong 13 ka bulan!
Sa 1977 ako ug ang akong asawa ug ang among anak nga babaye, si Dolores, mibalhin sa amihanang California sa kinapusuran sa nasod sa bino. Mipalit akog 35 ka akreng punog kahoyng kabungturan—lakip sa gamayng walog nga adunay 3 ka akreng kaparasan. Misugod ako sa paghimog mga bino, ug sa ulahi nakapundog kuwartang ingong garantiya ug misugod sa pagpamaligyag bino. Magsakay ako sa sakyanan sa golf aron makatrabaho diha sa kaparasan ug magsungkod diha sa binohan, nakasugakod ra ako sa pagtrabaho sa importanteng mga buluhaton bisan pa sa akong pagkabaldado.
Sa miaging 1984, akong ibaligya kining propidara ug ang negosyo sa bino ug mibalhin sa mao ra gihapong lugar. Gihimo ko kini aron libre ako ug ang akong asawa sa paggugol ug dugang panahon sa pagsangyaw sa uban bahin sa Gingharian sa Diyos. Naglaom kami nga pinaagi sa dili-takos nga kalulot ni Jehova mabuhi kami sa pagtan-aw sa katumanan sa Paraisong yuta sa saad ni Jehova nga “magahikay ug kombira alang sa tanang nasod sa kalibotan—usa ka kombira sa matambok nga mga kalan-on ug sa labing maayong bino. Dinhi iyang gub-on ang panganod sa kaguol nga nagatabon ibabaw sa tanang kanasoran. Laglagon sa Soberanong GINOO ang kamatayon sa walay kataposan! Ug iyang pahiran ang tanang luha gikan sa tanang mga mata.”—Isaias 25:6-8, Today’s English Version.
Busa malipayon ako nga nagpadayon ako sa pagpangita, kay napalgan ko ang kamatuoran ug ang katagbawan ug kalipay nga nagauban niana.
[Blurb sa panid 24]
Sa nagkamenos ang akong kuwarta nagkamenos usab ang akong mga higala
[Blurb sa panid 24]
Sa miduaw ang mga Saksi ni Jehova, gitawag nako ang kapolisan
[Blurb sa panid 25]
Magsultihanay lang kita, apan dili ako gustong mahimong usa sa mga Saksi ni Jehova
[Blurb sa panid 26]
Diha sa kadaghanang mga pultahan dili ako makaabot sa pagpislit sa batingting sa pultahan, busa magdala ako ug taas nga kahoy nga maoy akong gamiton sa pagpislit niini