Ang Ipasabot sa mga Balita

Pultahan sa Nangaging Kinabuhi?

Sa pipila ka bulang nangagi, tulo ka batan-ong babaye sa elementarya ug sa ikatulong-ang-ang sa hayskol ang nakit-an nga nagbuy-od nga walay panimuot diha sa dalan sa Tokushima, Hapon, nga maoy resulta sa usa ka pagsulay sa paghikog. Unsay nakaagda sa ilang aksiyon? Ang Asahi Shimbun nagtaho: “Sila nagtuo nga sila maoy reinkarnasyon sa karaang mga prinsesa ug nadala sa pagtuo nga ilang makita sa makadiyot ang ilang nangagi nga kinabuhi kon sila makaabot sa punto sa pag-ungaw sa kamatayon.” Luyo niini nga hitabo, nag-ingon ang mantalaan, mao “ang kiling sa mga kabataan sa pagsibog ngadto sa kalibotan sa okulto, [nga diin] mikaylap na sa pila ka katuigang nangagi.” Ang batan-ong mga babaye maoy mawilihong magbabasa sa mga libro sa komiks nga nagahisgot bahin sa reinkarnasyon.

Ang pagdawat sa ideya sa reinkarnasyon, hinuon, sama ra ka walay hinungdan sa pagsusapinday paingon sa ilusyon nga tubig diha sa usa ka disyerto. Ang Bibliya nagatug-an kanato nga diha sa kamatayon ‘ang tawo sa yuta mobalik, ug nianang maong adlaw mahanaw ang iyang mga hunahuna.’ (Salmo 146:4) Kini nga kamatuoran bahin sa kamatayon nalikban sa malimbongong pagtulon-an nga ang kalag buhi pa bisan ang tawo patay na. Inay nagatudlo nga ang tawo adunay kalag nga dili mamatay, ang Bibliya nagaingon nga ang kalag mamatay. (Ezekiel 18:4) Apan kadtong anaa sa panumdoman sa Diyos, adunay dakong paglaom sa pagkabanhaw. (Juan 5:28, 29) Ang Bibliya usab nagayagyag sa pangunang tig-awhag sa doktrina sa kalag nga dili mamatay ug reinkarnasyon; siya mao si Satanas nga Yawa, “ang amahan sa bakak.”—Juan 8:44, itandi ang Genesis 3:4.

Mga Katoliko ug Aborsiyon

Hapit usa ka dekada na ang miagi sukad sa reperendum maylabot sa aborsiyon sa Italya nga naagoman sa Katoliko ang kapildihan. Hinuon, sa usa ka dokumento nga bag-o pang gipagula sa mga Italyanong obispo, ang herarkiyang Katoliko nagpunting pag-usab nga “ang pagdumili sa pagpraktis sa aborsiyon o bisan lamang sa pakiglabot niini maisip nga usa ka seryosong moral nga obligasyon, nga nakagamot sa balaod nga nasulat diha sa kasingkasing sa matag tawo ug gidasonan pag-usab sa simbahan sa iyang mga pamalaod, nga nagasilot pinaagi sa pag-ekskomunikar sa mga Kristohanon nga nagahimo sa aborsiyon o makiglabot niini.”

Unsa ang hunahuna sa mga Italyano bahin sa aborsiyon? Usa ka dili pa dugayng surbi nga naglangkit sa 2,040 ka tawo nagpakita nga sukwahi sa mga mando sa simbahan, ang mga Italyano nagauyon sa aborsiyon sa upat ka kahimtang. (1) Kon ang pagmabdos nagapameligro sa kinabuhi sa inahan, 83 porsiento ang pabor sa aborsiyon. (2) Kon adunay riyesgo nga may depekto ang nagatubong bata sa tagoangkan, 76.3 porsiento ang pabor sa pagtapos sa pagmabdos. (3) Kon ang panglawas sa babaye nameligro, 71.1 porsiento ang pabor sa aborsiyon. (4) Kon ang pagmabdos maoy resulta sa panglugos, 55.2 porsiento ang miuyon nga tugotan ang aborsiyon. Sobra sa 1 ka Italyano sa 4 ang mipabor sa aborsiyon “sa tanang kahimtang kon maoy kagustohan sa babaye,” mitaho ang La Repubblica. Gibanabana nga 300,000 ka legal ug ilegal nga mga aborsiyon ang ginahimo matag tuig sa Italya.

Klaro nga sa ingon niining pribadong mga butang, ang herarkiyang Katoliko wala makahatag sa iyang mga sakop ug igong pahamangno sa Kasulatan aron makuha ang ilang pagsugot. Hinuon, ang tinuod nga mga Kristohanon gitudloan kon unsay giingon sa Kasulatan bahin niining hinungdanong ulohan. Agig pagtahod sa hataas nga sukdanang moral sa Bibliya, sila wala magpraktis sa aborsiyon sa bisan hain sa upat ka kahimtang nga gibatbat sa itaas.—Exodo 21:22-25; tan-awa usab ang Salmo 139:14-17; Jeremias 1:5.