Ang Lumba sa Motorsiklo Mao Niadto ang Akong Kinabuhi

AKO napiling makiglumba batok kang Ivan Mauger, ang kampeyon sa kalibotan sa lumba sa motorsiklo, sa eksibisyong mga bangga sa Ipswich, Queensland, sa Australia. Niadtong gabhiona puno ang estadyum. Sa tibuok estadyum mabati nimo ang kaukyab sa palibot. Kadto dakong gabii alang sa daghang tawo—ako, ang ilang bayani sa lungsod, makiglumba batok sa kinalabwang paborito sa kalibotan!

Samtang si Ivan ug ako naglinya sa teyp nga sugdanan, nga nagdahunog ang among mga makina, ang mga magdadayeg diha na sa ngilit sa ilang lingkoran nga malaomon. Giisa ang teyp sa sugdanan ug kami nagpabulhot! Kami, nga nagpadalagang tapad, nagpautbo sa abog ngadto sa panon samtang kami miliko sa mga kurbada. Pinulgada lamang ang among deperensiya samtang giduso namo ang among mga motor sa limite.

Tapos sa duha ka lumba kami patas, nga tagsag daog. Ang kaukyab miabot sa tayuktok sa among ikatulo ug kataposang lumba. Samtang kami misulod sa kataposang seksiyon sa lumba, nga misiyaok ang mga makina, nanglupad ang abog, ang mga tumatan-aw nanindog, nga ang dahunog sa mga makina nalumsan sa ilang mga hugyaw. Ang panon misuliyaw samtang kami miliko sa kataposang kurbada . . .

Apan sa unsang paagi nakaabot ako sa maong tayuktok sa lumba sa motorsiklo? Sukad sa akong pagkabata, kana bahin na sa akong kinabuhi. Kana hisabtan, kay ang akong amahan dulot nga interesado sa lumba sa kinadak-ang bahin sa iyang kinabuhi. Apil sa labing unang mga butang akong mahinumdoman mao ang mga esena diin ang among tibuok pamilya didto sa mga tigom sa lumba sa motorsiklo kada semana sa Exhibition Grounds sa Brisbane, Australia.

Busa, ingong bayong, naugmad nako ang gugma sa mga motorsiklo ug ako nagsakay niana dihang ako nakahimo na. Sa edad 15, ako nagsakay sa daang motorsiklo sa akong amahan libot sa hawang lugar nga dili publikong dalan, sanglit ako bata pa kaayong makabatog lisensiya sa tigmotor. Sa dugang ako nagsakay, ang akong gugma sa mga motorsiklo mas milalom.

Pagkaabot sa Mecca sa Lumba sa Motorsiklo

Sa nakahuman ako sa akong pormal nga edukasyon, ako mihukom sa pagsunod sa akong amahan sa natad sa mga makina. Hapit ko nang mahuman ang akong pagka-apprentice dihang ang suod kong higala miduyog kanako sa pagsulay sa tuling pagpadagan sa motorsiklo. Sukad niadto, ang tibuok kong kinabuhi misugod sa pagkasentro sa mga motorsiklo.

Kadto usa ka adlaw sa pagpasigarbo dihang ako nakapalit sa una kong motorsiklo. Karon, sa tabang sa akong amahan, akong gisugdan ang pagpasibo sa akong motorsiklo alang sa lumba. Niadtong 1965 gisugdan ko ang akong karera sa pakiglumba sa Brisbane Exhibition Grounds. Siempre, ako kinahanglang mosugod ako sa ubos, apan sa wala madugay ako nailhan, ug sa wala madugay ako naghagit sa hawod nga mga siklista ug nakadaog sa daghang bangga.

Maayo ang akong nahimo sa akong unang yugto sa lumba, ug ang importanteng hitabo mao ang pagkadaog sa Warana Festival Trophy. Pagkatapos sa yugto sa lumba, ako gidapit sa paggawas sa nasod ug makiglumba alang sa Halifax Speedway sa Yorkshire, Inglaterra. Akong gidawat ang tanyag uban ang kalipay, kay ang Inglaterra mao ang mecca sa lumba sa motorsiklo. Ang tanang hawod nga siklista nakigbangga sa Inglaterra ug sa kontinente.

