Gikan sa Among mga Magbabasa

Tabang sa Kasubo

Aron matabangan ang grabeng kasubo sa akong bana nga miresulta ug mga away sa pamilya, ako ug ang akong bana miadto sa espesyal nga terapiya sa usa ka sikolohista. Sulod sa unom ka bulan sa pagpatambal, among ginasusi ang tambag nga gihatag diha sa Pebrero 8, ug sa Abril 22, 1982, nga mga gula sa “Pagmata!“ Among nakita nga ang kadaghanan niining tambaga nga among gibayran anaa na niining mga magasina nga walay bayad, apan nagpamatuod kini nga ang propesyonal nga tambag nga among nadawat maayo. Dayon akong gibasa ang Hunyo 8, 1986, mahitungod sa “Kalinaw sa Pamilya.” Naghunahuna ako, ‘Ang nasulod sa panid ning magasina mokantidad ug $2,000.’ Kanang magasina angay nga basahon sa tanang magtiayon ug bisan sa nagplanong magminyo.

C. S., Missouri

Nagtrabaho sa Bakasyon

Buot ko lang ipadangat kaninyo ang dakong pasalamat sa artikulong “Would You Take a Working Vacation?” (Pebrero 8, 1986) Makadasig ang pagbasa sa pagtuo ug espiritu sa pagsakripisyo sa kaugalingon ning mga boluntaryoha sa tibuok nasod. Apan, nasubo ako sa inyong kapakyasan sa wala paghisgot sa espiritu sa pagsakripisyo sa kaugalingon sa ilang mga asawa ug mga anak. Sila sa walay duhaduha sa bug-os kasingkasing mipaluyo sa desisyon sa ilang bana ug amahan sa pagtrabaho didto sa panahon sa ilang bakasyon, bisag nagkahulogan kini nga dili sila makapalabay nianang panahona uban sa ilang pamilya.

C. T., Massachusetts

Among gipaabot ang among mainitong ekspresyon sa pagpabili sa tanang mga asawa ug mga anak ning mga boluntaryong trabahante. Kon wala pa ang ilang bug-os kasingkasing nga pagpaluyo, imposible unta ang maong pagsakripisyo.—Ed.

Pauswaga ang Imong Pagbasa

Ako 15 anyos, ug dili gayod mawiling mobasa. Dayon akong nabasa ang inyong artikulo “Pauswaga ang Imong Pagbasa—Makahimo Ka Niana!” (Pebrero 8, 1986) Tapolan kaayo akong mobasa, apan karon akong gipabilhan nga tinuod makapatugob sa atong kinabuhi ang pagbasa.

C. A., Brazil

Bugnawng Tubig Alang sa mga Paso

Buot kaming magpasalamat sa impormasyon nga gihatag sa inyong artikulo “Butang nga Angay Nimong Masayran Bahin sa mga Paso.” (Oktobre 22, 1980) Ang akong anak nga babaye napaso sa mainit nga manteka diha sa iyang bukton ug nahupayan sa sakit pinaagi sa paghaklap diha sa bukton ug gidugmok nga yelo. Napaso ang akong asawa sa iyang bukton ug kamot gikan sa nagbukal nga tubig sa bacon, ug iya dayon kining gitambalan ug may yelong tubig. Ang taho ni Dr. Stephen R. Lewis nag-ingon nga pinaagi sa pagtambal ug tubig nga may yelo sagad makawala sa sakit sulod sa mga tulo ka oras. Sa nahitabo sa akong anak, miabot kinig 10 ka oras, ug gipadayon sa akong asawa ang maong pagtambal kapin sa 15 ka oras. Kinahanglang dili undangan dayon kon gamiton kining paagiha sa pagtambal. Sa duha ka hitabo, walay mga paslot ug walay suliran sa pag-ayo.

M. ug J. D., Wales

Kon Mosinggit ang mga Ginikanan

Salamat sa inyong artikulo “Mga Batan-on Nangutana . . . Unsay Akong Mahimo Kon Singgitan Ako sa Akong mga Ginikanan?” (Marso 22, 1986) Tagsaong artikulo kaayo kadto sa pagtabang kanato sa pagsabot sa atong mga ginikanan, mga bana, ug sa uban. Ang tanang mga artikulo nga akong nabasa nakahatag kanakog kaisog sa pagbuntog sa kadaotan sa atong palibot. Kon basahon lang kini sa tanan ug ipadapat ang gipamulong niini, ang kalibotan tinuod gayod nga mahimong paraiso.

M. S., Portugal