Misyonaryong Tunghaan sa Gilead—‘Pagpangandam sa Among mga Tikang’

SILA naggikan sa unom ka nagkalainlaing nasod ug sa nagkadaiyang mga kagikan. Apil kanila mao ang kanhi mga panday, inhenyero, maestro, komersiyal nga mga magdidibuho, mga musikero, mga drayber sa trak, ug bisan usa ka tubero. Apan, sila usa rag tumong: ang pagwali sa “maayong balita sa gingharian” sa langyawng yuta.​—Mateo 24:14.

Kining tumonga nagtigom kanila alang sa lima ka bulang mabug-osong pagtuon sa Bibliya ug pagbansay sa Watchtower Bible School of Gilead nga nahimutang sa Brooklyn, New York. Ug ang ilang pagtungha natapos sa maanindot nga programa sa graduwasyon niadtong Marso 3, 1985.

Ang pagbiya sa ilang naandang pagkinabuhi diha sa ilang mga yutang-natawhan aron sa pagwali sa “maayong balita” ngadto sa katawhan sa langyawng kayutaan dayag nagkinahanglag dagkong mga pagpasibo. Handurawa ang pipila sa mga sakripisyong ginahimo niining umaabot nga mga misyonaryo: pagbiya sa pamilya ug mga higala, pagtuon sa usa ka bag-ong pinulongan, ug pagkaanad sa usa ka bag-ong nasod, usa ka bag-ong panimalay, ug nagkalainlaing mga kalan-on. Dili gayod gagmayng kausaban!

Apan ang lima ka bulang instruksiyon magasangkap ba kanila alang sa maong kalit nga pagbalhin sa paagi sa kinabuhi? Unsay hunahuna sa mga estudyante bahin niana?

“Andam na nga Moadto”

Si Cindy, nga giasayn uban sa iyang bana ngadto sa Zaire, Africa, mibating siya labawng andam karon kay sukad masukad. “Buot ko gayod nga mahimong misyonaryo sukad sa akong pagkabata. Human sa pagkauban sa ubang estudyante sa lima ka bulan, ako andam na gayod moadto.” Si David ug Charmaine, nga giasayn sa Ecuador, susamang mipahayag, “Among gibati nga karon kami labi pang makapahiuyon sa nagkalainlaing mga kostumbre ug paagi sa kinabuhi diha sa among asaynment.”

Hinuon, ang pagbansay gilaraw ilabina uban niini sa hunahuna. Ang kurikulum nagaapil sa (1) upat ka kurso sa pagtuon sa Kasulatan nga nagakobre sa tibuok Bibliya, kapitulo por kapitulo, (2) usa ka kurso nga nag-ulohang Teokratikanhong Organisasyon, ug (3) usa ka kursong gitawag Misyonaryong Pag-alagad.

Ang Misyonaryong Pag-alagad maoy praktikal nga kurso sa kon unsaon pag-isip ang usa ka langyawng asaynment sa matinud-anong paagi. Usa ka estudyante, si Glen, miingon: “Among nakitang ang Misyonaryong Pag-alagad nga kurso ilabinang makatabang. Kadto balikbalik nagpasusi sa akong tuyo ug nagpasukna sa akong kaugalingon, ‘Nganong ako ania dinhi?’” Siya ug ang iyang asawa, si Gaylene, karon mibating kuwalipikado alang sa ilang asaynment sa Papua New Guinea.

Ang laing estudyante, si Pam, miapresyar kon unsa ka praktikal ang mga instruktor. “Gitabangan nila ako sa pagsabot nga bisan diin kami maasayn, kini malahi kaayo sa kaugalingong pinuy-anan.” Ang Saipan, usa ka gamay kaayong isla sa kasadpang Pasipiko, mao unya ang bag-ong pinuy-anan alang kang Pam ug sa iyang banang si Peter.

Si Gordon nakagugol sa milabayng 12 anyos sa hedkuwarter sa kalibotan sa mga Saksi ni Jehova sa Brooklyn ug nakakitag daghang misyonaryo nga gipadala gikan sa Tunghaan sa Gilead. Karon siya, usab, nakapahimulos sa pagbansay sa Gilead ug moalagad ingong misyonaryo sa Hong Kong. Gibati ba niyang ang Gilead nagkondisyon niya pag-ayo alang sa iyang bag-ong asaynment? “Ang praktikal nga mga bahin sa misyonaryong kinabuhi nga gipasiugda sa tibuok kurso mibulig kanako sa paglantaw niining matinud-anon,” mitubag si Gordon. “Ang pagkahibalo kon unsay pagadahomon maoy dakong tabang.”

Pagdawat sa Ilang mga Asaynment

Sa tungatunga na lamang sa lima ka bulan nga kurso, sa buntag sa Enero 3, 1985, nga nahibaloan sa ika-78 nga klase kon unsa ang ilang langyawng mga asaynment. Sa sinugdan, ang palaaboton sa pag-adto sa lagyong mga kayutaan nakapabalaka sa pipila kanila. ‘Unsa kaha kana ka layo gikan sa akong pamilya? Makaatubang kaha ako sa laing katawhan, mga kostumbre, ug mga pagkaon? Unsa ka dugay ang pagbatog bag-ong mga higala?’