Kalamposan Diha sa Britanikong Liga

Uban sa pila pa ka Australianong siklista, ako mipaingon sa Inglaterra sa kataposan sa 1966 alang sa Ingles 1967 yugto sa lumba. Sa maong ang-ang, akong nakab-ot ang duha sa akong labing gitinguhang tumong—ako propesyonal nga siklista, ug ako nakiglumba batok sa kinalabwang mga kampeyon sa Uropa ug sa kalibotan.

Sa maong panahon ako nakig-indig sa mga bangga sa Britanikong Liga ug nakahigayon sa pagpakiglumba sa Apollo Cup batok sa sagol nga natad sa mga siklistang may ranggong internasyonal. Sa akong unang pag-apil sa maong lumba, ako gisakit sa mga suliran sa makina, nga ako nabuthan sa akong motorsiklo. Busa akong gihulaman ang motorsiklo sa usa ka kaubang Australiano. Sa akong pagdali, ug sa paningkamot nga masinati ang wala-hianding motorsiklo, ako mipadagan nga nahigawas sa lumbaanan ug latas sa sentro sa natad nga usag rag ligid, nga ang atubang nga ligid naisa! Kadto nakalingaw sa panon apan wala akoy nakuhang puntos. Bisan pa niana, bisan pinaagi niadtong hinulamang motorsiklo, sa wala madugay ako nahibalik sa lumbaanan ug nakakuhag maayong eskor.

Balik sa Australia, samtang mihimog kahikayan uban sa ubang siklista sa sinugdanan sa 1968 yugto sa lumba, akong nahibalag si Suzette, usa ka dalaga nga moapektar ug dako sa akong kinabuhi sa daghang paagi. Siya lahi sa kasagarang matang sa dalaga nga tig-anhaan sa mga tindahag motorsiklo—lahi sa iyang sinultihan ug pamiste. Wala madugay akong nasayran kon ngano—ang iyang mga ginikanan mga Saksi ni Jehova, bisan pag siya mismo wala pa modawat sa ilang pagtuo. Kadto ang una kong pagkahibalag sa usang may nasayran bahin sa mga Saksi.

Hangtod niadto, ako wala gayoy hilig sa relihiyon. Ako nagtuo nga silang tanang interesado lamang sa pagpanapi, ug ako moingon dayon “Binuang!” kang bisan kinsa nga moangkong relihiyoso. Ang akong mga ginikanan, bisan tuod maayong mga tawo, dili relihiyoso, busa ako wala gayod mosimba sa bisan unsang simbahan samtang nagtubo. Dihang ako 21 anyos ang akong inahan mitanyag nga palitan niya akog Bibliya ingong gasa, apan ako siyang gibalibaran—puliki kaayo ako sa akong karera sa lumba sa motorsiklo sa paghunahuna sa relihiyon!

Akong gipadayon ang akong kanunayng pagbansay, ug sa wala madugay gibaslan ug daghang dagkong daog. Ako diha sa ekselenteng kahimtang alang sa umaabot nga mga programa. Unya diha pa ang dakong lumba nga gibatbat sa introduksiyon niining estoryaha. Kinsay nakadaog? Ang bayani sa lungsod nagpildi sa kampeyon sa kalibotan! Dili katingad-ang ang panon nahupngan sa kalipay.

Tapos niadto, ako napiling mohawas sa Queensland sa usa ka tigi nga bangga batok sa British Lions. Sila ang migahom sa ubang tigi nga bangga sa tibuok Australia. Akong nadaog ang tanang lumba nga akong gisugdan. Ang mga Ingles dili na ang hawod. Dinhi gibati ko ang unang bitad sa nasyonalismo. Unya ako gipili nga makiglumba alang sa Australia sa umaabot nga bangga tali sa Inglaterra ug Australia.

Nahitabo ang Disgrasya

Maoy nianang panahona nga akong giminyoan si Suzette. Siya didto alang sa dakong tigi batok sa Inglaterra. Sa pag-abot namo sa lumbanan, among gibati ang tensiyon. Kusog ang nasyonalismo. Kadto maoy mga Aussie batok Pommies. Tininuod ang among tuyo ug kami nagtinguha sa kadaogan. Ako giparis sa suod kaayong higala batok sa duha ka Ingles nga siklista.

