Espirituwal nga Kagutom sa Nigeria?

“NAGKAUS-OS ba ang relihiyon?” nangutana ang usa ka artikulo sa pamantalaan. Dili lamang manumbaling niining pangutanaha ang uban, ilabina kon nanagpangsulbong ang mga iglesya sa ilang lugar. Apan, ang lakbit nga pag-usisa sa mga magasin ug mga pamantalaan, makabukas sa hunahuna. Pananglitan, ang magasing Time miingon: “Ang makikalibotanon, nga kas-a gamhanon ug sa ulahi matugtanong mga iglesya sa Protestante sa Amerika daw nagakaus-os.” Kini maoy larawan sa gipamulong sa palumagian sa balita bahin sa relihiyon karong panahona.

‘Apan unsay ikasulti bahin sa nanghibilin sa kalibotan?’ tingalig mangutana ka. ‘Tinuod bang nag-antos sa samang problema ang relihiyon sa ubang kanasoran?’ Oo. Ug sa pag-ilustrar, atong tan-awon ang mga kasamok nga ginaantos sa mga iglesya diha sa abundag kahinguhaang nasod sa Nigeria. Ang situwasyon didto makatabang kanimo sa pag-apresyar sa kalisdanan nga miugmad sa iglesya diha sa globonhon nga sukod.

Mga Nakombirter, Dili mga Kristohanon

Duolan sa ikatulong bahin sa dakong populasyon sa Nigeria nag-angkong Kristohanon. Ug dugayng paningkamot ang gihimo sa mga misyonero sa Kakristiyanohan aron mabatonan kining lig-ong pagpaluyo. Miingon ang magasing Time: “Natingala ug natandog ang mga Aprikano sa pagkamainandamon sa mga misyonero sa pag-antos sa kabanikanhan, sa pagtabang sa pagpangalot ug atabay, sa pagtudlo sa pagbasa ug pagsulat, sa pagdumala sa makahatag-kinabuhing mga sako sa bugas sa panahon sa gutom, nga nagpameligro sa ilang mga kinabuhi sa pagpaningkamot sa pagtambal sa mga masakiton.”

Samtang dalayegon ang maong mga buhat, kinahanglang dawaton nga sa sinugdanan pa, ang mga iglesya nakadani ug mga higala pinaagi sa paghatag materyal nga mga panginahanglan—dili espirituwal nga gana. (Mateo 5:3) Busa, nakakabig silag daghan apan dili gayod tinuod nga mga Kristohanon. Ang The World Book Encyclopedia nag-ingong daghang mga Kristohanon sa ngalan lamang “nagtapo sa relihiyosong mga buhat sa Kristohanon o Muslim uban sa kinaandan [dili-Kristohanon] nga mga pagtuo.” Sa pagkaalaut, nasipyatan sa mga misyonero sa Kakristiyanohan ang kamatuoran nga madinawaton ang mga Aprikano sa Bibliya mismo—nga walay dayandayan sa mga programa sa katilingbanong buhat. Apan, gituohan sa uban nga ang rekord sa Kakristiyanohan sa kalihokan sa misyonero ang nakasanta sa relihiyosong Muhamandanismo sa pagkaylap sa kontinente sa Aprika, nga maoy panagna sa uban nga maingon niini.

Apan, ang mga iglesya, wala matagbaw sa paghimo sa mga Nigeriano nga mga komberti lamang. Gibati karon sa kadaghanang mga klero nga ilang balaang katungdanan ang pagpakiglabot nga aktibo sa politikal nga kausaban. Ang pamantalaang Daily Times sa Lagos, pananglitan, mipahayag sa Oktubre 18, 1982: “Ang patriarka sa Simbahang Methodist sa Nigeria, si Dr. Bolaji Idowu, miingon sa Ibadan kagahapon nga ang Simbahan adunay katungod sa pakigbahin sa politika sa katuyoan lamang sa pagpaliso niini ngadto sa pagkamatarong . . . Gipasiugda ni Dr. Idowu nga ang Simbahan dili makabiya sa politika tungod kay may obligasyon kini sa pagwali sa ebanghelyo maingon usab may obligasyon kini sa pagpalangkit sa kababayen-an ug kalalakin-an sa politika.”