Bisan pa niana, ang maong mga pangutana sa wala madugay nahanaw sa ilang mga hunahuna samtang ilang gipalandong kon unsa nay nahimo ni Jehova sa pag-andam kanila. Tapos sa pagdawat sa balita nga siya moadto sa Dominican Republic, kini ang gibati ni Sharon: “Gipasalamatan ko si Jehova tungod sa pag-isip kanako nga matinumanon alang niining maong asaynment. Ako tua unya sa maanindot ug makapahagit nga teritoryo.” Si Ed ug Lynda mahimong mga misyonaryo sa Zaire, Africa. Sila determinado kaayo sa paghimo sa ilang asaynment nga ilang pinuy-anan nga mipatugbaw sila: “Kon sultihan kami nga dili kami makaadto sa Zaire, kami molingkod ug mohilak, sanglit ang among mga kasingkasing tua na didto!”

Ngadto sa Kanataran

Sa pagpanglantaw sa unahan, si Wolfgang mipahayag kon unsa gayoy gibati niya ug sa iyang mga kasaring: “Kombinsido ako nga kaming tanan nakasabot sa kahinungdanon sa among tumong​—ang pagwali sa maayong balita sa Gingharian sa Diyos nga walay pagtalikod sa among mga asaynment ug pagbuhat nga nahiusa sa among mga igsoon sa mga kongregasyon alang sa kauswagan sa Gingharian.” Si Virginia, kinsa mouban sa iyang bana si Tim ngadto sa Africa, midugang: “Ang bugtong pagbansay nga nahibilin alang kanamo mao ang aktuwal nga kasinatian.”

Apan ang beterano bang mga misyonaryo mibating ang pagbansay nga nadawat sa Tunghaang Gilead nakahatag kanilag mga kaayohan sa aktuwal nga pagbuhat? Ang usa ka kanhing graduwado, si Kathryn, kinsa nag-alagad sa pila ka tuig sa kalasangan sa Papua New Guinea uban sa iyang bana, usa ka nagapanawng ministro, mipatin-aw: “Ang halalom nga pagtuon kinahanglag diyutayng pagmaneobra, kay kinahanglang hikayon namo ang paggugol ug panahon sa dapit diin ang usa may librarya. Kami maningkamot gayod pag-ayo sa among pagtuon sa The Watchtower.a Gipasabot gayod kanamo sa Gilead unsa ka dako ang among matun-an gikan sa matag isyu.”

Pinaagi sa edukasyong ginahatag sa Tunghaan sa Gilead, ikaingong ‘pinaagi ni Jehova ang mga tikang gayod niining kusgang mga lalaki ug mga babaye giandam.’ Oo, sila andam mohimo sa dakong kausaban sa paagi sa kinabuhi, ug sila andam sa pagdala sa mohatag-kinabuhing mensahe sa Bibliya ngadto sa kinatumyan sa yuta.​—Salmo 37:23.

Impormasyon Bahin sa Ika-78 nga Klase

Gidaghanon sa mga estudyante ___________ 42

Gidaghanon sa nasod nga gihawasan ___________ 6

Gidaghanon sa nasod nga giasaynan ___________ 14

Gidaghanon sa dalaga ___________ 4

Gidaghanon sa ulitawo ___________ 8

Gidaghanon sa magtiayon ___________ 15

Aberids nga edad ___________ 32.

Aberids nga mga tuig sa pagkabawtismado ___________ 14.2

Aberids nga mga tuig sa bug-os-panahong

ministeryo ___________ 9.9

[Mga footnote]

[Letrato sa panid 26]

Ikakapitoag-walong Klase sa Watchtower Bible School of Gilead

Sa listahan sa ubos, ang mga lumbay ginumerohan gikan sa atubang palikod, ug ang mga ngalan gilista gikan sa wala patuo sa matag lumbay.

1–Donaldson, C.; Savoniemi, I.; Van Loo, R.; Ross, G.; Kenyon, L.; Loucks, C.; Mickelson, C.; Koch, M. 2– Wortley, L.; Wondratsch, W.; Seneca, P.; Gleaves, C.; Sierra, N.; Gracia, Y.; Gracia, J.; Crouch, V. 3– Seneca, P.; Hobson, C.; Ellis, G.; Grant, G.; Fields, L.; Norman, S.; Thompson, S.; Singleton, C. 4– Savoniemi, H.; Gleaves, Jr., K.; Koch, F.; Steiner, M.; Crouch, T.; Donaldson, R.; Björck, M.; Mathewson, F.; Kenyon, E. 5– Fields, D.; Björck, R.; Loucks, D.; Ross, G.; Hobson, G.; Van Loo, F.; Mundt, B.; Mickelson, C.; Sensenig, T.