Misanong sa Pagdapit—Alang sa Dugang nga mga Misyonero

“SIGE kami ug hulat sa kartero kada adlaw,” miingon si Andrew Reed, nga “malaomon.” Alang kang Andrew ug sa iyang asawa, si Miriam, ang dugay nang gihulat nga sulat miabot—ang imbitasyon sa pag-eskuyla sa ika77ng klase sa Gilead School, ang tunghaan sa Watchtower Society sa pagbansay sa misyonero sa Brooklyn, New York. Andam na silang mogikan.

Andam na usab si Paul ug Pamela sa paggikan. “Bumabalhin kami sa pag-alagad diin dako ang panginahanglan,” miingon si Paul, mibatbat nga mobalhinay sila sa usa ka gamayng kongregasyon sa Kansas. Midugang si Pamela, “Andam na kami sa paglakaw, nanagpamaligya ug nanagpanglabayg mga butang. Busa sa dihang among nadawat ang imbitasyon sa Gilead, bag-o pa lang gayod kaming nakatapos, ug imbes moadto sa Kansas mianhi kami dinhi.”

Unsay gikausahan niining batan-ong mga lalaki ug babaye nga bag-o pang nagtungha sa Gilead School? Sila, sama sa ilang mga kauban sa klase—37 ka estudyante ang tanan—andam, oo, naghinamhinam sa pag-adto sa Brooklyn aron mabansay ingong misyonero. “Usa kini ka damgong nahimong tinuod,” miingon ang usa sa mga estudyante. Silang tanan, walay eksipsiyon, andam sa pagpasibo sa ilang kinabuhi aron sa pagsanong sa pagdapit.

Mao kanay gibati sa membro sa klase nga si Mark ug Patricia Noumair sa dihang ilang nadawat ang imbitasyon sa Gilead. “Apan,” miingon si Patricia, “dili kadto lisod tungod kay mao kanay among gipaningkamotan. Gihimo namong simple ang among kinabuhi. Kami adunay diyanitoryal nga serbisyo nga igo lamang para kanamong duha. Kon adunay mga tanyag nga dili namo maatiman, ihatag namo kini sa lain.” Sulod sa duha ka semana, ilang gibaligya ang ilang mobile home ug ang ilang negosyo. Miingon si Mark: “Andam na kami sa paglakaw.”

Ingon nianang matanga sa espiritu ang gipakita sa hapit 6,100 ka ministro nga nanagpanungha sa Gilead School sukad sa 1943, ang tuig nga misugod paglihok ang tunghaan. Apan nganong mipili sa buluhatong misyonero diin makahimo man unta sila sa pagpadayon sa ilang mas maayong mga karera, o makasangyaw man usab sa bug-os panahon nga mas duol sa balay?

“Maayo kana nga pangutana,” miingon si Karen Enns, usa sa unom ka dalagang babaye sa ika-77ng klase, kinsa nanamilit sa iyang buotang mga higala sa Alma, Quebec, Canada. “Nakaangay ako sa mga tawo sa Alma, ug gusto ko ang teritoryo. Maayog lakaw ang tanang butang. Apan miingon ako sa akong kaugalingon, ‘Makahimo ka pag labaw.’ Wala ako matagbaw.”

Gikalipayan usab ni Terry ug Karen Medley ang ilang ministeryo sa wala pa moabot sa Gilead School. Apan nangita silag bag-ong hagit. Miingon si Terry, “Dili ko gusto ang sobra ka hayahay.” Mao usab ang gibati ni Michael ug Tracy Berkeley. “Dili kami makahimo, nga may hinlong konsensiya, sa paglingkod lamang,” miingon si Michael. Sama sa daghang matinumanong mga Kristohanon sa unang siglo, buot nilang itanyag ang ilang kaugalingon alang sa dugang nga pag-alagad sa Diyos.

Andam sa Pag-adto Bisan Asa

Ang tanan sa klase miabot sa Gilead nga wala mahibalo kon asa sila ipadala. Nganong wala makapugong ang posibilidad nga basig ipadala sila sa layong nasod nga tingali dili maayo ang kahimtang sa sanitasyon? “Nagkinahanglan ang mga tawo nga makadungog sa kamatuoran,” mao ang madasigong tubag sa klase.

Sa pagkatinuod, ang uban diha sa klase, sama kang Mark ug Patricia Noumair, nagpanuko sa wala pa sila miaplay sa Gilead. Apan nakakat-on sila sa pagpabili, miingon si Mark, nga “dunay maayo ug daotan ang tanang asaynment.” Si Mark ug Denise Brandon, nagpanghanduraw sa mga kahimtang nga ilang atubangon. “Apan,” miingon si Mark, “nakapakigsulti kami sa pipila ka mga misyonero.” Natingala sila sa pagsalig nga gipakita niining maong mga misyonero kang Jehova. Kining upat ka mga estudyante malipayon sa pag-alagad karon ingong mga misyonero sa Aprika.

