Lumba sa Bisikleta—Ang Pagtungas ug Paglugsong

NGA NAKIGBISOG, naghangos, nagtindak, apan wala gayod batia ug kakapoy, ako nakasegurong adunay kaayohan sa akong paningkamot. Human sa 25 kilometros nga pagtungas, sa kinatumyan sa Great Saint Bernard Pass, tali sa Switzerland ug Italya, ako maoy nag-una. Ang akong tigbansay misenyas gikan sa iyang awto nga ako nauna ug pipila ka minuto kay sa ubang maglulumba. Mahanduraw ko na ang akong kaugalingon nga nakadaog sa hugna ug nagsul-ob pa gani sa dalag nga tsaketa nga maoy ihatag niadtong anaa sa unang dapit.

Atubangan sa mga motorsiklo ug mga awto, ako tuling mipadagan sa bisikleta ngadto sa pikas daplin nga wala magbantay. Sa tungatunga, kalit kaayo ang akong pagliko. Ang ligid nga anaa sa likod nadalin-as ug ako nalagpot palayo sa dalan. Sa dakong kasubo, gihuman ko ang hugna, apan wala ako makadawat sa dalag nga tsaketa ug sa himaya. Ako wala makadaog sa 1966 Tour de l’Avenir.

Sa Unsang Paagi Mitubo ang Akong Kasibot

Ako natawo sa Brittany human sa ikaduhang gubat sa kalibotan. Sa kasadpang Pransiya ang pagbisikleta popular kaayo, ug ang rehiyon nakapatunghag daghang mga kampeon. Sa bata pa ako motan-aw sa lokal nga mga lumba ug wala gayod mopakyas sa Tour de France diha sa telebisyon. Nga nagtan-aw sa mga nagbisikleta nga naghago pagtungas agi sa makapaukyab nga mga dalan sa bukid ug tuling modulhog sa labihan katitip nga mga bakilid, ako naghunahunang sila daw mga diyos.

Sa nag-edad ug 17 anyos, ako mihukom sa pagsulay niana. Pinaagi sa tabang sa usa ka negosyanteg bisikleta, ako mipalit sa akong unang bisikletang panglumba nga segunda-mano. Diha ako ing bug-os nga programa: pagbansay matag Dominggo sa buntag ug sa dili pa ug human sa trabaho matag semana. Duha lang ka bulan sa ulahi, nga ang dughan nagkubakuba, ako misugod sa akong unang lumba. Ako unta ang makadaog kon wala pa makaapas nako ang pundok sa mga maglulumba napulo ka metros lamang gikan sa dag-anan! Sa tibuok tuig, naapil ako sa unang 15 nga nakaabot sa dag-anan sa halos tanan nakong mga lumba.

Niadtong 1962 wala ra magdugay ang akong pag-apil sa lumba. Human sa tulo ka bulang pakiglumba ug daghang mga kadaogan, ako girekluta alang sa 18 ka bulang militaryong serbisyo sa Algeria. Human sa akong pagbalik sa Pransiya, akong gigugol ang tuig 1965 nga nagpasibo pag-usab sa pagbisikleta. Apan sa misunod nga panahon sa lumba, ako determinado gayod sa pagtagamtam na usab sa kalipay nga makadawat ug pongpong sa mga bulak nga ihatag sa mananaog.

Gikan sa Marso 1966 padayon, kadaghan ako makadaog. Matag panahon nga ako diha sa una o ikaduhang dapit sa lumba, ako nakabaton ug mga puntos nga sa ngadto-ngadto mipauswag nako ngadto sa taas nga kategoriya, diin ang lumba labaw pa ka lisod. Apan, nianang panahona, ako nagtrabaho uban sa akong amahan nga nagpahamis ug nagpasinaw sa mga tablang salog. Ang trabaho nakapalapoy kaayo ug nagpugong nako sa paggugol ug dakong panahon sa pagbisikleta nga buot unta nako. Busa sa dihang nakab-ot nako ang gidaghanon sa mga puntos nga gikinahanglan aron magpabilin sa akong kategoriya, gitagbaw nako ang akong kaugalingon sa bonus nga kita panahon sa nahibiling mga lumba, apan magpapildi usab ako aron dili mabalhin sa taas nga kategoriya.