Wala mag-inusara ang Simbahang Methodista sa pag-apil-apil sa kadaghanan sa politika. Miingon ang New Nigerian sa Enero 12, 1981: “Ang Obispong Katoliko sa Ogoja, si Rt. Rev. Dr. Joseph Edra Ukpo nag-awhag sa pagpormag departamento sa relihiyosong mga kalihokan.” Ang katarongan? Ang artikulo mipadayon sa pagpakita nga gibati sa ubang mga klero nga “panahon na karon sa kagamhanan sa pagtigom sa tanang relihiyosong mga organisasyon nga maduol kaniya.”

Apan unsay epekto niining tanan diha sa iglesya ug sa mga membro niini?

Ang Epekto

Gipalanog na karon ang pasidaan batok sa paglangkit sa iglesya sa politika. Ang usa ka magsusulat miingon nga samtang ang mga iglesya “nagpaila nga sila adunay katungod sumala sa balaodnon sa pag-apil sa kalihokan sa nasod,” sa pagkatinuod, “wala sila niana nga katungod.” Siya dugang mipasidaan nga dili “maayo” alang sa mga relihiyonista ang “sobrang pakiglangkit sa kagamhanan sama sa ilang gihimo karon. Tingalig makita na lamang unya nila nga ang kagamhanan na ang mopilig mga Obispo . . . alang kanila.”

Nagpakigpulong diha sa Anglican Church Synod, ang Gobernador sa Estado si Bola Ige mireklamo usab nga giisip sa mga iglesya ang ilang konstitusyonal nga kagawasan sa relihiyon ingong “lisensiya kanila sa pagbuot sa ilang partikular nga kiling sa relihiyoso ug partido diha sa Kagamhanan pinaagi sa pagpasumangil nga nagapangita sila sa tagsaong kaikag sa ilang panon.” Busa iyang gidasig ang mga lider sa iglesya sa pagtapot diha sa ilang “buluhaton sa pag-ebanghelyo” imbes sa politika.

Pagkadunot sa Iglesya

Apan, may kalagmitan bang mobalik ang pag-ebanghelyo? Wala sumala sa larawan nga gipakita sa mga lider sa iglesya ug sa uban sa espirituwal nga kahimtang sa iglesya.

“Napakyas ang klero ug nahugno sa espirituwalidad ang mga membro,” miingon ang klerigo, si James Jide Adesoh, diha sa usa ka artikulo sa Daily Times sa Septiyembre 7, 1982. “Ang pagkamapihigon, tribonhon ug seksyonalismo maoy dagkong sakit sa atong mga iglesya niining presenteng panahon,” midugang siya sa pag-ingon. Maingon man, ang presidente sa Anglican Diocesan Council mitahong nag-ingon nga “ang pagkaus-os sa sukdanan sa relihiyong Kristohanon maoy kapakyasan sa dagkong mga lider sa iglesya kinsa nagtugot sa gugma sa salapi sa paglandong sa espiritu sa Diyos diha kanila.”

Niining maong espirituwal nga kahaw-ang, dili malikayang mougmad ang pagkadunot. Miingon ang prangkang klerigo: “Diha sa sulod sa simbahang Nigeriano nga atong makita ang mga ansiano kinsa tapos nga makapanapaw mokutlo kang Haring Solomon ingong harianong kundatan kinsa gimahal ug gipanalanginan sa Diyos! . . . Diha sa Nigeria nga atong makita ang halangdong mga pari kinsa nagpanalipod sa ilang kaugalingon pinaagi sa mga habak sa juju ug mga anting-anting sulod mismo sa iglesya sa Diyos!” Miingon ngani ang usa ka gobernador sa Nigeria nga “ang pagdaghan sa mga krimen sa Nigeria maoy tungod sa kapakyasan sa relihiyosong mga organisasyon sa pagbuhat sumala sa ilang ginawali.”

