Ako Nagkinabuhi Alang sa Musika
ANG labing sayo sa mga butang akong madumdoman sa musika mobalik ngadto sa panahon sa akong lola. Matag Dominggo magtapok ang tibuok pamilya sa iyang balay alang sa salusalo. Tugtogon ang musika sa tibuok adlaw. May Irlandes nga mga awit sa banika, light opera, musika sa mga dula sa Broadway, ug ubang musika.
Dihang ako mga otso anyos na, mituon ako sa pagtugtog sa sista. Apan kay kulang man ang akong interes, sa wala madugay nahunong ang mga leksiyon. Bisan pa niana, niadtong panahona, inigkadungog ko sa pagbansay sa banda sa silinganan, mogilok ang akong lawas.
Sa sunod pila ka tuig, nagsugod ang akong pagkaikag sa musikang pop, duyog sa rock. Sama sa uban kong katalirongan, ang radyo kanunayng nagtokar. Dayon ako mituon na usab sa pagtugtog sa sista ug sa wala madugay ako mitugtog uban sa lokal nga mga banda. Misugod kami sa pagtugtog nga regular panahon sa mga bayle sa lokal nga parokya. Kasamtangan, mibalhin ako ngadto sa bass nga sista ug taudtaod namalit sa kasangkapang kauban niana.
Sulod nianang panahona mismo, may laing naugmad diha kanako. Nagsugod ako sa pagkasabot sa pagkasalingkapaw sa iglesya, kay kami nakigtransaksiyon sa lokal nga kura paroko nga nagsuhol kanamo alang sa mga bayle. Wala ako masayod nga kadto makatandog ug dako sa akong kinabuhi sa kaulahian.
Ang Silinganan
Sulod sa katuigang nagtugtog kamig rock ’n’ roll, kami nagsigeg biyahe. Ang daghang bar ug mga sayawanan sulod ug sa gawas sa Siyudad sa New York nakapapuliki kanamo sa pila ka katuigan, apan ang silinganan dili maayo. Daghan ang imoralidad, may libreng distribusyon sa mga droga, ug makapasubo kaayong palibot.
Naugmad namo ang pila ka magdadayeg nga nalangkoban sa junkies ug acidheads (mga giyanon sa heroin ug mga tiggamit sa LSD). Dili bililhon kanamo kon unsa sila. Nakaangay sila sa among musika ug among nagustohan ang ilang pagpaluyo. Akong mahinumdoman usa ka gabii dihang ang usa ka tawo midagan pagawas sa klab nga nagsiyagit ug kusog. Siya gibatig kalalim tungod sa LSD ug nagtan-aw kanamo nga bug-os naapektahan sa among musika, sa mental ug sa pisikal. Kadtong tanan nahimong sobra kaayo alang kaniya!
Bisan tuod kami nagkainila na ug nagsugod sa paghimog mga konsiyerto, ako misugod sa pagbatig kangil-ad nianang tanan. Ako wala gayod matagbaw sa pagkamusikero. Ug ang daotang mga bisyo alirong kanako misugod sa pag-apektar kanako, nga mitultol sa paggamit kog mga droga. Tungod niadtong tanan, ang akong kinabuhi nahimong sa mausbawon masulob-on ug magul-anon. Busa gisugdan ko ang pagpangita sa butang akong gibati maoy mas maayong matang sa musika. Maoy nianang panahona nga akong nadiskobrehan ang klasikal nga musika.
Pagpadayon sa Karera sa Musika
Sa gisugdan ko ang pagpamati sa klasikal nga musika, akong nadiskobrehan ang laing kalibotan. Sa nangagi, kami kanunay may kinalabwang pagtahod sa usa ka musikero sa jazz nga makaayom-ayom sa honi, apan ania ang usa nga makasulat usab sa iyang mga inayom-ayom. Sa samang panahon, kana iyang gipahiangay sa usa ka orkestra. Siya talagsaong musikero!
Niadto buot kong ipadayon kanang matanga sa musika. Busa misulod ako sa usa ka kolehiyo sa estado ug misugod sa pagtuon sa musika. Ang akong instrumento mao ang dobleng bass. Ako nagtuon sa pag-awit nga walay preparasyon, pag-awit sa usa ka koro, pagtuon sa harmoniya, ug pag-ugmad sa paninugdang mga teknik sa piano. Gibati ko nga ako sa kataposan nagsugod sa pagkat-on sa usa ka butang. Sa sunod pila ka tuig, gipadayon ko kining rutinaha.
