Gikan sa Among mga Magbabasa
Pagtan-awg Telebisyon
Buot kong pasalamatan kamo sa artikulong “Mga Batan-on Nangutana . . . Sa Unsang Paagi Makahunong Ako sa Sobrang Pagtan-awg TV?” (Hulyo 22, 1985 sa Cebuano) Ako 14 anyos, ug ako maoy TV-aholic. Nagatan-aw akog TV unom ka oras sa usa ka adlaw. Apan human nako mabasa ang inyong artikulo, akong gihukom ang pagkunhod niana kay kana mipugong kanako sa paghimo sa akong homwork ug sa akong pagbasag Bibliya. Salamat na usab.
M. L., Canada
Imong Tingog
Ang akong tingog makapapikal sukad pa sa sinugdan. Ang usa ka operasyong gihimo tulo ka tuig nga miagi sa akong kuwerdas bokales mipatunghag diyutay rang resulta. Kanunay akong sultihang kinahanglang akong buhaton ang lalom nga pagginhawa, apan walay mipatin-aw kanako unsaon pagbuhat niana. Ang maayong artikulong “Kanang Kahibulongang Gasa—Imong Tingog” (Enero 22, 1985 sa Cebuano) mao ang tubag sa akong mga pag-ampo. Karon akong nasabtan sa unsang paagi nagaobra ang akong sistema respiratoryo ug kon unsay pagabuhaton aron moarang-arang ang akong tingog.
M. L. S., Brazil
Usa ka Batang Wala pa Matawo
“Namabdos ako ug gidawat ko lang ang kamatuorang walay kapaingnan gawas ang pagpanganak sa normal nga paagi. Gibasolan ko pa nga ako namabdos. Karong adlawa mihilak ako. Atimanon ko ang bata sa akong tiyan ug magmalipayon nga ipanganak kana. Salamat kaayo.” Kini ang mga pulong sa usa ka batan-ong inahang miduol kanako sa pagkatapos sa akong lektura sa unibersidad. Akong gibasa ang “Talaadlawan sa Usa ka Batang Wala pa Matawo” (Disyembre 22, 1984 sa Cebuano) panahon sa lektura. Natandog ako kaayo sa maong ugdang nga artikulo ug nagapasalamat ako niana. Sukad kana migula akong naggamit kana sa publikong mga dapit sa daghang beses nga dili ko na maihap.
H. W., Hapon
Relihiyosong Pagkamatinugoton
Buot kong pasalamatan kamo sa inyong nagkadaiya, maayong-pagkapili, ug makapalig-ong mga artikulo. Ingong maestra ug inahan, naangayan ko ilabina ang “Mga Batan-on Nangutana . . . ” nga serye. Ang inyong siyentipikanhong mga artikulo nagatagana usab sa makaiikag nga impormasyong dili ako magpanuko sa pagpasa ngadto sa akong mga estudyante, kay natino kong ang inyong mga artikulo dili madapigon ug matinud-anon. Ang butang lamang nga nakapapikal kanakog diyutay (bisan tuod akong nasabtan ang inyong mga katarongan) mao ang paagi sa inyong kanunayng pagdaot sa ubang relihiyon. Bisan tuod ako dili Katoliko ni Budhista, gil-asan ako sa maong mga artikulo ug gilikayan kana sila.
F. S., Pransiya
Kami nagasulay pagsunod sa panig-ingnan ni Jesus. Miingon siyang ang dalan sa kinabuhi maoy agi sa sigpit nga ganghaan ug giawhag ang iyang mga tinun-an sa paglikay sa haluag nga dalan ngadto sa kalaglagan. Giyagyag niya ang mga matang sa relihiyon nga makawang, ug kana sa klarong mga pulong, sumala sa tin-awng giilustrar sa Mateo kapitulo 23. Kami, kay gidasig sa tinuod nga interes sa kaayohan sa tanang tawo, nagasulay sa pagpunting sa relihiyosong mga buhat nga supak sa pagtulon-an sa Bibliya ug magapugong sa nagabuhat nianang mga butang sa pagsubay sa dalan sa kinabuhing walay kataposan. (Mateo 7:13, 14; 15:8, 9; 16:6, 12) Sa tabang sa Bibliya, gisulayan namo ang pagsunod sa panig-ingnan ni apostol Pablo, kinsa misulat: “Among gibalit-ad ang mga pangatarongan ug tanang binayaw nga butang nga gipatindog batok sa kahibalo sa Diyos.”—2 Corinto 10:5.—ED.