Kinsay Mokombirtir sa Britanya?

SINULAT SA KORESPONSAL SA PAGMATA! SA BRITANYA

ANG membro sa mga iglesya sa Britanya nagaus-os sa gidaghanong hapit 1,500 ka membro sa usa ka semana, taho sa The UK Christian Handbook. Ang mga batan-on nagabiya sa iglesya, pahayag sa The Times, “tungod kay ilang nakaplagan nga makapuol kini ug mingaw.”

Samtang nagasarado ang Anglikanong mga simbahan sa gidaghanong usa kada semana, dunay “linibong tawo nga nangitag kahulogan ug katuyoan sa ilang mga kinabuhi,” angkon sa Church Times sa Iglesya sa Inglaterra.

Kay nag-atubang niining maong suliran, ang mga iglesya sa Britanya nahiusa niadtong 1990 sa pagpasiugda sa “Dekada sa Ebanghelismo.” Ang The Scotsman miingon nga ang katuigang 1990 “hayan maoy dekada diin ang ebanghelismo gigamit pag-usab sa tradisyonal, establisadong mga Simbahan sa tuyo nga padaghanon ang ubos-kaayong gidaghanon sa membro ug aron balihon ang dagan ngadto sa sekularismo.”

Usa ka bililhong paglaom​—apan matuman ba kini? Unsay nahitabo sa milabayng pipila ka tuig?

Usa ka Dili-Seguradong Pundasyon

Ang mga klerigo sa Iglesya sa Inglaterra nakapatunghag diyutay nga kadasig alang sa “Dekada sa Ebanghelismo” sa ilang 1989 nga Konsilyo Heneral. Ang tsirman sa Church Union’s Mission and Renewal Committee, pananglitan, mipasiugda: “Hinungdanon kaayo ang pagpangandam,” apan mapanagan-on siyang midugang: “Hayan kini, sa pipila ka kaso, dangtan gayod ug dekada.”

Ang obispo nga si Gavin Reid mitagna: “Mahimo unya kining usa ka kampanya sa kaulawan human sa lima ka tuig.”

Wala matarog, ang mga Anglikano sa wala madugay mipormag usa ka polisa uban sa mga Romano Katoliko, nga mitukod sa ilang kaugalingong “Dekada sa Pag-ebanghelyo” niadtong 1988. Kadaghanan sa ubang mga denominasyon dunay pipila ka pagduhaduha. “Mosulti ko sa tinuod nga wala ako mahimutang bahin sa Dekada sa Ebanghelismo. Usa kini ka taas-paminawon nga ulohan, apan unsay ipasabot niini?” sukna ni Paul Hulme, ministro sa iladong Wesley Chapel sa City Road, sa London. “Unsa bay angay natong buhaton nga wala pa nato gihimo karon?”

Paghubit sa mga Tumong

Ang pag-ebanghelyo mao ang pagwali sa ebanghelyo, o maayong balita, aron kombirtihon ang mga mamiminaw ngadto sa Kristiyanidad​—lahi ra kaayo gikan sa buot mahitabo sa daghang mga pangulo sa iglesya. “Dili namo buluhaton ang pagkombirtir sa mga tawo ngadto sa Kristiyanidad,” pahayag ni Dr. Newbigin sa United Reformed Church. “Buluhaton kana sa Diyos.” Unsay nagpaluyo sa maong talagsaong pahayag? Ang nagatubong panagbingkil sa daghag-rasa nga katilingban sa Britanya uban sa dili-Kristohanon, etnikong mga relihiyon niini. Tagda ang mosunod:

“Ang Dekada sa Ebanghelismo mahimong mapalong sama sa ubang mga dekada,” matud sa Anglikanong rektor nga si Neil Richardson, “apan samtang nagpadayon pa kini sa pagkadili-epektibo niini usa kini ka paglinga gikan sa mas bug-at nga suliran nga giatubang sa mga iglesya ug sa tanan: ang lagmit mosilaob-ang-kasuko nga panagtagbo sa mga relihiyon sa tanan natong dakbayan.” Sa pagpunting sa suliran, siya mipadayon: “Ang mga relasyon tali sa mga seksiyon sa relihiyosong komunidad kinahanglang ibase sa lig-ong pagsalig nga walay mausa ang maninguha sa pagkombirtir o pagpangabig.”

