Aduna bay Tubag Kining mga Relihiyona?
DIHA sa usa ka moral nga suliran bahin sa isyu sa aborsiyon, daghang nangitag giya sa ilang espirituwal nga mga lider. Unsay ilang tubag?
Ang Iglesia Katolika lig-ong nagbarog batok sa aborsiyon, nagtudlo nga ang kinabuhi nagsugod sa pagsamkon. Ang ubang mga pari politikanhong nalangkit ug nangayo sa papa sa pagpalagpot sa Katolikong mga politiko nga mibuto pabor sa aborsiyon. Bisan pa, daghang Katoliko ang pabor sa aborsiyon ug nanawag sa pagkahimong liberal.
Ang Iglesia Presbiteriano (T.B.A.) mitaho nga 46 porsiento sa mga pastor “wala magtuo nga nagtudlo ang Bibliya nga ang aborsiyon sayop.” Ang opisyal nga baroganan sa simbahan maoy pabor sa aborsiyon.
Ang ika-16 nga Pangatibuk-ang Sinodo sa United Church of Christ midesisyon nga ‘labanan [niini] ang katungod sa mga lalaki ug babaye sa pagbaton ug igong mga serbisyo sa pagplano sa pamilya ug sa luwas legal nga aborsiyon ingong kapilian.’
Ang polisa sa Evangelical Lutheran Church nag-ingon nga ang aborsiyon “pilion lamang agig kataposang remedyo”; apan kini dili modawat sa pagtawag sa aborsiyon nga usa ka “sala” o sa pag-ingon nga ang “kinabuhi nagsugod sa pagsamkon.”
Ang Southern Baptist Convention supak kaayo sa aborsiyon. Apan ang American Baptist Church nag-ingon: “Kami wala magkausa labot sa hustong polisa sa simbahan bahin sa aborsiyon. Busa, giila namo ang kagawasan sa matag indibiduwal sa pagsuportar sa polisa sa katilingban bahin sa aborsiyon nga nagapabanaag sa ilang mga pagtuo.”
Ang Hudaismo nabahin, ang pundok sa Orthodokso nanguna sa baroganan batok sa aborsiyon, samtang ang Reform ug Konserbatibong mga Hudiyo sa katibuk-an pabor sa aborsiyon.
Gitugot sa Islam ang aborsiyon sa bisan unsang hinungdan alang sa unang 40 ka adlaw sa kinabuhi apan kon nameligro lang ang kinabuhi sa inahan human niana. Ang Hadith nag-ingon nga ang gisabak maoy “40 ka adlaw sa porma sa usa ka binhi, unya kini maoy usa ka nanibuok nga dugo sa sama nga yugto sa panahon, unya usa ka tibugol nga unod sa sama nga yugto sa panahon, unya . . . padalhan siya ug usa ka manulonda aron huypan siya sa gininhawa sa kinabuhi.”
Ang Shintoismo walay opisyal nga baroganan ug gihimong personal nga pagpili ang aborsiyon.
Ang mga Hindu, Buddhista, ug mga Sikh nagtudlo ug pangatibuk-ang pagtahod sa kinabuhi. Apan sila wala malangkit sa debate bahin sa isyu sa aborsiyon, sanglit nagtuo sila ug reinkarnasyon; ang aborsiyon nagpadala lamang sa wala pa matawong bata ngadto sa laing kinabuhi.