Gikan sa Among mga Magbabasa—“Kon ang Usa sa Imong Minahal Mamatay”
ANG gula sa Oktubre 22, 1985, sa Pagmata! nasudlan ug upat ka bahin nga serye sa hapin nga nag-ulohang “Kon ang Usa sa Imong Minahal Mamatay.” Daghang magbabasa misulat nga nagpahayag sa ilang apresasyon sa niining materyala. Buot namong ipakigbahin ang ilang mga komento.
“Salamat Kaninyo sa Pagpahibalo Kanako nga Normal Ako”
Ang kadaghanan niadtong misulat nagpasalamat sa pagkahibalo nga komun ang ilang gibati. Sila misulat:
“Ang among anak nga si Mark namatay sa aksidente sa miaging Hunyo. Dili ikatukib sa mga pulong ang bation sa usa ka inahan. Dili lang kay higala nako siya kondili anak ko usab siya. Ang Pagmata! nakatabang kanako sa pagkaamgo nga normal ang akong gibati.”
—A. D., Nebraska
“Sa milabay ang mga semana human nga migula kining artikuloha namatay ang akong amahan. Wala ako masayod kon nganong gibati ko ang tanang emosyon nga giantos ko ug kon unsaon sa pag-atubang kanila. Dayon akong nabasa kining mga artikuloha ug nakaamgo nga komun ang akong gibati. Matag higayon nga bation akog kasubo, mokuha akog Pagmata! ug balikbalikon ko kini pagbasa. Sa paghimo niini, mahupayan ako, ug nakatigayon sa pagpadayon.”
—D. R., Pennsylvania
“Namatay ang akong bana sa Oktubre 1983. Mibati akong sad-an sa akong gibati. Karon nasabtan ko nga bisag dili ko ikapasigarbo kining mga pagbatia, sila komun o dili tagsaon. Daghan kaayong salamat sa makalipay nga impormasyon.”
—L. B., Nebraska
Ang usa ka magbabasa, kansang 15 anyos nga batang lalaki namatay sa pila ka tuig nga miagi, miingon bahin sa iyang pagbati niining paagiha: “Salamat kaninyo sa pagpahibalo kanako nga normal ako.”
—L. A., Connecticut
Dugang Katin-awan
Ang ubang mga sulat mihatag ug dugang katin-awan sa mga pagbati ug mga panginahanglan sa mga namatyan.
“Upat ka tuig akong nabiyuda, wala ako makadungog ug mga biyuda nga gihisgotan diha sa pag-ampo. Tuohi ako, karon ginaapil ko na sa akong mga pag-ampo ang daghang biyuda ug ang tanang namatyan sa ilang mga minahal. Grabeng makapukan kana.”
—L. B., California
“Namatay ang akong anak si David sa Marso tungod sa kusog nga pagdugo sa utok. Gihatagan ako sa akong doktor ug mga tabletas tulo ka beses sa usa ka adlaw—ug lain pang tabletas dayong katulog sa gabii. Bisag nasayod ako nga gihatag kadto kanako sa kalulot ug kaluoy, nakita nako ang akong kaugalingon nga nagbantay sa orasan, nagpaabot sa pagtomar sa laing tabletas. Makalilisang kadto, ug sa ulahi akong gisultihan ang akong bana sa akong gibati. Sa iyang tambag, akong gilabay ang tanan sa kasilyas ug gipaawas. Dako kaayong tabang kanako ug sa akong pamilya ang artikulo sa Pagmata! Mahimo ba, sa umaabot, sa pagsulat ug pasidaan sa mga kapeligrohan sa mga tabletas sa pagsumpo sa tensiyon ug kasubo?”
—I. S., Inglaterra
“Ang labing nagustohan nako sa mga artikulo mao ang ilang pag-atubang sa uban ug kon unsay ilang buhaton ug dili buhaton. Daghan sulod sa kongregasyon mipalayo kanako tungod sa akong negatibong mga reaksiyon. Malisod kaayo kadto kanako ug kanila usab! Busa naghinaot ako nga makatabang kanila ang mga artikulo aron makatabang kanako karon.”
—R. W., British Columbia
“Mga Pagbating Dili Ko Buot Bation”
Komun sa tawo ang pagpugong sa iyang kaguol, sama sa makita sa ubang mga sulat.
“Ang usa sa akong gimahal pag-ayo namatay, ug akong gipugngan ang tanang pagbati sa kaguol. Gibuksan sa inyong mga artikulo ang mga pagbati nga akong gihambin sa 15 ka tuig sukad sa iyang kamatayon. Sila maoy mga pagbati nga dili ko buot nga bation tungod sa dulot nga kasakit nga ipahinabo niini. Akong nakita karon nga kinahanglang ipagawas kining pagbatia sa panahon sa kamatayon.”