Kusog nga Pag-uswag

Tungod sa mga resulta, tulo ka tem mitanyag nako ug mga kontrata sa lumba. Ako midumili aron dili nako mabiyaan ang akong amahan. Apan, ang labing pugosong tigbansay nag-aghat sa akong amahan nga mohatag nako ug usa ka semanang permiso nga mopalta aron sa pagpakiglumba diha sa usa ka malisod nga lumba sa kabukiran sa Pyrenees subay sa Pranses-Espanyol nga utlanan. Ako ang ikaduhang mananaog, busa kami mipadayon sa Espanya, diin ako nakadaog sa Tour of Catalonia alang sa mga bag-ohan. Pipila ka adlaw sa ulahi, ako nakiglumba sa Tour of the Balearic Islands, nakadaog sa unang hugna, ug misul-ob sa tsaketa, apan nahanaw kana sa kataposang adlaw sa usa ka mubong hugna tungod kay ang akong tem miundang.

Unya gihimo ang Route de France sa rehiyon sa Nice. Ako mihawod sa daghang mga hugna sa lumba ug midaog sa tropiya alang sa labing batid sa bungtod. Tungod sa maong maayong mga resulta, ako napili nga usa sa nag-unang napulo ka maglulumba ug gidapit sa paghawas sa Pransiya sa Tour de l’Avenir, ang amatyur nga bersiyon sa Tour de France.

Sulod nianang duha ka bulan, ang bugtong balita nga gibasa sa akong pamilya mao kadtong bahin sa esports diha sa mga mantalaan. Nga naghunahuna sa akong amahan ug sa kamatuoran nga gihatagan lamang niya akog usa ka semana, gidumilian ko ang tanyag ug mipauli. Apan ang akong tigbansay ug ang usa ka manunulat sa esports naghaylo sa akong amahan nga ako usa sa paglaom sa Pransiya nga modaog sa lumba sa bisikleta, busa gitugtan niya ako. Abi ko ug nagdamgo ako! Pipila lamang ka bulan nga nangagi, ako diha sa ikatulo o ikaupat nga kategoriya sa amatyur, ug karon ako napili alang sa labing importanteng amatyur nga lumba sa bisikleta sa kalibotan! Sumala sa akong gihisgotan sa sinugdanan, ang pagkatumba nakadaot sa akong purohan nianang 1966 nga Tour.

Niadtong 1967, midaog ako ug halos napulo ka lumba sa bisikleta, nakiglumba sa Paris-Nice nga lumba, ug midaog nga ikaupat sa Tour du Morbihan, sa Brittany. Niadtong 1968, sa edad nga 24, ako mipirma sa akong unang propesyonal nga kontrata, nga mianib sa tem ni Jan Janssen nga usa ka Olandes nga maglulumba. Kami nakiglumba sa Tour de France, ug si Jan midaog nianang tuiga. Kasamtangan, human sa usa ka sulay nga lumba sa Rennes, Britanny, nahibalag ko si Danielle, kinsa mitan-aw sa lumba sa bisikleta sa unang higayon. Dili kadto maoy iyang kataposan, tungod kay kami naminyo pagkasunod tuig.

Pagkamahal alang kanako kadtong mga adlawa​—ang pakigtambayayongay sa tem, ang kinabuhi sa tigpanaw, nga nakakita ug bag-ong mga lungsod ug talan-awon matag adlaw! Wala ako mokitag daghang salapi, apan walay bale kadto tungod kay ang kalipay sa pagpakiglumba makapatagbaw kaayo. Milampos ako sa daghang mugbong mga lumba ug naglaom nga modaog sa usa sa dagkong mga lumba. Apan, ako nakaamgo nga ang dakong kal-ang nagbulag sa amatyur ug propesyonal nga mga maglulumba sa bisikleta.

