Mapasalamaton Tungod sa Akong Nabatonan
Unsaon sa usa ka tawo pagsagubang kon mahitabo ang trahedya ug siya mahimong inutil? Ang lig-ong pagtuo sa Diyos ug sa iyang mga saad mohatag bag kalainan? Unsay pagsanong sa pamilya? Posible ba nga ang tanan magbatog positibong panglantaw? Ang mosunod mao ang estorya sa usa ka pamilya nga nakigbisog sa pagsagubang.
HUNYO 1, 1957, mao ang kataposang “normal” nga adlaw sa akong kinabuhi. Nagsugod kadto sama ra sa ubang adlaw: Mibangon akog sayo ug miadto sa akong trabaho isip mamumutol ug kahoy sa Deer Lake, Newfoundland. Ang tanan daw maayo man.
Sa kalit, ang dakong kahoy nga bag-o pa nakong naputol, ug nagpaubos na, nasakpan sa misungsong nga hangin nga sa wala dahoma nabali ang direksiyon sa pagkatumba niana! Ulahi na kaayo aron ako mopahawa sa iyang dalan. Ang kahoy mihagsa sa akong mga abaga, nga tungod niana ako nahapla sa yuta ug nawad-ag panimuot. Sa ulahi, sa dihang ako naulian, ako dili na makalihok!
Ako gidala sa ospital sa Corner Brook. Ang daghang mga pagsusi nagpadayag nga ang akong taludtod sa bahin nabugto, nga kinahanglang kuhaon ang tulo ka vertebrae. Ako naparalisado gikan sa liog paubos!
Gugma Nagbuntog sa Pagkawalay-mahimo
Lisod handurawon ang bug-os nga kawalay-mahimo ug ang pagbati sa kapakyasang ikapatungha sa maong katalagman. Ako dili gani makasudlay sa akong buhok o makakaon. Ngani, dili gani ako makaila kon kanus-a ako gutomon!
Ako niadto usa ka dakong tawo, kusgan ug lagsikon. Sa maong panahon ako nahimong walay-mahimo nga bakol. Busa kinahanglan ang daghang pagpasibo aron makasagubang sa kinabuhi. Unsa ka dako ang madawat sa usa ka tawo? Kana akong nasusihan sa daghang katuigan sa ulahi.
Ako dili gayod unta mabuhi kon wala ang mahigugmaong pag-atiman sa akong asawa nga si Hilda. Ang Bibliya, sa Proverbio 18:22, nangutana: “Ang usa nakakaplag ba sa usa ka maayong asawa?” Kon mao, kini nagaingon nga “ang usa nakakaplag sa usa ka maayong butang.” Sa pagkatinuod ang akong asawa usa ka panalangin alang kanako ug sa among pamilyang pitog anak.
Ang kinamanghoran sa among mga anak maoy 18 ka bulan panahon sa akong aksidente, busa hangtod niadto ang kadaghanang panahon ni Hilda gigugol sa pag-atiman kanila. Unya ako nahimong usa kanila, ug labaw pa gayod, sanglit ako dili man ikabutang aron makaduludalagan ug makaduladula tapos ako madigo ug mailisan. Dili, ako kinahanglang ipahimutang sa higdaanan.
Bisan pa niana, may mga panahong kami may mga butang kahimut-anan. Pananglitan, kadaghanan ako dad-on sa gawas sa akong asawa diha sa akong wheelchair o silyang may ligid. Usa ka panahon ako sigeg kapaling ngadto sa usa ka kiliran sa silya. Ako iyang tul-iron, apan mipatim-awng ako dili matul-id niadtong adlawa. Sa kataposan si Hilda miingon: “Lindsay, unsa bay nahitabo?” Kana among nasayran sa among pag-abot sa balay. Sa dihang ako iyang gipagawas sa akong silya, didto sa lingkoran nahimutang ang usa ka dakong lata sa polbos! Sanglit ako dili na mobati, ako bug-os walay kalibotan niadto. Busa kay ang akong gibug-aton wala matimbang, ako sigeg kapaling sa usa ka kiliran.
Mahigugmaong Tabang
Bisan pa sa akong lisod nga kahimtang, ang gugma ni Jehova nga Diyos naglig-on kanako. Ang Proverbio 3:5, 6 nagatambag kanato nga ‘salig kang Jehova uban sa bug-os natong kasingkasing, ug siya magatul-id sa atong mga alagianan.’ Pagkadako nianang panalangin, kay kon dili pa tungod sa gugma ni Jehova ug sa kamatuoran sa Bibliya, ako dili unta makaagwanta. Apan ako sa kanunay nagsalig kang Jehova. Sa pagkamatuod, may panahong ako wala gani makaila kaniya.
