Aborsiyon—Kinsa ang Husto?

ANG duha sa espesyalista nagsulti kanimong ang imong bata may 0.1-porsiento lamang nga purohang mabuhi. Kon kini mahimugsong buhi, kini magbatog seryosong mga depekto ug mahimong mamatay sulod sa pila ka adlaw. Unsay imong buhaton? Ikay ba mamasin? O magbaton ug aborsiyon?

Usa ka situwasyon nga lamit dili mahitabo, tingali kana ang imong pagbati. Apan kini mahimong mahitabo, ug nahitabo gayod, sa London, Inglaterra. Ikalipay, ang ospital nagpaluyo sa desisyon sa mga ginikanan nga ipadayon ang pagmabdos. “Sa bisan unsang ang -ang sa pagmabdos kami wala gayod sultihi nga magbatog aborsiyon,” masaysay ang amahan. Karon sila may usa ka anak lalaki, nga natawong walay bisan unsang depekto sa lawas.

“Kami dayag nalipay,” matud sa usa sa medikal nga mga konsultant, nga midugang: “Ang suliran mao nga walay bisan unsa sa biyolohiya ang 100 porsiento.” Matuod, apan ang sayop nga paghukom sa usa ka doktor (o sa usa ka ginikanan) maoy usa ra ka bahin sa suliran sa aborsiyon karong adlawa.

Nagkasumpakiay nga mga Hinungdan

Ang medikal ug etikal nga mga isyu pabor ug kontra sa aborsiyon maoy emosyonal kaayo. Ang nagaduso nga mga pundok gikan sa duha ka kiliran nagapatugbaw sa sinserong mga tingog aron pamatian ug sabton, ug ang lantugi kadaghanan mapait. Kinsa ang husto?

Ang mga ginikanan nga bag-o pang gihisgotan mihimo sa hustong desisyon. Apan unsa man kon ang mga doktor ang tukma sa ilang pagrekonosir? Ilalom nianang mga kahimtanga, matarong ba nga ang inahan magbatog aborsiyon?

Kon imong nakitang lisod, o, imposible ang pagtubag, ikaw wala mag-inusara. Hinuon, may giyang mga prinsipyo nga makatabang, sumala sa ato unyang makita. Apan palandonga una ang tibuok-kalibotan labihan ka dakong suliran sa aborsiyon.