Gikan sa Among mga Magbabasa

Mga Batan-on Nangutana . . .

Ako diyes anyos ug buot magpasalamat kaninyo sa inyong mga artikulong “Mga Batan-on Nangutana . . . ” Gitudloan ako niini sa pagkahimong timbang kon bahin sa pagtan-awg TV, sa paghimo sa akong homwork ug sa buluhaton sa balay, ug kon unsaon sa pagdani sa pagtahod sa akong mga ginikanan pinaagi sa pagsunod kanila.

M. F., Ohio

Inahan ako nga may upat ka anak ug tinuod gayod nga nagapabili sa inyong mga artikulong “Mga Batan-on Nangutana . . . ” Nakatabang kini sa pagpatunghag regular nga mga punto nga ka hisgotan aron sa pakigkomunikar sa tanan nakong mga bata, gikan sa 14-anyos ngadto sa 3-anyos. Nagpasalamat ako sa tabang nga gikinahanglan namong mga ginikanan.

L. W., Iowa

Pagkaplag Kalipay

Ang inyong gula bahin sa “Kalipay” (Agosto 22, 1985) nakaaghat kanako sa pagsulat ug sa pagsulti “Salamat Kaninyo!” Gipadayag sa mga pulong niining mga artikuloha ang akong gibati sa wala pa makakat-on sa mga kamatuoran sa Bibliya. Malipayon ako apan nakaamgo nga ang kinabuhi aduna gayoy kahulogan. Gimahal ko ang kalalangan apan wala gayod makaila sa Maglalalang, ug akong naamgohan kon unsa ang nakulang. Karon gipabilhan ko ang akong relasyon uban sa Maglalalang, si Jehova nga Diyos, ug mibatig kalipay bahin niini.

C. R., Inglaterra

Gisurender ang Kadungganan

Sa nagrepaso sa akong mga magasing Pagmata! sa 1984, nakadayeg ako sa bahanding impormasyon nga nagaunod kanila. Ilabinang naikag ako sa mga eksperyensiya sa taga Lebanon nga magdudulag basketbol (Hulyo 22, 1984, “Napulog-usa ka Tuig sa Pagpangitag Tinuod nga Bahandi”) ug sa taga Uruguay nga gitarista sa konsiyerto (Mayo 8, 1985, “Ang Akong Sista, Akong Musika ug ang Akong Diyos”) si kinsa, human nga ‘naangkon ang tibuok kalibotan,’ milampos sa pagdaog niana ug, sama kang Moises sa karaan, mipili nga mahimong bahin sa mapaubsanong mga tawo sa Diyos imbes sa pagpahimulos sa “mga bahandi sa Ehipto.” (Mateo 16:26; Hebreohanon 11:25, 26) Hinaot nga panalangin sa Diyos ang mga tawo nga nagasalikway sa kadungganan ug nangita pag-una sa Gingharian.

S. R. Z., Brazil

Mga Interbiyo sa Trabaho

Di pa dugay mipirma akog kontrata sa trabaho ingong aprentis. Sa miaging tinghunlak misugod ako sa pagsulat sa paghangyo alang sa maong posisyon. Makadaghan na akong gibalibaran sa uban human sa interbiyo. Dayon akong nahinumdoman ang artikulo sa “Pagmata!” nga nag-ulohang “Mga Batan-on Nangutana . . . Unsaon Ko Pag-atubang ang Interbiyo sa Trabaho?” (Hulyo 8, 1983) Akong gisunod ang mga sugyot nga gihatag, ug handurawa lang ang akong kalipay sa gidapit ako sa interbiyo! Maayo kaayo ang resulta niini. Akong namatikdan usab nga, sa katibuk-an, wala kaayoy pagtagad ang tawo sa ilang panagway, kay ako lamang usa sa upat ka dalaga nga nagsul-ob ug sayal. Gisulayan nako pagpadapat ang tanang gilista sa panid 20, lakip sa kataposang punto, sa pagpadala ug mubong sulat sa pasalamat human sa interbiyo. Nagtuo ako nga nakatabang kadto sa akong pagkakuha sa duha ka bakanteng trabaho ingong aprentis.

S. R., Federal Republic of Germany

Komunikasyon sa Pamilya

Nawili kaayo ako sa artikulo bahin sa “Komunikasyon sa Pamilya—Nganong Nadaot?” (Hunyo 8, 1986) Ilabina ang punto bahin sa TV, videotape recorders, ug mga dula sa video nga nakakuha sa atong panahon sa pakig-estoryahay sa mga sakop sa pamilya. Sa pagkasayod niini pasagdan nakong palong ang telebisyon kon magkatigom kaming tanan, pananglitan, sa pangaon.

C. O., Inglaterra