Gikan sa Among mga Magbabasa
Tambal Alang sa mga Paso
Nagsulat ako bahin sa inyong mga artikulo mahitungod sa mga paso. (Marso 22, 1980; Abril 22, 1980 sa Ingles) Sa miaging mga bulan, samtang giinit ko ang manteka, ang mga tubig nga miporma tungod sa kondensasyon mitulo sa kalaha. Mipisik ang nagbukal nga manteka sa akong nawong ug naigo usab ang akong bukton ug abaga. Nakahihumdom sa mga sugyot sa inyong mga artikulo, midalidali ako sa pagkaligog bugnawng tubig. Bisag dili na kaayo hapdos, nanghup-ak ang akong panit, busa miadto ako sa kinaduolang ospital. Gihunaran sa mga nars ang mga paso ug gipatungag pabugnaw sa tibuok gabii ug sa pagkasunod adlaw. Sanglit grabe-grabe ang akong pagkapaso, nahadlok akong madaot ang akong panagway. Apan sa usa lamang ka semana, maayo kaayo ang resulta nga bisan gani ang mga trabahante sa ospital wala makaila kanako. Karon usa na ka bulang milabay, gamayng lama na lamang sa pagpamula sa akong agtang ug sa akong kilay ang makita. Daghan na kaayog nakat-onan ang akong pamilya gikan sa Pagmata!, apan ang akong kasinatian nakaagda kanamo sa paghatag dugang pagtagad, kay ang ‘panahon ug ang dili mahibaloang mga hitabo moabot kanatong tanan.’
G.J., Pransiya
Okultismo
Buot ko lang ipahayag ang akong pasalamat sa inyong artikulong “Imong Labing Daotang Kaaway—Kinsa Siya?” (Nobyembre 8, 1984) Mipalit akog daghang libro bahin sa okultismo tungod kay nawili kaayo ako niana. Wala gayod ako magtuo nga kinahanglang likayan kini sa mga Kristohanon. Nakatabang ang inyong artikulo kanako sa pagsabot niining puntoha, busa mihukom ako sa pagsunog sa akong tanang mga libro bahin sa okultismo sama sa gihimo sa mga taga Efeso. Kon wala pa ang inyong artikulo, dili ko gayod unta makabaton ug kaisog sa pagpanalipod sa akong kaugalingon gikan sa Yawa.
E.M., Italya
Pagpukawg Interes sa Bibliya
Natandog kaayo ako sa presentasyon sa inyong isyu sa Disyembre 22, 1984. Kaniadto, wala akoy interes sa inyong mga publikasyon. Dili tungod sa akong relihiyon, Methodista ako, nga lahi sa inyo, apan akong nakita ang pagbasa sa Bibliya o sa ubang nalangkit nga mga materyal nga makalaay. Apan, karon, ang inyong magasin nakapukaw sa akong gana sa pagbasa sa Bibliya ug sa nalangkit nga basahon. Nasukip mao ang akong kontribusyon alang sa dugang nga basahon nga makausbaw sa akong batasan sa pagbasa sa Bibliya.
F.O., Nigeria
Sa Mosulti ang Kuwarta
Buot ko lang magpasalamat kaninyo sa artikulong “Sa Mosulti ang Kuwarta.” (Agosto 22, 1985) Karong mga adlaw sa kalisod sa ekonomiya, nakabaton akog bililhong mga timan-anan kon unsaon sa pagdaginot ug sa paggasto sa kuwarta nga maalamon. Nakakat-on akog pagtulon-an gikan sa panultihon: “Kon himoon nimo ang kuwarta nga imong pangunang tumong sa kinabuhi, peligroso kini.” Kining artikulo dako kaayog natabang kanako.
R.G., Pilipinas
Pagpukgo sa Pagkamapihigon
Buot ko lang magpasalamat kaninyo sa inyong artikulong “Pagkamapihigon Mahimong Pukgoon!” (Marso 8, 1985) Tapos sa unang artikulo naikag ako. Nagamit nako ang materyal niadtong isyuha ingong pasukaranan sa panaghisgot sa ulohan diha sa tunghaan. Ang mga hunahuna nga gipahayag sa artikulo dakog natabang sa paghimong malamposon sa buluhaton sa tunghaan.
P.P., Austria