Ang Bantogang mga Kampeon . . . ug ang Uban

Sa panahon sa lumba niadtong 1969, nakig-tem ako sa bantogang Pranses nga siklista nga si Raymond Poulidor. Milumba ako sa tradisyonal nga mga lumba sa bisikleta nga dangtag usa ka adlaw​—Paris-Roubaix ug ang Flèche Wallonne, sa Belgium. Nakaapas ako sa labing maayong mga siklista sa mga dalan sa bukid, nga dihay igo-igong kalamposan sa daghang hugna sa lumba. Apan, labaw sa bisan unsa, ako nalipay nga nakadaog sa lokal nga mga lumba sa Brittany atubangan sa pundok sa tumatan-aw nga akong gimahal.

Apan kasukwahi sa akong gilaoman, sama sa daghang uban pang mga maglulumba wala ako hatagi sa pisikal nga mga katakos sa usa ka bantogang kampeon. Sa usa ka mahago nga hugna sa Tour of Spain, kinahanglang moundang ako tungod sa niyebe ug ulan. Didto akong naamgohan nga ang bantogang mga kampeon adunay labawng katakos, kanang linaing katakos nga nakapaarang nila sa pag-antos sa makapagbang kainit ug hilabihang kabugnaw. Pananglitan, wala ako sa samang kategoriya ni Eddy Merckx, ang kampeon sa Belgium nga nabantog sa pagbisikleta nianang panahona. Dili kaduhaduhaan nga lupig niya kami. Sa pagkatinuod, kanunay akong maulahi niya sa mga lumba nga iyang giapilan.

Panaghiusa Taliwala sa mga Maglulumba

Ang panaghiusa naglungtad bisan taliwala sa nag-indigayng mga tem. Personal ko kining nasinati panahon sa usa sa labing malisod nga mga hugna sa 1969 nga Tour de France. Sa miaging gabii, miabot kami sa among otel nga lapoy human sa serye sa hagong mga hugna sa lumba sa bukid. Ang relong may alarma mikiring sa alas siyete sa sunod buntag. Sa naandan, ang abunda nga pamahaw nagpaabot kanamo tulo ka oras una pa ang lumba.

Sa sinugdan, mga 150 lamang kami, ang tanan nag-asoy sa ilang mga pagtungas ug paglugsong sa milabayng pipila ka adlaw, apan nag-amping nga dili ipadayag ang mga taktika sa tem alang sa lumba sa unahan. Kadto makapaluyang adlaw. Kining maong hugna nagsugod sa Chamonix, sa tiilan sa Mont Blanc, padulong sa Briançon, nga may 220 kilometros nga mga dalan sa bukid ug tulo ka dagkong dalan nga labangon.

Sugod pa sa sinugdanan, tulin kaayo ang among pagpadagan. Sa pagtungas nako sa 1,984 metros nga Madeleine Pass, nasayod akong kadto dili maayong adlaw alang kanako. Dihay ulan, ug samtang kami nagtungas, ang ulan nahimong niyebe. Sa tayuktok, unom kanamo nga naggikan sa lainlaing tem naulahi nag pipila ka minuto sa mga lider. Nga nagkurog sa katugnaw, midulhog kami, nga ang among mga tudlo nanuskig pag-ayo nga dili na kami makapreno, busa kinahanglang itukod ang tiil aron sa pagpahunong. Sa ubos, usa ka opisyal misenyas gikan sa iyang awto nga ang among ulahing pag-abot sa walay-duhaduha makapapha kanamo gikan sa lumba. Naminghoy kaayo ko sa hunahunang makita ang akong Tour de France nga matapos sa dapit nga gimahal ko kaayo, ang kabukiran.

Bisan kon ang among mga paningkamot daw makawang, ang labing batid nga siklista taliwala namo nagdasig namo nga dili moundang. Gidasig niya kami, gihan-ay ang grupo, ug misugyot nga kami magpulipuli sa pagpanguna sa grupo. Kami milahutay. Sa dihang miabot kami sa pundohanan sa mga abiyo, kadto sirado na, apan among giambitan ang diyutayng pagkaon nga nahibilin.