Kay nasayod pag-ayo niining “lagmit mosilaob-ang-kasuko” nga kahimtang, si George Carey, ang Arsobispo sa Canterbury, mipahayag sa “Dekada sa Ebanghelismo” ingong “bakikaw nga ulohan” tungod kay gibati sa mga pangulo sa Muslim ug Hudiyo nga sila ang gitumong sa “dili-matarog nga mga ebanghelikal.” “Usa ka sayop,” matud niya sa ulahi, “ang pag-ingon sama sa gihimo sa uban nga ang pangunang buluhaton sa iglesya mao ang pag-ebanghelyo.”

Ang obispo nga si Michael Marshall, sa laing bahin, nangatarongan nga ang pangunang panginahanglan maoy alang sa Iglesya sa Inglaterra nga “makombirtir ngadto sa Iglesya sa Diyos sa Inglaterra,” uban sa mga Muslim ug uban pa nga dad-on ngadto sa Kristohanong pundok. “Ang awhag sa pagkabig sa Islam ngadto kang Kristo maoy bahin sa plano,” pahayag niya, nga nagpasidaan nga ang maong paagi “maglangkit gayod ug usa ka dekadang kabangian.”

Komosta na man ang mga Hudiyo? “Ang Tinuod nga Ebanghelismo Kinahanglang Maglakip sa mga Hudiyo,” sumala sa ulong-tudling sa Church Times. Apan si David Sheppard, obispo sa Liverpool, kusganong misupak. “Ang pangunang tumong sa Dekada sa Ebanghelismo angay nga mao kadtong mingbiya sa ilang pagtuo o kadtong wala gayod masayod kon unsa ang pagtuo sa Diyos,” matud niya. Posible ba kini? Si Neil Richardson, nga nagsulat sa The Guardian’s sa ulohang “Nagaus-os nga Abot sa Ebanghelismo,” nangatarongan: “Ang matag tawo [sa Britanya] duna nay igong kahigayonan sa pagtimbangtimbang sa mga pangangkon sa Kristiyanidad. Tataw nga ang kadaghanan nakahukom nga kini dili alang kanila.”

Ang mga iglesya ba sa Britanya nasangkapan aron mag-ebanghelyo sa maong sekular nga katilingban uban sa daghan niining tinuhoan ug etnikong mga kultura?

Ang Hagit

Ang kanhing arsobispo nga si Dr. Runcie mipahayag: “Ang among mga opisyales sa ebanghelismo mao ang mga obispo ug klero, ang among mga misyonaryo maoy mga layko.” Ang beteranong ebanghelista nga si Gilbert W. Kirby miingon: “Ang matag kristohanon angay nga makahimo sa pagpatin-aw ngadto sa uban sa mga doktrina sa tinuhoan. Ang matag kristohanon kinahanglang tudloan kon unsaon pag-agak sa uban ngadto kang Kristo. . . . Kinahanglang ang atong tumong maoy membro-sa-iglesya nga natudloan. . . . Kawang ang mosugo sa mga tawo sa pag-ebanghelyo nga wala sila tudloi kon unsaon paghimo niana.” Sa laing pagkasulti, ang mga obispo ug klero kinahanglang manguna sa pagpakita sa ilang mga panon kon unsaon ang pag-ebanghelyo.

Nagsulti nga prangka sa inagurasyon sa BBC “Priestland Memorial Lecture,” ang tigsibya sa radyo nga si Brian Redhead miingon: “Ang mga pangulo nga hayahay sa ilang mga posisyon kinahanglang moatubang sa kamatuoran nga sila nawad-an nag gahom sa pagdani sa pagtagad sa mga tawong dili-komitido sa relihiyon . . . Kinahanglang hatagan pa nila ug mas dakong pasiugda ang arte sa pagwali.” Ug asa kini angay nga himoon?

