Gikan sa Among mga Magbabasa

Wala Matawong mga Bata

Ako adunay upat ka matahom nga mga anak. Wala pa ako matandog sukad nga nabasa ko ang “Usa ka Sulat Gikan sa Usa ka Wala Matawong Bata.” (Disyembre 22, 1986) Nakapatay akog duha ka inosenteng kinabuhi gikan sa duha ka tawo nga wala gayoy makaila. Ug masakit alang kanako ang paghunahuna nga si Jehova lamang ang ilang higala, nga sa ingon daw dili ko kana maantos. Nagtuon na ako karon uban sa mga Saksi ni Jehova, ug tim-os akong nagapaningkamot sa pagpadapat sa akong kaugalingon. Kining sulata nakapaamgo kanako sa makalilisang nga mga butang nga akong nahimo. Buot kong ipahibalo sa inahan nga ang iyang sulat nakahatag kanakog kinasingkasing nga kaisog ug determinasyon sa pagtudlo sa akong buhi nga mga anak sa tanang butang nga akong nakat-onan mahitungod kang Jehova aron maluwas ang ilang mga kinabuhi. Nasabtan na nako karon ang kahulogan sa kasulatan, ‘managpakaagom sila sa ilang kaugalingon sa bug-os nga balos.’ [Roma 1:27] Salamat kaayo kaninyo.

T.S., Tinipong Bansa

Bag-o pa lang akong nakatiwas sa pagbasa sa “Usa ka Sulat Gikan sa Inahan sa Usa ka Wala Matawong Bata,” ug nakita ko kini nga makatugaw kaayo. Makatugaw tungod kay, inahan usab ako sa usa ka wala matawong bata. Aduna akoy upat ka matahom nga mga anak, ug dihang magtan-aw ako kanila nahibulong ako kon nganong nabuhat ko ang makalilisang nga butang. Bisag wala pa ako sa kamatuoran niadtong panahona sa paghulog sa bata, mibati gihapon ako nga sad-an. Karon nga nahibalo na ako mahitungod sa atong katingalahang Maglalalang, si Jehova, mas labi pang nag-antos ako sa pagtulisok sa konsensiya nga nahimo ko kining mangilngig nga butang sa usa sa iyang mga linalang. Buot kong balikon usab ang gipamulong sa inahan diha sa sulat. Kon adunay usa dinha nga naghunahuna sa pagpakuha sa bata, palihog ayaw kanag buhata. Mobalikbalik gayod kanunay kanimo ang panumdoman sa imong tibuok kinabuhi. Pangitaa si Jehova ug ang iyang matarong nga mga dalan ug sumalig nga tabangan ka niya. Palihog ayawg buhata ang sayop nga among nahimo.

Laing Sulat sa Nagbasol nga Inahan, Tinipong Bansa

Buot kong ipahayag ang akong apresasyon mahitungod sa “Usa ka Sulat Gikan sa Inahan sa Usa ka Wala Matawong Bata.” Ako, usab, nag-antos sa dili mohawang pagbating sad-an. Dili sama sa babaye diha sa artikulo nga may tulo ka matahom nga mga anak, karon dili na ako makabaton ug mga anak. Wala ako pakatulga sa akong konsensiya nga nakapatay ako sa akong kaugalingong anak. Nakat-onan ko na ang kamatuoran karon, ug ang akong pagsalig kang Jehova nakatabang kanako sa pag-antos niini. Uban ang dakong pagbasol.

C. D., Tinipong Bansa

Wala ako makasabot kon nganong ipatik pa ninyo ang “Usa ka Sulat Gikan sa Inahan sa Usa ka Wala Matawong Bata.” Nakasabot ako nga gituyo kadto aron mapugngan ang umaabot nga mga aborsiyon, diin uyon usab ako niana. Apan, daghan kanamo nakadangat sa kamatuoran nga gitalikdan ang mga estilo sa kinabuhi nga nagatugot sa maong mga butang. Dihang nakadangat kita sa pagkahibalo kang Jehova ug sa iyang maluloton mahigugmaong mga kaluoy, gilaoman nato ang iyang kapasayloan niining makalilisang nga sala. Ang artikulo nakapabati kanako nga daw kinahanglang dalhon ko kanunay kining pagbating sad-an.

Naningkamot sa pag-alagad kang Jehova uban ang mahinlong konsensiya, Tinipong Bansa

Ang sulat maoy kapahayagan sa pagbati sa tagsulat, ug wala kadto tuyoa sa pagpabug-at sa kang bisan kinsa sa iyang pagbating sad-an. Kita tinuod makasalig nga kon atong isugid ang atong mga sala ngadto sa Diyos ug tul-iron ang atong mga dalan, ang Diyos dili lamang mopasaylo sa atong mga sala kondili mohinlo kanato gikan sa tanang pagkadili-matarong. (1 Juan 1:9) Bisan ug tinuod ang kapasayloan sa Diyos, kini niining presenteng sistema sa mga butang dili makawala sa pisikal ug emosyonal nga mga sangpotanan sa aksiyon sa usa. Apan, kita masaligon nga sa bag-ong sistema sa mga butang sa Diyos, ang mga butang nga miagi dili na pagahinumdoman, ni motungha pa kini sa kasingkasing. (Isaias 65:17) Ang sulat gipatik sa pagpakita sa makasubong mga sangpotanan nga resulta sa pagkuha sa tawhanong kinabuhi.—ED.