Si Kev, ang akong paris, mao ang unang nakagawas sa ganghaan, nga ako ug usa ka Ingles nga siklista nagsunod kaniya. Unya gibabagan sa Ingles nga siklista ang akong paris. Ako mipaduol aron mouna kaniya. Ako iyang nakita, gisulayan ang pagpugong kanako, nga kusog kaayong mibalhin ug direksiyon—ug kami nagkabangga. Ako may mga aksidente sa nangagi, apan dili ingon niadto ka grabe. Kadtong aksidenteha halos nakapatay kanako. Ako gidala dayon sa ospital uban ang buak nga bagulbagol, nagising mga rinyon, ug naliking taludtod.

Si Suzette gisultihang magpabilin sa ospital, kay gidahom nga ako dili mabuntagan. Ako naulian sa panimuot tapos lamang sa pila ka adlaw sa ulahi. Hangtod niining adlawa dili tin-aw kanako ang nahitabo kanako niadtong unang semana sa ospital, gawas sa usa ka butang—ako miampo sa Diyos nga dili unta itugot nga ako mamatay! Ako dili sukad tighunahuna sa Diyos sa nangagi, apan sa dako kaayong panginahanglan ako nakahunahuna niadtog Diyos.

Ang Lumba sa Motorsiklo Mao ba Lamang ang Kinabuhi?

Gibati sa akong ugangang-babaye nga sa maong panahon ang napugos nga pagpuyo ko sa balay maayong panahon aron makakontak na usab kamig mga Saksi ni Jehova, busa iyang gisulatan ang nagdumalang magtatan-aw sa kongregasyon sa among silinganan, nga mihangyong may moduaw kanamo.

Giduaw kami sa usa ka Saksing magtiayon, ug ako misugot nga magtuon ug Bibliya sa usa ka kondisyon—nga ako makahunong sa panahong buot ko. Ang usa ka hinungdang misugot ako sa pagtuon mao nga ako gilaayan. Ug buot ko usab pamatud-ang ang mga Saksi sama ra sa tanang ubang relihiyon—nga nagaapas ug kuwarta. Bisan pa niana, tapos sa duha ka pagtuon, akong nasabtang may butang lahi. Ang Bibliya nagsugod sa pagkahimong makataronganon alang kanako, ug akong nasabtang ang ilang gipanulti may kamatuoran. Ug walay paghisgot sa pagpanapi kanamo.

Sa paglabay sa mga bulan, ako naulian sa kusog ug maikagong mibalik sa pagpakiglumba. Kadto ang akong kinabuhi, ug buot kong mosugod sa pagpakiglumba na usab sa labing madali. Ako may duha ka hinungdan alang niadto: Nahauna, ako gihukmang wala nay pulos sa mga palaumagian sa balita ug sa pipila ka higala; ikaduha, kinahanglang akong pamatud-an sa akong kaugalingon ug sa uban nga ako maayo gihapong siklista sama sa wala pa ang aksidente nga niana hapit akong matigbak.

Sa pagkamatuod, dali kaayo akong naulian nga ako andam na alang sa 1969-70 nga yugto sa lumba. Sa katingala sa tanan, ako malamposong nahibalik sa pakiglumba sa motorsiklo.

Kinahanglang Ako Magpili

Sa ulahi, kami mibalhin sa laing dapit, ug ang usa ka batan-ong Saksing magtiayon nagpadayon sa pagtuon sa Bibliya uban kanamo. Busa, ang pakiglumba ug ang Bibliya mao ang akong pangunang gikaikagan, nga ang pagpakiglumba mao gihapon ang panguna. Dayon inanay kong nakita ang kalainan tali sa mga Saksi ug sa akong mga kauban. Ang mga butang misugod sa pagkadayag niadtong panahona. Ako nasayod sa tanang panahon sa imoralidad ug sa pagkamatinugoton sa mga bana ug sa mga asawa sa lumbaanan, apan ako wala mabalaka niana sa nangagi. Ako nagtuo nga kadto ilang katungod, apan wala ko dad-a ang akong asawa ngadto sa bisan usa sa ilang mga parti o panagkatigom.

Sa nasabtan ko ang hunahuna ni Jehova mahitungod sa imoralidad ug ang kasakitang ipahinabo niana sa uban, misugod ako sa pagdumot sa akong nahibaloang nagkahitabo, bisan pag ako wala malangkit niana. Ang imoralidad, pagpanunglo, pamalikas, ug pagpasipala nakapagil-as na kanako. Ang pagkawalay pagtahod alang sa awtoridad ug sa uban labawng natataw samtang akong nakat-onan ang mga prinsipyo sa Bibliya.

