Sosyal nga Ministeryo—Sa Unsang Paagi Kini Nagaapektar sa Katawhan
NAGSUGOD sa lima lamang ka tinapay ug duha ka gamayng isda, milagrosong gipakaon ni Jesu-Kristo ang kapin sa 5,000 ka lalaki, babaye, ug kabataan dihang hapit na ang Paskua (Marso-Abril) sa 32 K.P. (Mateo 14:14-21; Juan 6:1-13) Nakamatikod sa dakong potensiyal nga nahuptan ni Jesus, gusto ang mga tawo nga himoon siya nga ilang hari. Tingali mibati sila nga siya makaluwas kanila gikan sa yugo sa Romano ug sa pagpauswag sa ilang kahimtang sa kinabuhi. Unsay gihimo ni Jesus?
Inay sundon ang pangayo sa kadaghanang tawo, si Jesus “mipahilit pag-usab nga nag-inusara ngadto sa bukid.” (Juan 6:15) Apan wala mohunong dinhi ang panon sa katawhan. Miadto na usab sila kaniya sa pagkasunod adlaw. Nakamatikod sa ilang motibo, si Jesus miingon kanila: “Kamo nangita kanako, dili tungod kay kamo nakakitag milagro, kondili kay kamo nakakaon ug nangabusog.” Dayon siya midugang: “Ayaw ninyo paghagoi ang kalan-on nga mawagtang ra, kondili mao hinooy hagoi ninyo kanang kalan-on nga molungtad ngadto sa kinabuhing dayon.”—Juan 6:25-27.
Unsay atong nakat-onan gikan niining maong asoy? Lakip sa ubang mga butang, kini dayag nga nagpakita nga kon may makuhang materyal nga mga kaayohan kini dali kaayong makadanig tawo. Apan, ang pagtukod ug tinuod nga pagpabili sa espirituwal nga mga butang—mga butang nga may malungtarong bili—lahi kaayo. Karon, mas dako pa ang tendensiya sa pagtan-aw sa mga butang gikan sa bug-os materyalistikong hunahuna.
Madanihon Kaayo ang Sosyal nga Ministeryo
Sa mga mata sa mga tawo sa nagakaugmad nga kanasoran, ang modernong kanasoran sa Kasadpan naghawas sa tanang mga higayon ug materyal nga mga kaayohan nga gusto sa tawo—mga opurtunidad nga dili mabatonan sa ilang kaugalingong nasod. Gikasinahan ang kauswagan, ginasundog ang paagi sa kinabuhi. Ang higayon sa hataas nga edukasyon gibutang kanunay sa atubangan sa matag estudyante ingong pasaporte sa kauswagan ug kalamposan. Batok sa maong palibot dili lisod sabton kon nganong ang sosyal nga mga programa sa langyawng mga simbahan madanihon kaayo niining mga nasora. Apan unsa ang mga resulta?
Sa Oryente, pananglitan, ang pagkamainandamon sa mga tawo sa pagbuhat sa bisan unsang butang nga ginapangayo sa iglesya aron makadawat sa mga gasa ug mga hinabang nakabangon sa mangil-ad nga ngalang “rice Christians” o Kristohanon lamang kon may madawat nga materyal nga kaayohan. Siyempre, ang labing makasubong bahin, mao nga kon ang maong hinabang ug sustento mohunong, mohunong usab ang interes sa katawhan. Ang kadaghanan sa mga rice Christian nangawagtang lamang gikan sa esena. Busa, taliwala sa mga taga Canton, adunay popular nga panultihon nga daw maingon-ingon niinig kahulogan: “Gihigugma sa Diyos ang kalibotan, apan gihigugma sa kalibotan ang pinulbos nga gatas.”
Bisag ug ang kadaghanang mga grupo sa iglesya wala na magpalakaw ug mga progr
ama sa hinabang, gawas lamang kon may katalagman, ang nahimo sa nangagi nakabilin ug lama. Alang sa kadaghanang mga taga Oryente, ang mga simbahan kaamgid sa mga organisasyong tighatag ug mga hinabang, ug ang rason lamang sa pag-adto sa simbahan mao ang pagkuha, dili paghatag. Wala silay nakitang panginahanglan sa paghimog personal nga pagsakripisyo alang sa iglesya. Kining kaisipana, gipakita, pananglitan, diha sa ilang pagpanuko sa pag-amot alang sa basahon sa Bibliya tungod kay, diha sa ilang mga hunahuna, libre ang mga butang nga ginahimo sa iglesya.
Migamit sa iglesya ingong kasangkapan sa usa ka tuyo makita dayon diha sa natad sa edukasyon. Diha sa daghang nagakaugmad nga kanasoran, ang pagbaton ug estilog Kasadpang edukasyon giisip nga seguradong paagi sa pagbaton ug kadungganan ug kalamposan. Sumala sa usa ka tuboran, sa panahon nga gihatagan ang India ug kagawasan gikan sa Britanya, 85 porsiento sa mga sakop sa parliamento niadtong nasora nakatungha sa “Kristohanong mga eskuylahan.” Ug, sumala sa mga mithi ni Confucius, diha sa Halayong Sidlakan, ang pagkahimong edukado mao ang usa sa labing hataas nga tumong sa kinabuhi. Siyempre, daghan ang nagalantaw sa mga eskuylahan sa iglesya, nga sa kinatibuk-an nagagamit ug mga paagi ug sukdanan sa Kasadpan, ingong kasangkapan sa pagpauswag sa kaugalingon. Ug, nagalaom nga makatungha ang ilang mga anak sa usa sa gipalakaw sa iglesyang mga eskuylahan ug tingali moadto sa laing nasod sa ulahi, daghang mga taga Oryenteng mga ginikanan nga sa naandan mosunod sa tradisyonal nga mga relihiyon malipay sa pag-adto sa simbahan mismo ug nag-aghat sa ilang mga anak sa pagbuhat usab sa ingon.