Sa dihang kami didto na usab sa walog, ang kainit naghatag kanamo ug nabag-ong kusog. Miaginod ang panahon, ug diha na sa atubangan namo ang duha ka dakong babag nianang adlawa​—ang Telegraph ug Galibier nga mga dalan, nga maoy 1,670 metros ug 2,645 metros ang gihabogon sa matag usa. Sa pagtungas, usa ka kahibulongang sorpresa nagpaabot kanamo. Sa usa ka likoanan, latas sa mga tumatan-aw, naaninaw namo ang daghag-bulok nga pundok. Oo, nakaapas kami sa uban. Gilabyan namo ang pipila nga miundang ug ang uban nga daw dili na makabangon. Nakita ko ang usa sa mga batan-ong gilaoman sa Belgium nga naglakaw, lapoy nga nagtulod sa iyang bisikleta. Nakaapas ako sa akong lider sa tem ug mitapos sa unang hugna sa igo-igong gidugayon.

Kining tanan nagtudlo kanako ug hinungdanong pagtulon-an nga wala gayod nako makalimti: Samtang wala pa makaabot sa dag-anan, ang lumba wala pa mapildi o madaog. Dugang pa, dili ko gayod hikalimtan ang naglungtad nga espiritu sa pagpaluyo sa usag-usa, bisan taliwala sa nag-indigayng mga tem.

Unang Kontak sa Bibliya

Niadtong 1972, una kong nadunggan ang mensahe sa Bibliya. Usa ka siklistang ginganlag Guy, nga bag-o pa lang mibiya sa propesyonal nga lumba, miduaw ug naghisgot sa iyang bag-ong relihiyon. Ako siyang giingnan nga dili ako interesado ug ang tanan nagtuo nga ang iyang kaugalingong relihiyon maoy labing maayo. Gipakitaan ako ni Guy ug pipila ka bersikulo sa Bibliya ug mitubag sa akong pagsupak pinaagi sa pag-ingong sanglit daghang relihiyon nag-ingon nga ang ilang tinuohan naggikan sa Bibliya, kinahanglang sayon sulayan ang ilang mga tinuohan batok sa kamatuoran sa Pulong sa Diyos.

Nakadungog na ako mahitungod sa Bibliya, apan ingong wala-magatuman nga Katoliko, wala ako maghunahuna nga ang Bibliya adunay kalabotan sa akong relihiyon. Sa gihapon, gibati nako nga ang among panag-estoryahay tukma sa higayon tungod kay ang usa sa mga paryente sa akong asawa, nga usa ka Katolikong misyonaryo, moduaw kanamo, ug makahisgot kami niining tanan uban kaniya.

Ang paryente sa akong asawa nagpamatuod nga ang Bibliya mao gayod ang Pulong sa Diyos. Apan, giingnan niya kami nga magmabinantayon tungod kay, sumala niya, ang mga Saksi ni Jehova maoy maayong mga tawo, apan sila nagalimbong sa uban. Sa dihang nakita ko pag-usab si Guy, ako siyang gipangutana bahin niini. Siya misaysay nga kasukwahi sa gitudlo kanako sa simbahan, ang doktrina sa pagkadili-mamatay sa tawhanong kalag wala sa Bibliya. (Ezekiel 18:4) Siya usab nangutana nganong ang paryente sa akong asawa wala mogamit sa ngalan sa Diyos, nga Jehova.​—Salmo 83:18.

Ako nahibulong sa pagkasayod nga ang Diyos adunay ngalan. Sa dihang gipakita namo kining mga bersikuloha sa paryente sa akong asawa, siya miingon nga ang Bibliya kinahanglang dili sabtong literal ra kaayo. Ang among panaghisgot uban kaniya walay pag-uswag, ug si Guy mibalik sa Paris, diin siya nagtrabaho.

