Mosangyaw ba Sila sa Pultahan ug Pultahan?

“ANG Papa Nagpadalag mga Magsasangyaw Ngadto sa Kadalanan sa Roma.” Kana mao ang ulohan sa balita nga gitaho ni Greg Burke. Siya misulat: “Si Papa Juan Paulo nag-awhag sa mga Katoliko sa Italya sa pagsunod sa panig-ingnan sa mga sekta sama sa mga Saksi ni Jehova, nga nakabatog mga kinabig sa nasod, ug magsugod sa pagsangyaw sa pultahan-ug-pultahan.

“‘Dili kini ang panahon nga igakaulaw ang Ebanghelyo, kini ang panahon nga igasangyaw kana sa publiko,’ ang Papa miingon sa Lunes sa 350 ka nagapanaw nga mga magsasangyaw ug mga magtutudlo sa relihiyon. . . .

“‘Ako naglaom nga ang inyong proyekto sa pagmantala sa Ebanghelyo diha sa kadalanan . . . magdalag dagayang mga bunga,’ siya miingon kanila. ‘Inyong nadiskobrehan ang usa ka estilo sa pagsangyaw nga moabot bisan ngadto kanilang nahisalaag sa pagtuo.’”

Ang reporter nga si Burke nag-ingon: “Ang tumatambong sa Katolikong Iglesya kusog nga mius-os sa Italya sa miaging duha ka dekada, ug ang kadasig sa Papa alang sa pultahan-ug-pultahan nga mga magsasangyaw mopatim-aw nga labing menos sa bahin maoy pagsanong sa nagakahanaw nga impluwensiya niini.”

Ang maong tambag nga “magsugod sa pagsangyaw sa pultahan-ug-pultahan” dili gayod bug-os bag-o. Usa ka miaging papa, si Paulo VI, miingon nga ang Katolikong Iglesya “naglungtad aron isangyaw ang ebanghelyo.” Ug ang presenteng papa, si Juan Paulo II, nagpagula sa iyang ensiklikal nga Redemptoris Missio sa 1991 sa pag-alerto sa iyang simbahan sa panginahanglan sa pagtuman sa sugo ni Jesus sa pagsangyaw sa publiko.

Ang Romano Katolikong magsusulat nga si Peter Hernon nagpatugbaw ug pangutana diha sa Catholic Herald sa London: “Unsay nahitabo sa pagsangyaw sa ebanghelyo?” Siya nabalaka mahitungod sa nailado-kaayong “dekada sa pagsangyaw sa ebanghelyo” nga karon ubay-ubay nang katuigan ang edad. Sa dihang iyang gisukna ang usa ka obispo bahin sa kawalay pag-uswag, ang obispo mitubag: “Dili ka kinahanglang magdali. Ang Iglesya naglungtad sa 2000 ka tuig pa lamang.”

Dili ikahibulong nga nangutana si Hernon: “Hain ang pagkadinalian nga gipakita ni Jesus samtang gipadala Niya ang Iyang mga tinun-an sa pagsangyaw sa ebanghelyo sa palibot nga mga balangay? O hain ang pagkadinalian nga gipakita ni San Pablo: ‘Alaot ako kon dili ko ipahayag ang Ebanghelyo! (1 Co 9:16).’” Sa pagkatinuod, sundogon ba sa mga Katoliko ang unang mga Kristohanon nga nagsangyaw sa publiko “ug gikan sa balay ug balay”?​—Buhat 5:42; 20:​20, Douay Version.

Gidawat ni Hernon nga kon bahin sa pultahan-ug-pultahang pagsangyaw sa ebanghelyo, siya “makadungog ug mga maduhaduhaon nga nagayamyam nga ‘sa theoriya, dili-praktikal.’ Dili,” mitubag si Hernon. “Sa paghatag pangatarongan niana nga pangangkon ako kinahanglang mogamit ug usa ka dili maayong pulong. Ako nasayod nga kini dili maayo tungod kay sa miaging panahon nga gigamit ko kini diha sa usa ka Katolikong artikulo ang tibuok seksiyon gikuha (bisag walay gibag-o). Ang pulong mao ang Saksi ni Jehova. . . . Ang matag Saksi gitudloan usab nga, sa pagtawag kaniya sa ingon, siya kinahanglan nga usa ka misyonaryo.”

Bisag supak si Hernon sa mga pagtulon-an sa mga Saksi ni Jehova, siya miadmiter nga sa dihang palandongon sa usa ka tawo ang ilang mga paagi sa pagsangyaw, “ang usa dali ra nga mapahinumdoman sa unang Iglesya ingon sa gihubit diha sa mga buhat sa mga Apostoles.”

Ang mga Saksi ni Jehova nagpadayon sa ilang masibotong pultahan-ug-pultahang ministeryo, sa ingon nagtuman niining modernong mga panahon sa sugo ni Jesu-Kristo: “Kamo mahimong mga saksi nako . . . ngadto sa kinalay-ang dapit sa yuta.”​—Buhat 1:8.