Pagsulbad sa Misteryo

NGA ang mga gahom nga labaw pa sa normal nakahimo sa mga tawo sa paghimog dili-ordinaryong mga buhat napamatud-an. Si Brian Inglis miingon: “Ang paranormal nga katingad-anan mas duol karon sa pormal nga pag-ila kay sa mga panahon sa edad-media—dihang gilantaw kini nga normal, bisag dili kaayo matag-an, sama sa uban pang mga gahom sa kinaiyahan.”

Unsa ang tuboran niining dili-ordinaryong mga gahom? Buweno, sa libolibo ka tuig, ang kadaghanan sa tawhanong pamilya nagtuo nga ang mga kalag sa patay buhi sa kalibotan sa espiritu. Ug gituohan sa kadaghanan nga kining mga kalag ug mga espiritu sa patay mao ang responsabli ning katingalahang mga hitabo. Apan tinuod ba?

Ang Patay ba ang Responsabli?

Kon may panimuot ang patay—tinuod nga patay—nan imposible alang kanila nga mahimong misteryosong mga gahom sa likod sa okulto. Nan, unsay kahimtang sa patay?

Nagbatbat sa paglalang sa tawo, ang Kasulatan nag-ingon: “Ang tawo nahimong buhi nga kalag.” (Genesis 2:7, King James Version) Matikdi nga wala bisan na lang gamayng pasabot dinhi nga ang tawo gihatagag kalag ingong usa ka bahin sa iyang pagkamao. Hinunoa, ang kalag klaro nga mao ang tawo mismo. Busa, unsay mahitabo dihang mamatay ang tawo?

Mahitungod kang Jesu-Kristo, ang Bibliya nagtagna: “Iyang gibubo ang iyang kalag ngadto sa kamatayon.” (Isaias 53:12, KJ) Ug maylabot sa katawhan sa kinatibuk-an, ang Kasulatan nag-ingon: “Ang kalag nga makasala, kini mamatay.” (Ezekiel 18:4, 20, KJ) Ang tanang kalag sa tawo mamatay tungod kay silang tanan nakapanunod sa sala gikan sa unang tawo, si Adan, kinsa nahimong makasasala tungod sa pagsupak sa Diyos. Ug ang Bibliya nag-ingon: “Ang bayad sa sala mao ang kamatayon.” (Roma 5:12; 6:23, KJ) Busa diha sa kamatayon, ang kalag, ang may panimuot nga tawo, mamatay.a

Busa, posible bang makapakigsulti ang patay sa mga buhi? Ang Bibliya nag-ingon: “Moginhawa ang [tawo] sa iyang kataposang gininhawa, sa yuta siya mobalik; ug nianang adlawa mahanaw ang iyang hunahuna.” Ang Bibliya nag-ingon usab: “Dili ang mga patay ang magadayeg sa GINOO, ni ang mga manganaog sa hilom; apan kita, nga buhi, ang makadayeg sa GINOO.”—Salmo 146:4; 115:17, The New English Bible.

Sanglit ang patay dili na man makadayeg sa Diyos tungod kay ang ilang ‘hunahuna nahanaw na,’ sila dili gayod makapakigsulti sa buhi ni mao ang responsabli sa bisan unsang katingalahang mga hitabo. Nan kinsa ang responsabli?

Ang Misteryo Nasulbad

Ang tawo dili mao ang labing-hataas nga porma sa kinabuhi. Ang Bibliya nagpadayag nga sa dugay nang panahon sa wala pa lalanga sa Diyos ang lalaki ug babaye, siya naglalang ug panonpanon sa espirtu nga mga anak, ang dili-makitang mga manulonda. (Job 38:4, 7) Sa ulahi, ang usa kanila misugod sa pagsupak sa Diyos, iyang gibutangbutangan pa gani siya, busa nahimong Satanas (magsusupak) ug Yawa (tigbutangbutang). Sa ulahi, ang ubang espirituhanong mga linalang miduyog kang Satanas nga Yawa sa iyang pag-alsa, nagpormag organisasyon sa rebelyosong mga manulonda, o mga demonyo. Ang mga demonyo ba ang responsabli sa katingad-anang butang sa okultismo?

Oo, sila gayod! Sa panahon sa wala pa ang Lunop kining mga espiritu nga “mga anak sa tinuod nga Diyos” makahimo sa pagmateryalisar sa unodnong mga lawas ug sa pagpuyo sa yuta. (Genesis 6:1, 2; Judas 6) Apan dihang mibalik sa kalibotan sa espiritu, ang ilang pagpakigharong sa mga tawo limitado lang sa pagpahinabog katingalahang mga hitabo nga komun sa bug-os nga kasaysayan sa tawo.

Ang mga demonyo nakapakigsulti sa buhing mga paryente ug mga higala sa patay, nga nakapatuo niining mga tawhana sa kabakakan nga buhi gihapon ang patay sa usa ka dapit sa kalibotan sa espiritu. Ang pagsundog sa patay dili suliran sa mga demonyo, sanglit makapaniid silag maayo sa mga tawo samtang buhi pa sila. Busa, ang gagmayng mga detalye sa kinabuhi sa tawo, lakip sa tingog ug paagi sa paglihok, tukmang masunod.

Apan, tingali mangutana ka, unsay ikasulti mahitungod sa maunongong mga manulonda? Tingali nagapakigsulti sila sa mga tawo karon. Tinuod nga gigamit sa Diyos ang mga manulonda sa pagpakigsulti sa mga tawo sa unang mga panahon. Apan, karon, kita may kompleto nang Bibliya ingong direkta ug igong komunikasyon sa Diyos alang kanatong mga tawhanon. (2 Timoteo 3:16, 17) Diha niana espisipikong nagdili si Jehova nga Diyos sa pagsulay sa pagpakigsulti sa mga espiritu.