Sa walay duhaduha, kining mga batan-ong mga lalaki ug mga babaye may pagsalig nga atimanon sila ni Jehova. Sa pagkamatuod, ang ilang pagtanyag sa ilang pag-alagad ingong mga misyonero, sila nagapangita, dili sa ilang kaugalingong intereses, kondili sa intereses sa Gingharian sa Diyos. (Mateo 6:33) Apan sa sinugdan diin nila nakuha kining tinguha sa misyonerong buluhaton?

“Sa pagkamatuto,” miingon ang mga estudyante. Tagda pananglitan si Miriam Reed, nga giasayn uban sa iyang bana sa pag-alagad sa Peru. “Sa dihang migula ang mga serye sa mga artikulo nga nagdasig sa mga tawo sa pag-adto sa Sentral Amerika,” miingon siya, “mibalhin ang akong papa, ug nangadto kami ingong pamilya.” Ang pamilya—uban sa unom ka anak—mipuyo sa Nicaragua. Dugang miasoy si Miriam: “Sa pag-abot didto, kanunay akong mokuyog sa mga igsoong babayeng misyonero sa pag-alagad. Ug ang pag-alagad diin dako ang panginahanglan ug sa pagtrabaho uban sa mga misyonero, sa akong hunahuna, mao ang nagpalihok kanako sa pagkahimong misyonero.”

Dili tanan sa ika-77ng klase sa Gilead gimatuto sa mga ginikanan kinsa nagdasig kanila sa pagkahimong bug-os panahong mga magwawali, labi na sa pagkahimong misyonero. Ang uban, sama kang Mark Noumair ug Mark Brandon, nakadangat sa pag-apresyar sa Kristohanong ministeryo nga walay sayo nga pagpaluyo sa pamilya. Ang duruha miingon nga ang mga programa sa kombensiyon sa Watchtower Society ang nakapukaw sa ilang interes sa misyonerong buluhaton. Ang uban, sama kang Tracy Berkeley ug Larisa Krysuik, naimpluwensiyahan sa masibotong mga kauban sa kongregasyon. Sa matin-aw, walay usa ka tinong butang ang kapasikaran sa kadasig sa ika-77ng klase sa misyonerong buluhaton. Sa yano ilang gimahal ang ministeryo ug mainandamon sa pag-adto sa kinatumyang bahin sa yuta sa pagtabang sa ilang isigkatawo.

Miingon si Andrew Reed, “Daghan, daghan ang nagtinguha sa pagbuhat sa among gibuhat. Apan tungod sa panuigon, sa pamilya o sa uban pang makataronganong mga rason, dili sila makaarang sa pagkahimong mga misyonero.” Apan makahimo ang mga estudyante sa ika77ng klase. Sila misanong sa pagdapit. Samtang dawaton niining 37 ka estudyante ang ilang mga asaynment sa 13 ka nagkalainlaing mga kayutaan, masaligon kami nga panalanginan ni Jehova ang ilang paningkamot.

[Kahon sa panid 17]

PANAGWAY SA KLASE

Total nga numero sa mga estudyante ․․․․․․․․․․․․․․․․․ 37

Numero sa mga nasod nga gihawasan ․․․․․․․․․․․․․․․․․․ 7

Numero sa mga nasod nga giasayn ․․․․․․․․․․․․․․․․․․․․ 13

Numero sa ulitawong Igsoon ․․․․․․․․․․․․․․․․․․․․․․․․․․․․ 7

Numero sa dalagang Igsoon ․․․․․․․․․․․․․․․․․․․․․․․․․․․․ 6

Numero sa magtiayon ․․․․․․․․․․․․․․․․․․․․․․․․․․․․․․․․․ 12

Aberids nga edad ․․․․․․․․․․․․․․․․․․․․․․․․․․․․․․․․․․․․ 30.9

Aberids nga katuigan sa pagbawtismo ․․․․․․․․․․․․․․․․․ 13.9

Aberids nga katuigan sa bug-os panahong pag-alagad ․․ 8.7

[Letrato sa panid 16]

Watchtower Bible School of Gilead Ika-77ng Klase—Septiyembre 1984

Sa lista sa ubos, ang mga lumbay ginumerohan sa atubang palikod ug ang mga ngalan gilista gikan sa wala patuo diha sa matag lumbay

(1) Joe, L.; Noumair, P.; Simms, M.; McCaslin, R.; Berkeley, T.; Sahuque, B. (2) Enns, K.; Medley, K.; Brandon, D.; Reed, M.; Sauvageau, S.; Näslund, M.; Krysuik, D. (3) Porter, J.; Deering, D.; Magnusson, K.; McCaslin, R.; Thomas, A.; Noumair, M.; Pole, H; Krysuik, L. (4) Worcester, P.; Worcester, P.; Medley, T.; Thompson, S.; Woodson, A.; Pole, N.; Brandon, M.; Turner, M. (5) van Bussel, H.; Sauvageau, C.; Berkeley, M.; Reed, A.; Thompson, K.; Deering, J.; Rogers, S.; Berry, E.