Sa pagsugod niining sigloha, si William Wand, sa ulahi nahimong Obispo sa London, nakadawat sa iyang sayong pagbansay sa Lancaster, Inglaterra, sa dihang naandan pa ang pastoral nga pagduaw. “Nagtuo ako nga kuwarenta ka pultahan ang kinadaghanan nga akong natuktok sa dagan sa buluhaton sa usa ka hapon,” sulat niya sa ulahi. “Ang Bikaryo nasayod usab sa mga panginahanglan sa minoridad sa katawhan nga daw wala gayod makaadto sa simbahan. Ikag siya nga himoon ang gitawag karon nga usa ka ‘lusot’ batok niining kawalay-pagbati ug kawalay-pagtagad.”

Alang kang bisan kinsang klerigo ang paghimo karon sa maong personal nga kontak sa Britanya sa pagkatinuod mahimong usa ka talagsaong eksepsiyon! Ulahi na kaayo ang pagkaamgo sa mga iglesya sa Britanya nga wala diay ing kapuli ang pag-ebanghelyo sa katawhan diha sa ilang mga balay, sa paagi nga gihimo ni Jesus ug sa iyang mga disipulo.

“Ang tinuod lamang nga dedikadong tawo ang makakabig sa uban ngadto sa Diyos,” pahayag sa Evangelism and the Laity. “‘Himoa ang buluhaton sa tig-ebanghelyo’ [2 Timoteo 4:5] . . . maoy usa ka sugo nga kinahanglang sugton sa usa ka paagi sa matag Kristohanon kon ang Iglesya motuman sa katuyoan niini sa atong kaliwatan.”

“Maayong Balita”​—Tinubdan Niini

Si John Taylor, ang sekretaryo heneral sa Division of Ministries of the Methodist Church, nagsulat sa The Times sa London bahin sa “atong obligasyon sa pagpakig-ambit sa maayong balita.” Siya miingon: “Ang simbahan kinahanglang mangita gayod ug bag-o ug mas epektibong mga paagi sa pag-atiman ug pagtudlo sa kaugalingon niining mga membro. Bisan diha sa simbahan dunay makapasubong kawalay-alamag bahin sa Kristohanong kasulatan.” Asa gidala niining kawalay-alamag ang mga membro niini?

“Ubay-ubay sa nagapangunang mas bag-ong mga Ebanghelikal . . . namugos nga ang Kristohanong pagkatinun-an nagkinahanglan ug espesipikong mga matang sa sosyal ug politikal nga kalihokan,” pahayag ni Rachel Tingle sa Another Gospel?​—An Account of the Growing Involvement of the Anglican Church in Secular Politics. Kining “Teolohiya sa Gingharian,” sumala sa pagkatawag niini, nangatarongan nga ang Gingharian sa Diyos dad-on sa yuta sa dihang ang kalinaw, hustisya, ug “sosyal nga pagkamatarong” matukod pinaagi sa politikal nga mga paagi. Sa pagkatinuod, kini maoy “Teolohiya sa Liberasyon,” o ang karaang “Kristohanong Sosyalismo” sa modernong takuban niini.

Sa unsang paagi mapahiuyon kining maong panghunahunaa sa kaugalingong pahayag ni Jesus: “Ang akong gingharian dili bahin sa kalibotan. . . . Ang akong gingharian dili gikan niining tinubdan”? (Juan 18:36) O uban sa mga pulong sa mas unang propeta: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igahatag ngadto kang bisan kinsang ubang katawhan. Kini magadugmok ug magatapos niining tanang mga gingharian, ug kini molungtad sa walay kataposan”?​—Daniel 2:44.

