Gikan sa Among mga Magbabasa
Mga Interbiyo sa Trabaho
Salamat sa inyong pagpatik sa artikulong “Mga Batan-on Nangutana . . . Unsaon Ko Pag-atubang ang Interbiyo sa Trabaho?” (Hulyo 8, 1983) Human nakatapos sa hayskol, mihimo ako ug daghang mga aplikasyon sa trabaho. Gitawag ako sa usa ka kompaniya alang sa usa ka interbiyo nga klarong wala ako makahatag maayong impresyon. Sa ulahi gidapit ako sa laing kompaniya ug interbiyo. Ning higayona nahinumdoman nako ang inyong artikulo ug gitun-an ko kini pag-ayo. Akong gisunod ang mga sugyot nga gihatag bahin sa abanteng pagplano, kalmado, magmaigmat, ug seryoso, matinahuron, matinuoron, ug prangka. Nakahatag akog maayong impresyon ug nadawat ako sa trabaho.
B. O., Nigeria
Migamit sa mga Artikulo Diha sa Tunghaan
Buot kong isulti ninyo nga tiggamit ako sa inyong ekselenteng mga artikulo. Sa 1981 miapil ako sa Science Fair nga niini mieksibit ako ug artikulo nga akong gisulat bahin sa pagpanabako, nga gibase diha sa mga magasin. Sukad niadto nakagamit ako sa magasin sa daghang higayon diha sa tunghaan nga dili na nako kini maihap. Kon may motunghang ulohan, sa sulod o sa gawas sa lawak-klasehan, magdala akog usa o duha sa mga magasin sa tunghaan sa sunod adlaw. Nabantog ang magasin sa akong klase nga kon may motunghang ulohang tukionon kun lantugionon, mangutana ang akong mga kauban sa klase bahin niana, ug magdala akog materyal ngadto sa tunghaan alang niana. Salamat kaayo kaninyo.
L. C., Brazil
Ang Katolikong Iglesya ug si Maria
Dakong kadaot ang inyong nahimo sa Katolikong Iglesya sa kinatibuk-an ug ilabina sa Bulahang Pagkabirhin ni Maria. (“Ang Iglesya Katolika—Ang Hunahuna Niini sa Sekso,” Marso 8, 1986) Nagsulat kamo nga ang “doktrina sa dumalayong pagkabirhin ni Maria nagpatunhay sa ideya nga mahugaw ang seksuwal nga mga relasyon.” Bakak kini. Ang doktrina sa dumalayong pagkabirhin nagpatunhay nga si Maria ug Jose nanumpa sa wala pa ang kaminyoon sa kaputli, nga ilang gitipigan sa walay kataposan. Sa ulahi miingon kamo nga si Jesus adunay tinuod nga mga igsoong lalaki ug igsoong mga babaye sa iyang pamilya. Bakak usab kini. Kon dunay mga igsoong lalaki ug igsoong mga babaye si Jesus, ngano, dihang himalatyon sa krus, nga iyang gisalig ang iyang inahan ngadto sa usa ka higala imbes sa paryente?
D. H., Wisconsin
Ang seksuwal nga relasyon tali sa mga tawong minyo dili mahugaw. (Hebreohanon 13:4) Dili kini pagdaot kun pagpaubos kang Maria sa pag-ingon nga human nga natawo si Jesus, misugod siya sa pakigsekso sa iyang bana si Jose ug nakaanak pinaagi kaniya. Ang Bibliya wala mag-ingon nga nanumpa si Jose ug Maria sa kaputli sa walay kataposan. Ang “The New American Bible” (Katolikong hubad) nag-ingon diha sa Mateo 1:25 mahitungod kang Jose ug Maria: “Apan wala siya makigsekso kaniya hangtod gikaanak niya ang usa ka bata nga lalaki, nga iyang ginganlan si Jesus.” Ang potnot ning maong hubad nag-ingon: “Gipasiugda sa ebanghelisador ang pagkabirhin sa inahan ni Jesus gikan sa gutlo sa iyang pagsamkon ngadto sa iyang pagkatawo. Wala siya magtagad dinhi sa yugto nga misunod sa natawo si Jesus.”
Mahitungod kang Jesus nga may tinuod nga mga igsoong lalaki ug igsoong mga babaye, ang Bibliya nagpunting sa makadaghang higayon niini diha sa Mateo 12:46, 47; 13:55, 56; Marcos 6:3; Lucas 8:19, 20; Juan 2:12; 7:3, 5. Ang “The New Catholic Encyclopedia” nag-ingon nga ang Gregong pulong nga gigamit sa pagpaila sa relasyon kang Jesus ug niining mga paryente may kahulogan nga bug-os nga igsoong mga lalaki ug mga igsoong babaye. Tingali ang rason kon nganong gitugyan ni Jesus ang iyang inahan ngadto sa iyang disipulong si Juan imbes sa usa sa iyang igsoong lalaki sa unod mao nga sila dili pa magtutuo, ug giisip ni Jesus ang espirituwal nga relasyon nga mas importante kay sa unodnon, sumala sa iyang gipahayag sa Mateo 12:46-50.—CD.