Gikan sa Among mga Magbabasa

Pagkamatay sa Usa ka Minahal

Kining sulata maoy aron magpasalamat kaninyo tungod sa maayong mga artikulo bahin sa “Dihang ang Usa ka Minahal Mamatay.” (Oktubre 22, 1985 sa Cebuano) Sa namatay ang akong inahan sa usa ka makapatay nga sakit sa Enero 1984, akong naagoman ang daghan sa mga reaksiyon sa kaguol nga inyong gihisgotan. Inyong gihisgotang kadaghanan ang usa ka sulat gikan sa usa ka higala makatabang. Kini tinuod. Ang usa ka minahal nga higala misulat nga mipahayag ug kasubo sa pagkamatay sa akong inahan, ug kadto makapadasig kaayo nga sukad niadto akong nabasa kanang sulata sa daghang panahon inigkahunahuna ko sa akong inahan. Buot kong isugyot nga tapos mamatyag minahal, ang usa ka tawo angayng mobalik sa kasagarang rutina sa labing madali. Ako karon puliki sa bug-os-panahong ministeryo, ug kana nakatabang ug dako kanako.

A. M., Oklahoma

Salamat sa kahibulongang impormasyong inyong gihatag kanamo diha sa mga artikulong “Dihang ang Usa ka Minahal Mamatay.” Ako gipadako sa akong lola, ug sa namatay siya sa miaging Enero abi kog mabuang ako. Bisan pag ako naglaom nga siya mabanhaw, ako gibatig kasuko ug kalibog. Ako nasamok nga ako, usa ka lalaki, mihilak sa dayag sa panahon sa paglubong. Sukad niadto, akong gibati ang mga pagbati sa sala. Ang inyong mga artikulo mao gayod ang akong gikinahanglan. Buot kong isulti ang usa ka butang niadtong kansang mga ginikanan buhi pa. Sultihi sila nga sila imong gihigugma, sa labing subsob nga mahimo mo. May adlaw nga dili ka na makahimo niana.

P. W., New York

Managhigala Lamang

Ako bug-os mosupak sa inyong mga hunahuna diha sa artikulong “Mga Batan-on Nangutana . . . Mahimo Bang ang Ulitawo ug Dalaga ‘Managhigala Lamang’?” (Nobyembre 8, 1985 sa Cebuano) Ako daghag lalaking higala nga alang kanila ako wala mobati sa seksuwal nga paagi. Ang Bibliya nagaingong imong tratahon ang usa ka lalaki ingong imong igsoong lalaki. Maorag kini inyong gibalit-ad sa pag-ingong daotan ang pagbatog suod nga lalaking mga higala. Ako kusganong nagtuo nga ang mga ulitawo ug mga dalaga mamahimong “managhigala lamang.”

D. B., Alabama

Oo, mahimong maayong bahin sa pagtubo sa usa ang pagbatog daghang higala sa duha ka sekso. Ang artikulong gilantugian naghisgot nga labi pang ispisipiko sa usa ka ulitawo o dalaga nga naghunahunang siya mahimong magbatog usa nga suod, sumbonganang higala sa kaatbang nga sekso, usa nga “steady,” ug unya huptan ang maong relasyon sa platoniko gayod nga pasikaranan. Dili realistiko ang pagtuo nga ang usa makaugmad nianang suod nga pakighigala uban sa usa lamang sa kaatbang nga sekso nga dili malangkit sa emosyonal nga paagi.—ED.

Ania ang pinakalalom kong apresasyon sa mga artikulong “Mga Batan-on Nangutana . . . Mahimo Bang ang Ulitawo ug Dalaga ‘Managhigala Lamang’?” (Nobyembre 8, 1985 sa Cebuano) ug “Mga Batan-on Nangutana . . . Unsay Daotan sa Pagkahimong ‘Managhigala Lamang’?” (Nobyembre 22, 1985) Sila nagbukas gayod sa akong kaisipan. Kon nabatonan ko pa unta kining impormasyona duha ka tuig nga sayosayo, ako tinong mahupayan unta sa emosyonal nga kasamok nga ako karong nasinati. Ang suliran mao nga wala gayod ako mahinumdom sa pagbutang ug utlanan diin kadto gikinahanglan. Apan ang tambag sa Proverbio 22:3 tinong manalipod kanako karon ug sa umaabot.

J. L., New York

Salamat kaninyo tungod sa artikulong “Mga Batan-on Nangutana . . . Mahimo Bang ang Ulitawo ug Dalaga ‘Managhigala Lamang’?” Kadto miabot gayod sa eksaktong panahon. Sa pagkakaron ako naningkamot nga mahikalimot sa mga epekto sa pagka “nasunog” tungod sa usa-ka-kilirang romantikong pagbati nga naggikan sa pagkahimong ‘suod lamang nga higala’ sa usa sa kaatbang nga sekso. Kadto tinuod emosyonal nga kagubot.

D. G., Arkansas