Unsa ang Bunga?
Kon itandi sa mga iglesya sa kaugalingong nasod, ang mga iglesya sa misyon sagad daghag tumatambong. Busa daghang mga tawo napailaila sa mga pagtulon-an sa iglesya ug sa pipila ka ideya sa Kristiyanidad. Apan kining bang maong pagkaladlad nakatabang kanila sa pagsabot sa Bibliya ug sa balita niini? Kini ba tinuod nga nakahimo kanilang mga Kristohanon, sa ato pa, mga sumusunod ni Jesu-Kristo?
Tagda, pananglitan, si Kuo Tung, ang batan-ong lalaki nga gihisgotan sa sinugdan. Dihang gipangutana kon nagtuo na siya karon ug Diyos tapos nga nakatambong sa simbahan sa dugaydugay nang panahon, siya mitubag: “Wala. Ang pamatuod nga naglungtad ang Diyos wala gayod hisgoti.” Sa pagkatinuod, siya miadmiter nga dili siya segurado kon may higala ba siyang nagtuog usa ka personal nga Diyos, bisan pag sila tigtambong uban kaniya sa simbahan. Sila miuban aron makakat-on ug Iningles, siya miingon.
Laing batan-ong lalaki mipauli aron sa pagbakasyon gikan sa kolehiyo sa Tinipong Bansa. Dihang giduaw siya sa usa sa mga Saksi ni Jehova, siya nangutana kon Iningles ba ang gigamit sa mga Saksi sa ilang mga tigom. Ngano? “Aron mapauswag ko ang akong Iningles,” matud pa niya. Dihang gisultihan siya nga lokal nga pinulongan ang gigamit sa mga tigom aron ang tanan makapahimulos sa espirituwal nga paagi, ang batan-ong lalaki miingon nga motambong siya sa dapit nga Iningles ang mga tigom nga ginahimo makaduha sa usa ka semana.
Bisan gani kadtong nangahimong mga sakop sa iglesya ug gibawtismohan nagpakitag gamayng kausaban sa ilang panglantaw. Ang kadaghanan kanila nagpabilin gihapon sa ilang gituohan ug batasan kanhi, nga sa kasagaran sa pag-uyon, kon dili man panalangin usab, sa ilang iglesya. Sa Tsina, pananglitan, ang mga Romano Katoliko gitugotan sa pagpadayon sa ilang pagsimbag mga ginikanan, apan kini gidili sa ubang dapit. Ang plaka nga nangayo sa panalangin sa diyos sa pultahan kasagarang makita sa mga pultahan sa “Kristohanon” nga mga balay. Ug sa Okinawa, ang larawan sa hayop sa lumad nga mga diyosdiyos ginabutang sa mga eskina sa atop sa pagpanalipod sa pamilya.
Komusta kadtong nakapahimulos gikan sa mga programa sa iglesya? Sa ilang bag-ong-napalgang pinansiyal ug materyal nga kasegurohan, dili tagsaong makadungog ka nilang moingon nga ang tubag sa mga problema karon mao ang pagsalig sa kaugalingon. Ang resulta mao nga daghan kanila bug-os nga nagpabulag gikan sa bisan unsang kalangkitan sa iglesya, o labing menos, nagpahilayo sila.
Ang mga misyonero sa mga iglesya adunay daghang maayong mga higayon sa pagtudlo sa mga tawo mahitungod sa gitudlo sa Bibliya. Apan inay tudloan sila sa pagsunod sa tambag ni Jesus nga “padayon sa pagpangita pag-una sa gingharian ug sa iyang pagkamatarong, ug kining ubang mga butang igadugang ra kaninyo,” ilang gihatagag pasiugda ang “ubang mga butang.” (Mateo 6:33) Pinaagi sa ilang sosyal nga mga programa, dako silag nahimo sa pagtabang sa mga tawo sa pisikal, medikal, ug edukasyon nga paagi, apan ang pangunang mga kaayohan umalagi lamang. Wala magtaganag espirituwal nga panglantaw, sa masubsob kining mga programaha nahimo lamang padasig sa pagpaningkamot sa temporaryo, kun kalibotanon, nga mga bentaha.
Ang mga iglesya misugod sa pagwali sa ebanghelyo. Apan ang miresulta, diha sa kadaghanang mga kahimtang, mao ang pagpasiugda sa Kasadpanhon, materyalistikong paagi sa kinabuhi. Oo, sila nakakuhag daghang mga kinabig. Apan sumala sa atong nakita, daghan kanila mas nahimo pang kalibotanon ug materyalistiko. Sa mga adlaw ni Jesus, siya mipahayag mahitungod sa relihiyosong mga lider: “Gilataslatas ninyo ang kadagatan ug kayutaan aron sa pagdanig bisan usa na lang ka kinabig, ug sa makabig na siya inyo siyang ginahimo nga doble pa kaninyo sa pagkaangayan sa Gehenna.” (Mateo 23:15) Niini nga diwa, ang paningkamot sa Kakristiyanohan sa pagwali sa ebanghelyo pinaagi sa sosyal nga paningkamot misumbalik. Nagkulang kini sa dakong sugo nga gihatag ni Jesu-Kristo: “Busa panglakaw kamo ug himoa ninyong mga tinun-an ang tanang kanasoran, . . . sa pagtudlo kanila sa pagtuman sa mga butang nga akong gisugo kaninyo.”—Mateo 28:19, 20.