Pinaagi sa iyang propetang si Isaias, ang Diyos miingon: “Apan ang mga tawo manag-ingon kaninyo sa pagpangayog mga mensahe gikan sa mga mananagna ug sa mga espiritista, nga managpiyak ug managyamyam. Moingon sila, ‘Total, ang mga tawo mangayog mga mensahe gikan sa mga espiritu ug magpakisayod sa mga patay alang sa mga buhi.’ Kinahanglang tubagon mo sila, ‘Pamati sa gitudlo sa GINOO kaninyo! Ayaw kamo pamati sa mga espiritista—kay ang ilang isulti kaninyo dili makaayo kaninyo.’”—Isaias 8:19, 20, Today’s English Version.

Dili ikatingala nga naghatag ang Diyos ug detalyadong mga instruksiyon sa nasod sa Israel sa paglikay sa mga buhat sa okulto. Dihang misulod sa Yutang Saad, ilang gipasidan-an sila nga dili magpalangkit sa “dulumtanang mga batasan” sa mga Canaanhon. (Levitico 18:3, 30) Ang mga detalye niining mga batasana o mga buhata gilista diha sa Deuteronomio 18:10, 11. Naglakip kini sa paggamit ug pagpanagna, salamangka, pagpangitag mga tilimad-on, pamarang, paglamat, pagkonsulta sa mga tigtagna sa mga hitabo, ug sa pagpangutana sa mga patay.

Pagbantay sa Okulto!

Sa unang tan-aw, kadtong “dulumtanang mga batasan” daw dili makadaot. Apan adunay nagpahiping kapeligrohan didto. Sa unsang paagi? Tungod kay kadtong mga buhata moagak sa pagpakiglangkit sa mga demonyo. Ang kahugawan sa mga Canaanhon ug sa ilang dakong tinguha sa sekso ug kapintasan nagsilbing ebidensiya niini.

Karon adunay samang kapeligrohan sa pagpangagpas ug kaikag sa paranormal. Mahimong usa kini ka bitik nga motultol sa pagkalaang sa mga gahom sa demonyo. Dili na kinahanglang motan-aw ka pa sa layo sa pagkaplag ug mga taho sa sekso ug kapintasan nga nalangkit diha sa mga buhat sa okulto sa atong adlaw. Busa, alang sa imong kaayohan nga imong patalinghogan ang pasidaan.

Ang sugo sa Diyos sa Israel sa karaan nagpasiugda ug dugang pang importanteng katarongan sa paglikay sa okulto. “Kay ang bisan kinsa nga nagabuhat niining mga butanga dulumtanan kang Jehova.” (Deuteronomio 18:12) Ang dinasig nga Kristohanong mga magsusulat sa Bibliya miuyon niining pundamental nga kamatuoran. Gilista ni apostol Pablo ang “buhat sa espiritismo” ingong usa sa “mga buhat sa [nahulog] nga unod.” (Galacia 5:19, 20) Ug gisulat ni apostol Juan ang pasidaan sa Diyos nga ang bahin niadtong “nagabuhat ug espiritismo . . . mao ang linaw nga nagasilaob sa kalayo ug asupri. Kini nagkahulogang ikaduhang kamatayon.”—Pinadayag 21:8.

Ang ubang mga tawo tingali motuo nga walay peligrosong sangpotanan ang pagdula sa bisan unsang butang nga daw dili-makadaot sama sa Ouija board. Apan, ang usa ka grupo sa mga drayber sa bus sa Inglaterra nga nagdula niini sa panahon sa ilang pahulay nakakaplag nga ang ilang tinamdan sa usag usa misugod sa pagbag-o. Ang pipila sa tagsaon maisog. Naapektohan niining kaisipana ang ilang pagmaneho. Sila miingon nga gibati nila ang dakong pangagda sa pagmaneho sa ilang mga sakyanan sa nagsugat nga trapiko nga walay katarongan.

Unya anaa pa ang usa ka batan-ong babaye nga nag-eksperimento sa Ouija board ug natugkan ug kagustohan sa nangagi. Siya nagtuo nga nahigugma siya sa usa ka tawong namatay na sa miaging 300 ka tuig. Naningkamot gayod siya sa pagpakigsulti kaniya. Ang iyang kabuang sa kataposan miagak kaniya sa paghikog pinaagi sa paghigda diha sa relis sa tren. Ang kapolisan nga nag-imbestigar sa iyang kaso nakakaplag ug mga talaadlawan nga nagpakita nga gusto siyang mamatay aron makauban ang iyang minahal.

Busa bisag sa imong hunahuna wala kaayo kay kaikag sa okulto, magbantay! Sunda ang Kasulatanhong tambag: “Magmalinawon kamo sa inyong hunahuna, managtukaw kamo.” Hinumdomi kon kinsa ang nagapaluyo sa okulto. “Ang imong kaaway, ang Yawa, nagalibotlibot sama sa leon nga nagangulob, nga nagapangitag usa nga iyang matukob.” (1 Pedro 5:8) Ayaw itugot nga mahimong ikaw unya kanang maong “usa!”

Nga ang Yawa ug ang iyang mga demonyo tinuod nga naglungtad, ug nga sila tinuod nga makaimpluwensiya sa kinabuhi sa tawo, giilustrar sa sunod nga artikulo.

[Mga footnote]

[Blurb sa panid 10]

Siya nagtuo nga nahigugma siya sa usa ka tawong namatay na sa 300 ka tuig kanhi

[Letrato sa panid 9]

Ang patay ba ang ilang gipakigsultihan?