Pultahan-sa-Pultahan nga Ebanghelismo—Unsa ka Epektibo?

“Ang kaikag sa ebanghelismo mibuto sa mga iglesya sa Amerikano,” miingon ang Christianity Today. Apan unsang matang sa ebanghelismo ang gituboy?

Karong bag-o, gituboy sa daghang iglesya sa Protestante ang “panaghigala nga ebanghelismo,” nga mao,sangyawan sa mga membro sa iglesya ang ilang mga higala, mga silingan, ug mga membro sa pamilya. Miangkon nga mas epektibo kining paagiha kay sa pagduaw sa mga balay sa mga estranghero, gipunting sa usa ka grupo sa iglesya ang surbi nga gihimo niini sa 14,000 ka membro sa iglesya. “Tali sa 75 porsiento ug 90 porsiento miingon nga nakautang sila sa ilang Kristohanong pagtuo tungod sa higala o sa paryente.” Ang pultahan-sa-pultahan nga pagsangyaw, miingon ang taho, giisip sa kadaghanang mga iglesya nga dili epektibo. Dugang pa, “ang kinabag-an sa mga Kristohanon lainan sa pagbuhat niining matanga sa pagsangyaw.”

Apan tinuod bang ikaingon nga ang pultahan-sa-pultahan nga paagi sa pagsangyaw dili epektibo? Gipunting sa Kasulatan nga ang unang mga Kristohanon, imbes sa paglimite sa ilang pagsangyaw sa mga higala ug mga paryente, may katingalahang resulta sa pagsangyaw sa balangay-sa-balangay ug balay-sa-balay.​—Lucas 8:​1; Buhat 2:​41; 4:​4; 5:​14, 42; 20:​20, 21.

Gigamit sa mga Saksi ni Jehova ang samang apostolikanhong paagi. Ang taga Britanyang sosyologong si Bryan Wilson mianalisar sa pagtubo sa mga Saksi ni Jehova sa Japan ug miingon: “Ang kadaghanan [58.3 porsiento] niadtong nahimong mga Saksi miingon nga napukawg una ang ilang interes pinaagi sa pagdawat sa pagduaw-sa-balay sa usa ka magmamantala.” Epektibo ang pultahan-sa-pultahan nga ministeryo, bisag “lainan” niini ang “kanabag-an sa mga Kristohanon.”