Unya akong gihimo ang laing desisyon. Matuod, ako may pag-uswag apan gibati ko nga labaw pa ang akong mabuhat. Busa mihukom ako sa pagsulay pagsulod sa usa ka konserbatoryo. Apan nasayod ako pag-ayo nga dako kaayog kulang ang akong musikal nga kahibalo. Ako ulahing misugod. Niining natara sa musika, kadtong nagahimo niini nga karera sa linangkob “hungitan” niana sukad sa pagkabata. Busa akong gidugangan ang akong panahon sa pagbansay ngadto sa upat ka oras sa usa ka adlaw.
Ako miawdisyon ug nadawat sa Tunghaan sa Musika sa Manhattan sa New York. Akong gibati nga sa maong panahon ako maugmad na gayod nga musikero. Gidugangan ko ang akong panahon sa pagbansay ngadto sa unom ka oras sa usa ka adlaw. Naandan na nga ang guwardiya sa gabii moanha ug mosulti kanako nga manghipos kay siya manirado alang sa gabii. Dayon diha ang pagpauli sa balay sakay sa subway, ug sa sunod adlaw ang tibuok rutina mosugod na usab.
Sa miaginod ang tuig, gibati ko nga dako ang akong natun-an. Apan mihukom ako sa pagbalhin gikan sa Manhattan nga Tunghaan sa Musika ngadto sa Juilliard School, diha usab sa New York City. Kana labi pang madungganong tunghaan, bisan tuod ang palibot didto labi pang maindigon. Busa sa sunod ting-init ako miawdisyon ug nadawat. Apan sa maomaong panahon may laing butang nahitabo sa laing bahin sa akong kinabuhi.
Butang Nakulang
Abi mo, nianang tanang katuigan, ako tiggamit ug droga. Ugaling, ang suliran mao nga ang mga kalalim tungod sa droga nahimong menos ug menos nga makapatagbaw. Kadto nahidangat sa punto nga ang bugtong butang nga may matuod nga kahulogan sa akong kinabuhi mao ang akong musika.
Ako usab nahimong tigpalain ug sa literal mokaon lamang, matulog, ug moadto sa tunghaan. Ug sa dugang ug dugang ako nagkabalaka. Ang karaang mga higala moanha sa balay, ug ako dili gani makakomunikar kanila. Ako dili na makapakiglabot sa mga tawo.
Unsay akong mahimo? Gipangagpas ko ang butang akong gitinguha, apan sa kahiladman gibati ko nga may nakulang. Misugod ako sa pagsusi sa Sidlakanhong mga relihiyon alang sa direksiyon ug kalinaw sa hunahuna. Gipangita ko ang akong gitawag kamatuoran, apan dihay dakong pagkasalingkapaw, ug daghan kaayong tawo ang walay bisan diyutayng pagtagad sa kamatuoran. Busa dili ko buot makiglabot kanila o kang bisan kinsa.
Ang akong kinabuhi sa mausbawon nahimong mamingawon. Unya usa ka gabii, tapos sa pagpulaw sa katunga sa gabii sa pagbansay, akong gibati nga ako diha sa ngilit sa pagkadaot. Kana ang panahong ako miampo sa Diyos, si kinsa o diin man siya, nga mihangyo nga iya akong tabangan.
Pagkaplag sa Butang Akong Gitinguha
Sa usa ka panahon sa nangagi, ang duha nako ka higala nakakontak sa mga Saksi ni Jehova. Ang akong mga higala misugod sa pagsulti kanako sa mga butang ilang nakat-onan, apan sa bug-os dili ko buot makiglabot niana! Sa nahibalag ko ang usa sa mga Saksi ni Jehova, nakigsulti siya kanako bahin sa Bibliya, ug gipakitaan niya akog basahon nga nagpatin-aw sa Bibliya. Apan gitamay ko kadto nga maorag dili angayang basahon.
Usa ka gabii, sa pila ka semana tapos sa akong pag-ampo sa Diyos alang sa panabang, nagpaingon ako sa balay gikan sa tunghaan sa mga alas onse, ug si Tom, ang Saksi nga nakigsulti kanako, nagpasakay kanako sa iyang taksi. Misugod na usab siya sa pagpakigsulti kanako bahin sa Bibliya, apan grabe ko siyang gisupak. Bisan pa niana, sa kahiladman, nasayran ko nga husto ang iyang gipamulong! Gisukna ko ang daghang lisod nga pangutana, apan siya kalmado ug tukmang mitubag kanako. Sulod sa lima ka oras kami naglibotlibot ug nagpadayon sa pag-estoryahay!
