Gikan sa Among mga Magbabasa

Pagkamatay sa Usa ka Anak

Salamat sa inyong isyu bahin sa “Pag-atubang sa Pagkamatay sa Usa ka Anak.” (Agosto 8, 1987) Bisan pag mihilak ako sa daghang beses samtang gibasa nako ang mga artikulo, nakatabang ang pagkahibalong ang uban mibating sama sa akong gibati. Maoy niadtong Marso 1978 nga ang among 24-anyos nga Karen namatay dihang ang iyang kotse nabanggaan sa usa ka trak sa usa ka kinasang-an pila ra ka bloke gikan sa iyang balay. Giapresyar kog dako nga ang inyong artikulo nag-ingon nga dili sayop ang pagbangotan, ug kana wala magpadayag ug kakulang sa pagtuo sa mga saad sa Diyos sa pagkabanhaw; hinunoa, kini nagapaila sa lalom nga gugma alang sa tawong namatay. Kadto nakapalipay kaayo nako. Ang pagsulat ni Diane Krych kang David bahin sa pagbatog parti alang kaniya dihang siya pukawon ni Jehova gikan sa iyang pagkatulog nakatandog sa akong kasingkasing. Ako nakahunahuna usab bahin sa parti alang kang Karen dihang siya banhawon. Ako dili makahulat sa pagtan-aw sa iyang matahom nga pahiyom!

D. L., Tinipong Bansa

Bag-o pa nakong nabasa ang inyong isyung “Pag-atubang sa Pagkamatay sa Usa ka Anak.” Ako makapamatuod sa matag pulong niana. Ang kaguol dili mahanaw. Sa 13 anyos na gibati ko ang pagkasad-an tungod sa pagbangotan sa pagkamatay sa akong anak lalaki. Ako wala na mobati sa sala. Karon nahupay ako sa pagkasayod nga ang pagbangotan wala gayod magpadayag ug kawalay pagtuo sa atong dakong Diyos, si Jehova.

A. M., Tinipong Bansa

Buot kong ipahayag ang akong dulot nga apresasyon sa artikulong “Pag-atubang sa Pagkamatay sa Usa ka Anak.” Ang among minahal nga anak lalaki si John namatay mga pito ka tuig nga miagi. Akong nasinati ang daghan sa mga pagbati nga gibatbat sa inyong artikulo—pagkadili-makatuo, dili pagdawat, mga pagbati sa sala. Wala ako magsulat ug mga sulat kaniya apan nagbaton sa usa ka malita nga puno sa iyang mga butang. Sa akong hunahuna siya nagbakasyon ug dili makakomunikar kanako. Sa duha ka tuig gibati ko ang depresyon, pagpalain, ug magul-anon. Dili ko hisabtan ang akong mga gibati. Karon maarang-arang na ako, bisan pag gibati ko gihapon ang dakong kapildihan. Salamat kaayo sa pagtabang sa uban sa pagsabot sa among mga gibati ug kon unsang positibong mga butang ang ilang ikasulti o mahimo sa pagtabang.

V. W., Tinipong Bansa

Bag-o pa nakong natapos ang pagbasa sa mga artikulo bahin sa “Pag-atubang sa Pagkamatay sa Usa ka Anak.” Unom na ka tuig ug walo ka bulan sukad namatyan kami sa among bugtong anak babaye sa aksidente sa kotse. Ang inyong mga artikulo nakatabang kanako sa pagsabot nga ang akong gibati maoy normal. Ako dili makadawat nga siya patay na. Ako naghunahuna nga siya misyonaryo sa laing nasod, bisan pag ako nahibalo nga siya namatay na. Gibati ko usab ang panginahanglan nga sulatan siya. Niadto lamang miaging tuig ako nakadawat sa iyang pagkamatay; nakaamgo ako nga bisan unsa ka dugay ang akong pagbangotan ako dili makapabuhi kaniya. Busa panahon na kadto sa paglingkawas sa akong hinobrang kaguol. Salamat kaayo sa maong artikulo.

V. B. Tinipong Bansa

Sumala sa giingon sa panid 14 sa gihisgotan-sa-ibabaw nga isyu, ang “Pagmata!” wala magsugyot sa pagsulat ug mga sulat ngadto sa namatay ingong tabang nga maulian gikan sa palakaw sa pagbangotan. Ang sulat ni Diane Krych gipatik dili lamang sa pag-ilustrar sa unsang paagi gilig-on siya sa paglaom sa pagkabanhaw kondili sa pag-ilustrar usab unsay reaksiyon sa pila ka tawo kon bation sa hinobrang kaguol, aron ang uban makaarang sa pagsanong uban ang pagkamasinabtanon ug kahangawa.—ED.