Ang pagkadunot sa iglesya nahimong iladong panig-ingnang daotan nga tungod niana nakapahayag ug pagmahay ang usa ka magsusulat nga “daw nagpalikod na lamang ang ebanghelismo ug si Satanas ang nakitang mao na lamang usa ang naglihok sa atong mga iglesya ug nasod.” Dili ikatingalang gibangon sa usa ka pamantalaan sa Nigeria sa sinugdanan ang pangutana: “Nagakaus-os ba ang Relihiyon?”

Buluhaton sa Paghupay sa Kagutom

Larawan ang mga problema sa iglesya sa Nigeria sa mga relihiyon sa kalibotan. Napakyas sila sa pagtagbaw sa espirituwal nga kagutom sa mga tawo. Materyalismo ang ilang gipangagpas ug nakigbahin sa politika imbes sa pagtudlo sa Pulong sa Diyos. Apan, kini, dili katingad-anan alang sa mga estudyante sa Bibliya, sanglit kini dugay nang gitagna: “‘Tan-awa! Ang mga adlaw moabot na,’ nagaingon ang Soberano Ginoong Jehova, ‘ug diha sa yuta ipadala ko ang kagutmanan, dili kagutmanan sa tinapay, ni kauhaw sa tubig, kondili kagutmanan sa pagpatalinghog sa mga pulong ni Jehova.’” (Amos 8:11) Apan dili tanan ang nag-antos sa kasakit sa espirituwal nga kagutom..

Libolibo ka mga taga Nigeria kinsa tinuod nga “gigutom ug giuhaw sa pagkamatarong” natabangan sa mga Saksi ni Jehova aron “mabusog” sa espirituwal. (Mateo 5:6) ‘Apan unsay nakahimo sa mga Saksi ni Jehova nga lahi kay sa ubang relihiyosong mga grupo?’ tingalig mangutana ka. Buweno, una, ilang gitagad gayod ang sugo ni Jesus nga sila kinahanglang “dili bahin sa kalibotan.” (Juan 17:14) Nagpasabot kini nga nagpahilayo sila sa politika ug hinunoa, nagatagad sa pagwali sa “maayong balita sa gingharian.” (Mateo 24:14) Imbes magpaluyo sa sosyal nga mga programa, ilang ginatudlo sa mga tawo ang seguradong paglaom sa usa ka umaabot nga gingharian pinaagi sa Diyos. Ang pinakaulahing taho nagpakita nga adunay aberids nga 102,356 ka taga Nigeria ang nakigbahin niining makatagbawng paglaom diha sa uban.

Tinuod, gitamay sa mga lider sa iglesya ang mga Saksi ni Jehova. Apan, sa kasukwahi, nagagikan ang mga pagtamay sa pagdumili sa mga Saksi sa mismong butang nga maoy nakahatag kalisod sa iglesya—nga mao, ang pakiglangkit sa politika. Tungod sa ilang neyutral nga baroganan, wala maapil ang mga Saksi sa kadaot nga ginaantos karon sa mga iglesya sa Nigeria.

Busa gidapit namo kamo sa pagtagbaw sa inyong dulot nga tinguha sa espirituwal nga mga butang pinaagi sa pag-apil sa seryosong pagtuon sa Bibliya ug sa pakig-uban niining maong mga Kristohanon kinsa mao ang tinuod nga mga disipulo ni Kristo. Mobukas kini ug labing makatagbawng kinabuhi kanimo, tungod kay ang “diyosnong debosyon mapuslanon alang sa tanang butang, sanglit may saad man kini sa kinabuhi karon ug sa umaabot.”—1 Timoteo 4:8.

[Blurb sa panid 13]

Nakadani ang mga misyonero sa Kakristiyanohan sa pagpaluyo sa daghang mga Aprikano pinaagi sa mga proyektong katilingbanon—dili pinaagi sa pagtulon-an sa Pulong sa Diyos

[Letrato sa panid 14]

Ang mga Saksi ni Jehova nakahupay sa espirituwal nga kagutom sa libolibo pinaagi sa pagtudlo sa paglaom sa Bibliya sa usa ka kagamhanan pinaagi sa Diyos

[Blurb sa panid 15]

“Kamo mao ang kahayag sa kalibotan. . . . Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit.”—Mateo 5:14, 16.