Samtang nag-estoryahay, ang kalibog nga akong nasinati sa miaging pila ka tuig misugod sa pagkahanaw. Nagsugod gayod ako sa pagkasabot sa butang gisulayan ni Tom pagsulti kanako niadtong tanang mga bulan. Aw, kana maorag emosyonal kaayong kasinatian, apan sa pagkamatuod dili gayod. Kadto mao lamay pagkasabot sa kamatuoran kon unsa gayod kana. Ang gisulti ni Tom makataronganon kaayo. Pananglitan, akong nasabtan, sumala sa iyang gipunting, nga napakyas ang katawhan sa tanang paagi sa pagsulbad sa paninugdang mga suliran niini. Walay politikanhon, ekonomikanhon, o relihiyosong sistema niining kalibotana ang nakatultol ngadto sa kalinaw, kalipay, kahimsog, ug kinabuhi nga gikinahanglan kaayo sa katawhan. Ang kagamhanan lamang nga gitudlo ni Jesus ang makabuhat niini.—Jeremias 10:23; Mateo 6:9, 10.
Usab, ang hunahuna sa Bibliya bahin sa kon giunsa sa Diyos pagpakiglabot sa katawhan makapadasig kaayo. Siya dili motan-aw kon unsa ang usa ka tawo sa gawas ug dili siya mopalabi sa usa ka nasyonalidad kay sa lain. Ang bililhon mao kon unsay anaa sa hunahuna ug kasingkasing sa tawo.—Buhat 10:34, 35.
Ang dignidad nga nasugdan ko pagkakita diha sa mga Saksi nakapahibulong usab kaayo kanako. Busa misugod ako sa pagtambong sa mga tigom sa usa sa ilang mga Kingdom Hall. Didto, ang tanan hinlog hitsura ug matinahoron. Dihadiha akong nasabtan ang panginahanglan sa paghinlo sa akong kinabuhi ug paghunong sa paggamit sa mga droga. Nalipay ako sa tuman sa pagbuhat niana, kay ang kanhi kong pagkinabuhi dili gayod makapatagbaw!
Ang Musika Dili na ‘Numero Uno’
Tapos sa bakasyon sa ting-adlaw, mibalik ako sa tunghaan alang sa laing semestre. Apan lahi na kaayo ang akong pagbati sa mga butang niadtong panahona. Ang tinguha nga maugmad nga musikero dili na sama ka kusganon sa nangagi. Niadto akong nasayrang adunay labaw pa sa kinabuhi ug ang musika dili na mao ang ‘numero uno.’
Usa ka adlaw sa Kingdom Hall, akong nakit-an si Tom nga may gikuptang porma sa aplikasyon. Kadto maoy alang sa pagsulod sa bug-os-panahong ministeryo. Ang iyang kalipay nakabulig kanako sa pagkasayod kon unsa gayod ang akong tinguha sa kinabuhi. Ako, usab, buot moalagad kang Jehova sa bug-os panahon, nga magasulti sa uban sa kahibulongang mga butang mahitungod sa iyang katuyoan sa paglaglag niining dili-makapatagbawng kalibotan ug pagpuli niini sa usa ka paraisong bag-ong sistema.—Salmo 37:10, 11, 29; Lucas 23:43.
Mahinumdoman ko usab sa tin-aw ang sanong sa akong amahan ngadto sa akong desisyon. Iyang gipukpok ang lamesa ug magahiong gisultihan ako nga palayason sa balay kon moundang ako sa pagtungha. Ug mipahawa tuod ako. Duha ka bulan sa ulahi ako nabawtismohan sa pagpasimbolo sa akong pahinungod sa Diyos, ug sa wala madugay tapos niadto misulod ako sa bug-os-panahong ministeryo. Sa kataposan, tapos sa pila ka tuig, ang akong amahan mahigugmaong midapit kanako sa pagpauli sa balay, kay nasabtan niyang ako dili matarog sa akong determinasyon sa pag-alagad kang Jehova.
Unya ang usa ka bag-ong pribilehiyo nabuksan alang kanako. Sa 1979 miaplay ako ug nadawat nga moalagad sa hedkuwarter sa mga Saksi ni Jehova sa New York, gitawag Bethel (“balay sa Diyos”). Kadto usa gayod sa labing malipayong mga kasinatian sa akong kinabuhi. Nakadayeg ako sa matinuohong mga lalaki ug mga babaye, nga linibo kanila, nga nagtrabaho didto. Sa maong panahon ako nakapribilehiyo sa pag-alagad uban kanila. Daghan kanila ang makapalabi untag dagkog-suweldong mga karera niining kalibotana apan mihukom hinunoa sa pagpabilin sa bug-os-panahong pag-alagad sa Maglalalang.