—R. M., Ohio
“Namatay ang akong amahan sa Oktubre 1984, ug wala nako ipagula ang akong pagbati hangtod nga nabasa nako kining mga artikuloha. Ang sunod nga duha ka gabii, sa matulog na ako, miampo ako kang Jehova, ug mihilak ako hangtod nga dili na ako makahilak. Kinahanglang pasalamatan ko si Jehova ug ang ‘matinumanon ug maalamong ulipon’ sa kahupayan sa akong gibati karon. Salamat kaninyo!”
—K. B., Ohio
Gipugngan sa uban ang pagpakita sa ilang kaguol tungod kay ilang gibati nga sayop nga masubo ang usa ka Kristohanon. Sila misulat:
“Sa wala pa makabasa sa inyong mga artikulo, akong gibati nga ang akong kasubo nagpakitag kakulang sa pagtuo sa saad ni Jehova sa pagkabanhaw. Naglaom ako nga makita nako pag-usab ang akong inahan, apan ang inyong mga artikulo nakatabang kanako sa pagsabot nga dili daotang masubo ang usa ka Kristohanon.”
—T. M., Kansas
“Ang nakatabang kanako mao ang pagkasayod nga dili daotan nga bation ang kaguol. Dako ang akong pagtuo sa pagkabanhaw, ug sa hunahuna ko dili maayo ang pagpakita sa akong kasubo atubangan sa uban, nga naghunahuna nga naghatag ako kanilag katarongan sa pagduhaduha nga akong nabatonan ang malig-ong paglaom. Ang kataposang artikulo nakatabang kanako sa pagtan-aw nga ang atong paglaom dili makawala sa kasakit, apan mopaarang-arang kini sa pag-antos.”
—C. B., New Jersey
Nga Kristohanong bation ang kaguol makita sa panig-ingnan ni Jesu-Kristo mismo, kinsa sa namatay ang iyang minahal nga higalang si Lazaro siya “mihilak.” Ug bisan pa sa kamatuoran nga banhawon ni Jesus si Lazaro gikan sa mga patay!—Juan 11:33-44.
Makatabang ang Uban
Daghang magbabasa mipahayag apresasyon sa mga sugyot kon unsaon sa pagtabang niadtong mga namatyan.
“Sa pila ka semanang milabay ang amahan sa akong suod nga higala namatay, sa kalit lamang, diha sa balay. Gipadalhan nako siyag kard nga nagdapit kaniya sa pagduaw. Nagpalandong kon unsa ka balikwaot ang akong bation kon maghisgot siya bahin sa iyang amahan. Sa pila ka adlaw sa wala pa siya miduaw, tan-awa, ang atong Pagmata! miabot gikan sa buson uban sa mga artikulo ‘Kon sa Unsang Paagi Makatabang ang Uban.’ Gibasa ko kadto sa makadaghang higayon! Kutob sa akong maarangan, gihimo ko ang gisugyot. Relaks kadto nga hapon, ug maayo ang among panag-estorya bahin sa iyang amahan ug sa mga butang nga among nahinumdoman. Nangatawa pa gani kami. Salamat kaayo kaninyo niadtong mga pulonga sa tukmang panahon.”
—K. E., Indiana
Pabilhan sa mga namatyan kon mouna ang uban, sumala sa gipakita niining makatandog nga sulat gikan sa usa ka magbabasa nga namatyan ug bana dili pa dugay.
“Daghan ang miingon, ‘Kon may ikatabang ako, pahibaloa ako.’ Apan wala mangutana ang usa ka Kristohanong igsoong babaye. Midiretso siya sa lawak-katulogan, gihipos ang higdaanan, gilabhan ang bulingong mga habol ug punda. Lain ang mikuhag balde, tubig, ug mga gamit sa paghinlo ug gilimpiyohan ang alpombra nga gisukaan sa akong bana. Tinuod gayod silang mga higala, ug dili ko gayod sila kalimtan. Sa milabay ang pila ka semana, ang usa sa mga ansiano miduaw nga nagbesti para sa trabaho dala sa iyang mga gamit ug miingon, “nasayod ako nga adunay naguba. Unsa man kana?’ Unsa ka mahal niadtong tawhana alang kanako sa pag-ayo sa pultahan nga gubaog bisagra ug sa pag-ayo sa alambre sa koryente!”