Ako natawo niadtong 1911 sa usa ka dapit gitawag Little Catalina, Trinity Bay, Newfoundland. Kay gipadako sa relihiyosong mga ginikanan, ako may pagtahod sa Bibliya ug panagsang nagbasa niana. Samtang akong gibuhat kana, ang mga pangutana mitungha sa akong hunahuna, sama sa: Ang tawo tinuod kahang magkinabuhi sa yuta sa walay kataposan, sama sa ginaingon sa Salmo 37:29? Aron sa pagsusi, ako miadto sa akong klerigo ug nangutana kaniya. Ang iyang tubag mao: “Kinahanglang maghulat ka hangtod ikaw ‘motabok sa Jordan’ aron sa pagsusi niana.” Ang dugang mga pangutana gikan kanako daw nakapapikal kaniya. Busa ako iyang giingnan: “Ang problema nimo, Lindsay, mao nga daghan ka kaayog pangutana.”
Ako wala makabaton ug mga tubag hangtod sa 1948 dihang kami mibalhin ngadto sa komunidad sa Cormack. Didto akong nahibalag si Gus Barnes ug Jack Keats, kinsa mga Saksi ni Jehova. Pagkadako sa akong kalipay dihang ang maong mga tawo nagpakita kanako sa mga tubag gikan sa Bibliya! Ako natagbaw kaayo nga sa sunod tuig ako nabawtismohan ingong simbolo sa akong pagpahinungod kang Jehova.
Niadtong tuiga mismo kami namalhin na usab, sa maong panahon paamihanan ngadto sa Goose Bay, Labrador, diin kinahanglang ako magtrabaho nga gamiton ang bug-at nga kasangkapan. Wala madugay nga nasusihan sa akong amo nga ako usa sa mga Saksi ni Jehova. Sa duha ka bulan ako gipuwera ug gisultihan sa pagpahawa sa lungsod. Kadto wala ko buhata. Niadtong mga adlawa ang mga tawo nahadlok nga magpatalinghog sa butang bag-o, bisan pag ang maong mensahe labi pang tigulang kay kanila.
Ang akong mga anak himatikdan usab. Sila gilisodlisod sa tunghaan hangtod ang polis miadto sa mga awtoridad sa tunghaan ug mipahinumdom kanila nga ang mga Saksi ni Jehova nakigbisog ug nakadaog sa labing iladong mga kaso sa korte sa Canada mahitungod sa kagawasan sa relihiyon. Ang resulta mao nga ang akong mga anak, ug ang mga anak sa ubang relihiyon, gipasaligan sa ilang relihiyosong kagawasan.
Lahi na ang kahimtang nianang dapita karong adlawa. Niadtong 1985 ang usa ka daling-matukod nga Kingdom Hall napatindog alang sa mauswagong kongregasyon sa katawhan ni Jehova nga apil kanila mao ang usa sa akong mga anak babaye.
Tabang sa Pagbuntog sa Pagkanamatyan
Niadtong 1951 kami mibalhin sa lungsod diin kami nagapuyo gihapon, ang Deer Lake. Gikinahanglan ang pag-agwanta latas niadtong lisod nga katuigan. Apan may mga butang mahitabo nga magkinahanglag labaw pang pag-agwanta.
Ang akong tibuok-kinabuhing kapikas, si Hilda, kinsa may suliran sa kasingkasing, namatay gumikan sa usa ka atake niadtong 1963. Sa usa ka tugnawng adlaw sa tingtugnaw, samtang ako nagsud-ong gikan sa akong silyang may ligid, siya gitunod sa yuta. Ang kamingaw nga akong gibati daw dili maantos! Unsa ba ang akong buhaton karon? Ako bug-os dili makaatiman sa akong kaugalingon, labi nang dili makaatiman sa akong pamilya.
Apan si Jehova matinumanon, ug siya kanunay nagahimog lutsanan alang kanato kon kita mosalig kaniya. (1 Corinto 10:13) Ang iyang mga alagad, ang akong Kristohanong mga igsoong lalaki ug mga babaye, mihatag kanakog dakong paglipay, nga naglig-on kanako sa pagpadayon. Gibanos sa akong anak babaye nga si Yvonne ang trabaho sa pag-atiman kanako. Dako gayod siyang panalangin!
Bisan pag si Yvonne may kaugalingong pamilya nga atimanon, siya nagaatiman gihapon sa akong mga panginahanglan. Ang kinaduolang ospital maoy 30 milya (50 km) ang kalayo. Sa makadaghan ang akong anak babaye kinahanglang magdala kanako didto alang sa pagtambal. Kon maseryoso ang akong mga suliran sa panglawas, ako mosakay ug ayroplano paingon sa ospital sa St. John’s, mga 400 milya (640 km) ang kalayo. Si Yvonne kanunay nagauban kanako.
Tungod sa pagkawalay-katakos sa akong lawas sa pag-obra sumala sa angay niini, usahay ang seryosong mga sakit motakboy kanako. Ako gikuhaan nag mga bato sa rinyon; ang mga impeksiyon kadaghanan nagkinahanglag operasyon; tungod sa pilas sa paghinigda ako naospital sa daghang bulan ug nagpabiling naghigda sa daghang bulan pa sa balay, nga ang pila niining mga pilasa nagkinahanglag skin grafts; ang mga suliran sa pagkalibang misangpot sa colostomy o operasyon sa lubot; ug ang diabetes usab miatake.