Oy, ang pag-alagad sa Bethel dili kay sayon nga kinabuhi! Ug wala ko gayod dahoma nga ingon kana. Nalangkit ang dakong pagsakripisyo sa kaugalingon. Adunay dakong hinungdanong buluhaton nga pagabuhaton, ug kinahanglang kami magkugi.
Ang pag-alagad sa Bethel nagtudlo kanako nga ang matuod nga kalipay wala magagikan sa pagtagbaw sa personal nga mga tinguha. Kini nagagikan sa pag-alagad sa Maglalalang, kinsa nasayod sa tukma kon unsay atong gikinahanglan aron mabatonan ang matuod nga kalipay. Ako nagabansay gihapon sa akong musika apan sulod sa gamay rang tipik sa akong panahon nga sa nangagi akong gigahin niana. Usab, may mga panahong ako motugtog alang sa mga higala ug nakapribilehiyo pa sa pagtugtog uban sa usa ka orkestra sa mga Saksi. Kini nakapakontak kanako sa musika nga mao lamay akong gusto.
Pagbutang sa Musika sa Iyang Dapit
Unsang tambag ang akong ikahatag ngadto sa batan-ong gustog musika? Aw, hinumdoming ang musika maoy abughoan kaayong Musa (usa sa gihandurawng mga anak babaye sa paganong diyos si Zeus). Ang karera sa musika magkinahanglag linaing debosyon. Niini kini nagapakig-indig sa atong Maglalalang ug sa pagbuhat sa iyang kabubut-on. Ang musika mahimong halos usa ka sakit. Sayon kaayo ang pagkalangkit nga sobra niana. Akong nakita ang mga musikero nga misugod sa pagtuon sa Bibliya apan mihunong kay kana nakabalda sa ilang musika. Pagkabinuang nga pagbaylo, dihang ang pag-alagad sa Diyos makapatungha dili lamang sa kalinaw ug katagbawan karon kondili sa kinabuhing dayon sa usa ka paraisong yuta sa dili na madugay!
Sa prangka, akong nasabtang ang musikal nga mga institusyon maoy modernong-adlawng mga templo sa pagsimba nga mangayong ideboto sa katawhan ang ilang tibuok nga mga kinabuhi sa musika. Apan kana nagahimo niana nga usa ka diyos, ug tinong dili mauyonan sa Maglalalang. Ang musika maoy usa ka gasa gikan ni Jehova, apan kinahanglang ibutang kini sa iyang dapit.
Usab, ibutang sa hunahuna nga ang matang sa musika nga atong tugtogon o pamatian magaapektar kanato, sa ikaayo o sa ikadaot. Busa kinahanglang kita magmapilion kaayo. Ang musika angay nga maayo ug makapalig-on, apan karong adlawa ang kadaghanan niana makapadaldal sa kadaotan, tungod sa diwa ug mga pulong niana. Kon buot nimong hikat-onan ang mga pundamental sa musika, maayo nga imong gamiton ang basahon sa awit nga gipatik sa mga Saksi ni Jehova. Kana naundan sa maayong musika ug sa tanang paninugdang bahin ug mga kinahanglanon sa harmoniya.
Gihatagan kita sa Diyos ug kahibulongang gasa sa musika. Ang kalipay sa kahiladman nga madawat sa usa gikan sa pagtugtog nga maayo sa usa ka musika ug pagbatog mamiminaw nga may apresasyon magantihon. Apan aron kapahimuslan nga tukma, kinahanglang ibutang kini sa iyang dapit—nga luyo sa pagsimba sa atong Dakong Maglalalang, si Jehova.—Sumala sa giasoy ni William Mullane.
[Blurb sa panid 14]
Akong gisugdan ang pagpangita sa butang akong gibati maoy mas maayong matang sa musika
[Blurb sa panid 15]
Ang karaang mga higala moanha sa balay ug ako dili gani makakomunikar kanila
[Blurb sa panid 17]
Ang dignidad nga nasugdan ko sa pagkakita diha sa mga Saksi nakapahibulong kaayo usab kanako
[Letrato sa panid 16]
Ako nagakalipay gihapon sa pagtugtog alang sa akong mga higala ug usahay makapribilehiyo sa pagtugtog uban sa usa ka orkestra sa mga Saksi