Si Guy mibalik sa Brittany usa ka tuig sa ulahi ug miduaw kanamo. Iyang gisugdan pag-usab ang among panaghisgot pinaagi sa pagpakita kanamo nga ang Bibliya maoy matagnaong basahon usab. Kini nakadasig namo sa pagtuon pag-ayo niana. Ang among panaghisgot nahimong makanunayon. Apan, si Guy kinahanglang magmapailobon kaayo kanako, sanglit ang akong kinabuhi nalangkit gihapon sa pagbisikleta ug sa tanang apil niana​—mga higala, mga tigpaluyo, ug uban pa. Dugang pa, kay naggikan sa Brittany, nga usa ka rehiyong dulot nga nalangkit sa relihiyosong mga tradisyon, ang among mga pamilya misupak sa among bag-ong interes sa Bibliya.

Niadtong 1974 ang akong karera sa paglumba kalit nga nahunong tungod sa aksidente sa dalan. Kini nakapahunahuna kanamo kon unsa gayod ang tinuod nga hinungdanon sa among kinabuhi. Ang akong asawa ug ako mihukom nga mobiya sa among lungsod ug sa impluwensiya sa among mga pamilya. Nianang panahona kami nagsugod sa pagtambong nga regular sa mga tigom sa Kingdom Hall sa Kongregasyon sa Dinan. Kaming duha miuswag sa kamatuoran, ug kami nabawtismohan niadtong 1976.

Sukad niadto nakabaton akog kahigayonan nga mosulti bahin sa Bibliya ngadto sa pipila ka maglulumba sa bisikleta sa akong kaliwatan. Dugang pa, sa dihang ako mamalaybalay, daghang mga tawo ang nakaila kanako ug malingaw sa pagpakighisgot mahitungod sa akong karera sa lumba sa bisikleta. Hinuon, dihay pipila nga dili ingon ka madasigon sa dihang ako magsulti mahitungod sa mensahe sa Gingharian.

Sa pagkakaron, dihang bation nako ang panginahanglan sa maayong ehersisyo, magbisikleta ako uban sa akong pamilya. Niining mga yugtoa, ako nakaapresyar sa kamatuoran sa mga pulong ni Pablo dihang siya miingon: “Ang lawasnong pagbansay adunay diyutayng kaayohan; apan ang diyosnong debosyon makaayo sa tanang mga butang, sanglit kini adunay saad sa kinabuhi karon ug sa umaabot.”​—1 Timoteo 4:8.​—Sumala sa giasoy ni Jean Vidament.

[Kahon/​Mapa sa panid 16, 17]

Ang Tour de France

Ang labing bantogang lumba sa bisikleta sa kalibotan, ang Tour de France nagsugod niadtong 1903. Kini nagkobre gikan sa 4,000 ngadto sa 4,800 ka kilometros ug dangtag mga tulo ka semana, nga karon mahuman sa Paris. Mga 200 ka propesyonal nga mga maglulumba ang mosalmot niining maong lumba, nga moagi sa kabanikanhan sa Pransiya uban sa pipila ka mubong pagsulod sa silingang mga nasod. Ang panon sa mga tumatan-aw diha sa agianan mag-abiba sa mga maglulumba.

Matag adlaw ang maglulumba nga nakatapos sa mga hugna sa kinamub-ang panahon maoy mosul-ob sa dalag nga tsaketa. Ang nag-una sa tanan sa kataposang adlaw mao ang mananaog.

Ang pipila sa kinamub-ang mga hugna maoy mga lumba sa pagsulay, diin ang mga indibiduwal o mga tem mohuman sa lumba sa kinamub-ang panahon. Sa lumba sa pagsulay nga seksiyon, ang gitino-daang gidaghanon sa mga maglulumba nga nasakop sa samang tem kinahanglang mohuman sa hugna ingong usa ka pundok, ang tanan sa samang higayon.

[Mapa]

Tour de France nga lumba sa bisikleta

Pransiya

ROUBAIX (start)

PARIS

[Hulagway sa panid 16]

Niadtong 1968, sa panuigong 24, si Jean Vidament nakiglumba sa Tour de France

[Picture Credit Line sa panid 15]

Mike Lichter/​International Stock