Ang mga isyu mahitungod sa abono sa dugo kadaghan mitungha. Apan sa kataposan ang mga doktor misugot sa pag-opera kanako nga walay dugo. Tungod sa ilang kahanas ug kamahunahunaon, ako naayo ra nga walay abono sa dugo.—Buhat 15:29.
Ang akong anak babaye ug ang iyang bana ug pamilya maoy nag-atiman kanako latas sa tanan nakong kalisdanan, pinaagi sa pagbangon sa gabii sa pag-atiman kanako, pagpakaon kanako, pagdigo kanako, pag-ilis sa akong mga bendahe, pagdala kanako ngadto sa Kristohanong mga tigom ug mga asembliya, diin ako dugang mapalig-on sa espirituwal. Usahay ako may bahin pa sa programa sa asembliya. Ang mahigugmaong mga anak tinuod nga datong panalangin gikan ni Jehova!—Salmo 127:3.
Daghan Kaayo nga Kapasalamatan
Oo, ako daghan kaayog kapasalamatan. Bisan pag ang akong pisikal nga lawas dili makalihok, ang akong utok igmat, ug ako makahimo sa pagsulti. Akong gigamit kining katakosa sa pagpahibalo sa ngalan ug mga katuyoan ni Jehova ngadto niadtong anaa sa mga ospital nga magpatalinghog—mga doktor, mga narses, mga pasyente, klero nga moduaw sa mga ospital, ug mga higalang miabot sa pagpakigkita kanako.
Gawas pa, ako nagagamit na sa usa ka silyang may ligid o wheelchair nga pinaandar sa duha ka 12-boltaheng mga bateriya, nga akong ginapaandar gikan sa usa ka swits sa butanganan sa bukton. Usahay samtang tua sa gawas nga anaa sa akong silya, ako makigkita sa mga higala ug mga silingan ug makabatog dugang higayon sa pagpakigsulti kanila mahitungod sa mga katuyoan sa Diyos. Ako mapasalamaton nga ako makaarang sa paghimo niini.
Ubay-ubay sa akong mga anak nagpahinungod sa ilang mga kinabuhi kang Jehova, ug sila sa baylo nagabansay sa ilang mga anak sa pag-alagad sa Diyos. Kana nagahatag nakog dakong kalipay. Ang akong asawa maoy usa ka bawtismadong magsisimba ni Jehova, ug ang akong inahan, kinsa nabawtismohan sa edad nga 75, nag-alagad kang Jehova hangtod sa iyang pagkamatay.
Karon ako nagapanan-aw sa adlaw dihang ‘ang Diyos magauban sa iyang katawhan ug magapahid sa tanang luha gikan sa ilang mga mata, ug dihang mawala na ang kamatayon, ni may pagbalata ni paghilak ni kasakit pa,’ ug dihang “ang bakol mokatkat sama sa usa ka lagsaw.”—Pinadayag 21:3, 4; Isaias 35:5, 6.
Sa maong panahon ang bug-os nga kalinaw motabon sa yuta, ug kadtong nagapasakop sa pagmando sa Diyos makaani sa mga kaayohan. Ang Bibliya nagasaad: “Ang mga maaghop magapanunod sa yuta, ug sila makakaplag gayod sa ilang dakong kalipay sa kadagaya sa pakigdait.” Hangtod kanus-a? “Ang mga matarong magapanunod sa yuta, ug sila magapuyo niana sa walay kataposan.”—Salmo 37:11, 29; 72:7.
Kana kahibulongang mga butang nga panan-awon. Ug ang akong kalipay mabug-os unya dihang, sa bag-ong sistema ni Jehova, bisan ‘kadtong mga patay diha sa handumanang mga lubnganan manggula.’—Juan 5:28, 29.
Samtang ako nagahigda dinhi sa sunodsunod nga adlaw, ako may higayon sa pagsubli sa akong kinabuhi ug paglantaw kon ako nakabaton bag kaayohan. Ako makaingon nga walay pagpanuko nga ako nakabatog daghang kaayohan. Miuswag ug dako ang akong espirituwalidad. Ako nakatuon sa pagsalig ug dako kang Jehova. Inay sa pagreklamo mahitungod sa akong kahimtang sa kinabuhi o kon unsa tingali nakulang kanako, ako nakatuon sa pagpabili kon unsay akong nabatonan. Ug miuswag gayod ang akong pagpabili sa akong mahigugmaong pamilya.
Busa ako tinuod mapasalamaton tungod sa akong nabatonan karon, ug ako nagapanglantaw sa pagkatuman sa kahibulongang paglaom—ang kinabuhi sa bag-ong sistema sa Diyos. Unya mabatonan ko ang hingpit nga panglawas. Pagkamalipayon gayod unya kanang adlawa!—Sumala sa giasoy ni Lindsay Stead.
[Blurb sa panid 11]
Ang pagkamatay sa akong minahal nga asawa nangayog labaw pang pag-antos
[Blurb sa panid 12]
Tinuod nga dakong panalangin gikan ni Jehova ang mahigugmaong mga anak
[Letrato ni Lindsay Stead sa panid 10]