MGA BATAN-ON NANGUTANA
Unsaon Nako Pag-atubang ang Grabeng Kaguol?
Bag-o lang ba ka namatyag higala o membro sa pamilya? Kon mao, kini nga artikulo makatabang nimo sa pag-atubang sa grabeng kaguol.
Niining artikuloha
Sobra ra ba ang akong kaguol?
Daghan ang mibatig grabeng emosyon, ug kini nga pagbati dugayng mawala.
“Walay adlaw nga molabay nga dili nako mahunahunaan si Lolo. Bisag duha ka tuig na siyang namatay, maghilak gihapon ko kon mag-estorya ko bahin niya.”—Olivia.
“Kanunay kong dasigon ni Lola nga kab-oton ang akong mga tumong, pero wala niya makita nga nakab-ot nako ni kay namatay na siya. Matag higayon nga makakab-ot kog tumong maguol ko, kay wala ni makita ni Lola.”—Alison.
Ang grabeng kaguol moresultag lainlaing emosyon. Pananglitan:
“Pagkamatay sa akong uyoan, na-shock ko, ug mao toy akong gibati sa taastaas nga panahon. Unang higayon to nga namatyan kog suod nako, ug gibati nako nga mora kog naligsan ug tren.”—Nadine.
“Pagkamatay ni Lolo nasuko ko niya kay wala niya atimana ang iyang panglawas, bisag amo siyang giingnan nga mag-amping.”—Carlos.
“Kami lang ni Ate ang wala sa pamilya pagkamatay ni Lolo. Maong na-guilty ko kay wala ko makapanamilit niya.”—Adriana.
“Naay magtiayon nga suod sa among pamilya nga namatay tungod sa aksidente sa sakyanan. Mao nga kon naay molakaw nga membro sa pamilya, mahadlok ko, kay basig naay mahitabo nila.”—Jared.
“Dihang namatay si Lola tulo ka tuig na ang milabay, nagmahay ko ug naghunahuna nga maayo pag gidugangan nako ang akong panahon uban niya.”—Julianna.
Ang pagka-shock, kasuko, pagka-guilty, kahadlok, ug pagmahay maoy normal nga pagbati kon grabe kang naguol. Kon mibati ka sa bisan hain niini, makasalig ka nga anam-anam ra ning mawala. Pero unsaon nimo pag-atubang ang imong grabeng kaguol karon?
Kon unsaon pag-atubang ang grabeng kaguol
Pakig-estorya sa usa ka higala. Ang Bibliya nag-ingon nga ang tinuod nga higala “masaligan panahon sa kalisdanan.” (Proverbio 17:17) Kon imong isulti sa usa ka higala ang imong gibati, madawat nimo ang pagdasig nga imong gikinahanglan.
“Normal lang nga maguol pag-ayo. Usahay maatubang nimo ni nga ikaw-ikaw ra, pero basin makapahunahuna ni nimo nga dili na moarang-arang ang imong kahimtang. Maong maayo nga ipakig-estorya nimo ni sa uban.”—Yvette.
Hinumdomi ang imong minahal. Ang Bibliya nag-ingon nga “ang maayong tawo magsultig maayo gikan sa maayong mga butang nga anaa sa iyang kasingkasing.” (Lucas 6:45, Maayong Balita Biblia) Puwede nimong isulat ang inyong malipayong mga panahon ug puwede kang maghimo ug scrapbook.
“Gisulat nako ang tanang butang nga gitudlo sa akong amigo sa buhi pa siya, ug pinaagi niini padayong nakatabang nako ang iyang ehemplo. Ang pagsulat niini nakatabang nako nga maatubang ang grabeng kaguol.”—Jeffrey.
Atimana ang imong panglawas. Gihisgotan sa Bibliya ang mga kaayohan sa pag-ehersisyo. (1 Timoteo 4:8) Paneguroa nga makakaon kag sustansiyadong pagkaon, makaehersisyo, ug makapahulayg sakto.
“Dili ka makahunahunag tarong kon magul-anon kaayo ka, maong angay nimong paneguroon nga magpabilin kang himsog. Paningkamoti nga makakaon kag tarong ug makatulog ug sakto.”—Maria.
Tabangi ang uban. Ang Bibliya nag-ingon: “Dunay labaw nga kalipay sa paghatag kay sa pagdawat.”—Buhat 20:35.
“Puwede kang motabang sa uban, ilabina niadtong namatyan pod. Magpahinumdom ni nimo nga ang uban nag-antos pod.”—Carlos.
Isulti ang imong gibati diha sa pag-ampo. Ang Bibliya nag-ingon nga si Jehova nga Diyos maoy “Tigpatalinghog sa pag-ampo.” (Salmo 65:2) Nag-ingon sab ni nga ‘ayohon [ni Jehova] ang mga dugmok ug kasingkasing; bugkosan niya ang ilang mga samad.’—Salmo 147:3.
“Hangyoa si Jehova nga hatagan ka sa tabang ug pagdasig nga imong gikinahanglan. Tingali naay mga adlaw nga mas malisdan ta, pero si Jehova motabang gyod nato.”—Jeanette.
Magmakataronganon. Hinumdomi nga ang matag tawo lainlaig paagi sa pag-atubang sa grabeng kaguol. Gipakita sa Bibliya nga si Jacob wala magpahupay sa uban dihang nagtuo siya nga namatay ang iyang anak. (Genesis 37:35) Busa ayawg katingala kon wala pa mawala ang imong grabeng kaguol.
“Naay daghang butang nga magpahinumdom nako sa igsoon sa akong lola, bisag 15 ka tuig na siyang namatay.”—Taylor.
Imadyina nga nabalian kag bukog. Sakit gyod ni, ug nagkinahanglag panahon nga maulian ni. Ug ang doktor mohatag nimog mga sugyot kon unsay imong himoon aron matabangan ang imong lawas nga maulian.
Ingon ana pod ang kahimtang niadtong nag-antos tungod sa kamatayon sa ilang minahal. Nagkinahanglag panahon nga mamenosan ang imong grabeng kaguol. Busa magmapailobon. Konsideraha kon unsa nga mga sugyot niini nga artikulo ang ilabinang makatabang kanimo.