Timan-i nga kining maong Gingharian gitukod sa mga kamot sa Diyos​—dili sa tawo. Ang kagawasan gikan sa gubat, gikan sa inhustisya, ug bisan sa kamatayon mismo magagikan ni Jehova pinaagi sa iyang tinudlong Hari, si Jesu-Kristo​—dili gikan sa tawo. Kana gayod mao ang maayong balita nga kinahanglang imantala!​—Pinadayag 21:​3, 4.

Karong adlawa, ang mga Saksi ni Jehova, nga ang gidaghanon hapit mokabat ug 130,000 sa Britanya lamang, nakig-ambit sa samang pagtuo. Gikan sa tanang nasodnong pundok ug relihiyosong mga pagtuo, sila nagbarog nga nahiusa ingong mga Kristohanon. Sila maoy nabansayg-maayo nga mga ebanghelisador nga ikag makig-ambit sa maayong balita uban niadtong maminaw. Niining maong katuyoan ilang gigamit ang matag paagi nga mabatonan, ug daghan ang nakabenepisyo gikan sa ilang epektibong ministeryo.

[Kahon sa panid 23]

Mga Ebanghelista sa Britanya

Ang mosunod nga kinutlo gikuha gikan sa usa ka Britaniko Romano Katolikong senemanang mantalaan, ang Catholic Herald, Oktubre 22, 1993, panid 8.

“Unsay nahitabo sa dekada sa ebanghelisasyon? Duna ba diay! Duha ka tuig sa miagi kadto maoy paborito sa bulan ug wala gayoy semana nga dili kana hisgotan sa mantalaan. Karon? Usa ka makabungog nga kahilom. . . .

“Asa man ang pagkadinalian nga gipasabot ni Jesus samtang Iyang gipadala ang Iyang mga tinun-an aron mag-ebanghelyo sa palibot nga mga balangay? O ni San Pablo: ‘Alaot ako kon wala ko ipahayag ang maayong balita! (1 Co 9:16).’

“Dunay suliran usab nga wala masabti sa daghang Katoliko nga ang ebanghelisasyon dili usa ka kapilian kondili usa ka gamhanang mando nga gibut-an ni Kristo Mismo: ‘Panglakaw kamo, himoang mga tinun-an ang tanang kanasoran’ [Mateo 28:19]. . . .

“Pila ka Katoliko ang may igong kahibalo sa ilang tinuhoan aron makaatubang sa mga dili motuo? . . . Pagkatalagsaon niini nga, ang Anak sa Diyos nga mianhi na sa yuta, pipila lang kanato ang naninguha sa pagtuon sa Iyang gipamulong. . . .

“Karon wala ako mangatarongan pabor sa mga Saksi [ni Jehova]. . . . Apan hinuktoki ug makadiyot ang kaatbang nga punto de vista. Ang ilang moral nga baroganan, binase sa pagtuo sa absolutong mga sukdanan sa Diyos, dili kaduhaduhaan. Dugang pa sa punto nga gihisgotan, ang matag Saksi nagagugol ug tumbas sa tulo ka gabii matag semana aron sa pagtuon bahin sa doktrina, sistematikong pagtuon sa Bibliya, ug praktikal nga adlaw-adlaw Kristohanong pagkinabuhi, nga subsob ginahimo sa balay sa usag usa.

“Dili lamang kana, kondili ang matag Saksi gitudloan usab nga, tungod sa iyang pagkatinawag, siya usa gayod ka misyonaryo. Gitudloan siya sa kinahanglanong mga paagi nga gikinahanglan sa pagpresentar sa iyang mensahe. Ang pagtuktok sa pultahan, pagsangyaw nga tinagurha, maoy sentrong bahin sa iyang kinabuhi. Ang mga Saksi masiboton usab sa pag-atiman sa mga kabos ug nanginahanglan.

“Sa mubong pagkasulti, . . . dili gayod mahimo nga dili kita mapahinumdoman bahin sa sayong Iglesya ingon sa gihulagway diha sa mga buhat sa mga Apostol. Ug ang kalamposan mahibaloan ra sa resulta. Ang ilang pagtubo tulin kaayo. Ang dayag nga pagmantala may mga resulta!”