Sa maomaong panahon, akong nabatonan ang ekselenteng tanyag nga makiglumba sa Amerika ingon man sa pagbalik sa Inglaterra. Ako nasayod nga akong makab-ot ang akong damgo nga mahimong usa sa hawod napulo ka siklista sa kalibotan. Apan nagpadayon sa pagkadaotdaot ang mga hitabo. Ug ako dili na makahimo sa pagpakighugoy sa mga tawo diha sa mga dapit sa alayohan ug gasolinahan sa lumbaanan sama sa nangagi. Ang mosamok nga mga pulong nagpadayon sa pagbalikbalik sa akong alimpatakan: ‘May adlaw nga kinahanglang ako magpili!’

Ako mahinumdom sa akong kataposan miting sa lumba tungod kay gihimo ko ang hinungdanong desisyon tungod sa mga sirkumstansiya. Ang kahimtang wala magkadimao sukad sa gutlo sa akong pagsulod sa mga dapit alayohan ug gasolinahan sa lumbaanan niadtong gabhiona. Ang pamalikas ug pagpanunglo katingad-anang nakapalagot kanako. Ang opisyal nga tigpasugod alang niadtong gabhiona may umagad-nga-lalaki sa lumba ug ang dayag niyang paboritismo nakapalagot sa tanang siklista. Ang kataposang binuang maoy sa dihang ako iyang gidiskuwalipikar sa sugdanan sa lumba bisan pag dayag nga laing siklista ang nakabugto sa teyp sa sugdanan.

Ako mipauli niadtong gabhiona nga naglagot kaayo ug nakaamgong ako dili na makaalagad ug duha ka agalon—ang lumba sa motorsiklo ug si Jehova. “Ako moretiro sa pakiglumba sa motorsiklo,” ako mipahibalo sa dili-makatuong si Suzette. Ug kadto akong gibuhat sa gilayon! Bisan pa sa dakong pagsupak sa akong pamilya, akong gibaligya ang akong mga motorsiklo ug ang kasangkapan sa pagsakayg motorsiklo. Ang pipila sa akong mga higala naghunahunang ako nabuang sa relihiyon.

Ang Kalipay sa Pag-alagad ug Usa ka Agalon

Sa maong panahon, sa unang higayon, ako miadto sa Kingdom Hall. Sa nangagi ako nababagan sa akong mga kasabotan sa lumba. Ang pag-abiabi ug kainit nga among nasinati niadtong unang miting sa Dominggo dili gayod namo malimtan. Kadto matahom nga pagbati, ug naamgohan ko nga ako dili na ulipon sa pakiglumba sa motorsiklo. Ako wala na magtinguha sa pag-alagad ug duha ka agalon. Sa maong panahon ako makadawat sa pagdapit sa pagtambong sa tanang Kristohanong miting. Ug ako maikagon sa pagsulti sa uban kon unsay akong natun-an, ilabina ang kahibulongang paglaom nga gitanyag diha sa mga bersikulo sa Bibliya sama sa Pinadayag 21:4: “Ug [ang Diyos] magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”

Ang akong asawa ug ako nabawtismohang dungan sa Brisbane sa 1970. Tapos niadto, kami mialagad sa Papua New Guinea sa taudtaod nga panahon, nga mitabang sa pagpakaylap sa maayong balita sa dapit diin dako ang panginahanglan. Karon kami nahibalik sa Australia, nga gipanalanginan ug tulo ka nindot nga anak lalaki. Sa tabang sa Pulong sa Diyos, ang Bibliya, sila among ginamatuto, dili aron mabuang sa lumba sa motorsiklo sama kanako sa nangagi, kondili aron mahimong mga sumusunod ni Kristo, nga mahigugmaon sa kamatuoran, ug mga magsisimba ni Jehova.—Sumala sa giasoy ni Les Bentzen.

[Blurb sa panid 16]

Sa akong pagdali, ako mipadagan nga nahigawas sa lumbanan ug latas sa sentro sa nataran sa usa ra ka ligid!

[Blurb sa panid 17]

Kusog kaayo ang nasyonalismo diha sa mga dapit alayohan ug gasolinahan sa lumbaanan