—E. L., Puerto Rico
Kon Unsay Bation sa Ginikanan
Sa pagkatinuod, ang usa sa labing masakit nga hitabo sa tanan mao ang kamatayon sa usa ka bata. Gipakita sa ubang mga magbabasa kon unsa ka makalilisang kana.
“Salamat kaayo kaninyo sa gula sa Pagmata! sa Oktubre 22, 1985. Dako kaayong paglipay kadto kanako. Abi gud ninyo, nahibaloan nako sa Abril 19 nga ang bata nga akong gisabak namatay. Pagkamakalilisang niadto. Karong panahona naghulat ako nga magbati ug sa pagpanganak. Maayo kay nasayod ako nga ang reaksiyon nga akong naagian normal, salamat sa organisasyon ni Jehova.”
—J. H., Virginia
“Sa milabayng unom ka tuig namatay ang akong ikaduhang anak nga pito pa ka semana; natawo siya nga adunay daghang depekto sa pagkatawo. Gipunting niadtong mga artikuloha sa tukma ang akong gibati ug nakapakita kanako nga adunay nakasabot sa akong ginaantos. Salamat kaayo kaninyo sa pagbutang sa kataposan pinaagi sa mga pulong sa gibati ko mismo apan dili mahibalo kon unsaon sa pagpahayag niana.”
—M. S., New York
“Buot kong mohatag ug espesyal nga pasalamat kaninyo sa inyong artikulong ‘Kon ang Usa sa Imong Minahal Mamatay.’ Ang akong anak si Ricky naligsan sa awto sa Septiyembre 28, 1984. Singko anyos pa lamang siya. Upat ka semana human sa aksidente, misugod ako sa pagtuon sa Bibliya sa usa sa mga Saksi ni Jehova. Nakatabang kini kanako niining malisod nga panahon. Adlaw-adlaw akong naghandom kang Ricky, ug may mga adlaw nga molingkod ako ug mohilak tungod kay gimingaw ako pag-ayo niya. Apan karon uban sa mahigugmaong pagtultol ni Jehova nga Diyos ug sa pagkuhag tukmang kahibalo sa Bibliya, nagpaabot ako nga may adlaw ra nga makita ko si Ricky pag-usab. Makaingon ako sa tanan nga namatyan ug minahal, ‘Sangpita ang usa sa mga Saksi ni Jehova sa pagtabang kanimo sa pag-antos niana.’”
—F. P., Minnesota
Sa matin-aw, ang kamatayon sa usa nga imong minahal maoy usa sa labing dakong trahedya sa kinabuhi. Usa na ka pagdasig ang pagkasayod nga komun ang imong gibati. Dugang pa, ang pagpakita, dili pagpugong, sa imong mga pagbati makatabang usab. Ug, sama sa maayong pagkapahayag sa mga sulat sa ibabaw, dakong paglipay ang makuha sa pinasukad sa Bibliya nga paglaom nga “ang takna nagsingabot na nga ang tanan niadtong anaa sa handumanang lubnganan managpakabati sa tingog [ni Jesus] ug managpanggula.”—Juan 5:28, 29.
[Kahon sa panid 27]
Nakita sa Grupong Batok sa Kanser nga Mapuslanon ang Pagmata!
Sa pagtubag sa mga serye sa Pagmata! “Kon ang Usa sa Imong Minahal Mamatay,” ang mosunod nga sulat nadawat gikan sa direktor sa programa nga batok sa kanser nga programa.
“Ang CancerShare maoy boluntaryong programa nga direktang nagtabang sa mga pasyenteng may kanser ug sa ilang mga pamilya. Kami kanunay makadawat ug mga tawag sa mga tawo nga naguol sa kamatayon sa usa nga minahal, ug naninguha kami sa pagtabang pinaagi sa pagpadala kanilag basahon bahin sa kasubo ug sa pag-awhag kanila sa pagdangop sa mga grupong nagatabang sa namatyan.
“Dunay upat ka artikulo sa Oktubre 22, 1985, nga gula sa Pagmata! nga makatabag dako sa nangaguol: ‘Kon ang Usa sa Imong Minahal Mamatay’; ‘Kon Unsay Bation sa mga Ginikanan’; ‘Kon sa Unsang Paagi Makatabang ang Uban’. Mahimo bang makagamit ang CancerShare sa tanan o bahin niining mga artikuloha, nga pasidunggan ang Watchtower Bible and Tract Society nga mao ang tuboran, sa pagtabang sa mga tawong nagmasulob-on?”
Malipayong gihatag ang permiso niining bahina.