Walay Balay—Apan Buhi!

Sinulat sa koresponsal sa “Pagmata!” sa Hapon

ANG unang mga barko nga nagdala sa mga miebakwet nakaabot sa mga pantalan ubay sa Izu peninsula sa gabii sa Nobyembre 21. Sa ulahi gihukom nga ang maong mga tawo dad-on sa Tokyo, sanglit ang Oshima ilalom man sa pagbulot-an sa gobyerno sa siyudad sa Tokyo. Ang gobyerno sa siyudad uban sa nasodnong gobyerno maoy nanguna sa pag-organisar sa panghinabang. Ang mga Saksi ni Jehova didto sa mga dapit sa Izu ug Tokyo ingon man didto sa hedkuwarter sa sangang-buhatan, nga nahimutang sa Ebina City nga mga 50 milya (80 km) ang kalayo gikan sa Bukid Mihara, nag-organisar usab sa buhat sa panghinabang.

Kay ang mga taho sa balita sa hitabo nagbalda sa regular nga mga programa sa telebisyon, ang mga Saksi ni Jehova nga nagpuyo sa duol nabalaka ilabina sa ilang espirituwal nga mga igsoong lalaki ug babaye sa isla. Si Nobumasa Obata sa Ito nga Kongregasyon ug ang uban nakigkontak sa mga Saksi sa dapit sa Izu ug nag-organisar sa kalihokan sa pagdawat sa mga nangebakwet. Sa pagka 6:30 s.g. niadtong adlawa, ang mga Saksi didto na sa matag pantalan sa Izu Peninsula ug sa Atami, nga andam mosugat sa ilang mga igsoon gikan sa Oshima.

Sa dihang si Jiro Nishimura ug upat pa nangabot sa Atami sa mga alas diyes niadtong gabhiona, ang mga Saksi sa Atami, nga nagkupot sa mga magasing Bantayanang Torre ug Pagmata!, misugat kanila. Sanglit ang mga awtoridad panggobyerno wala pa makahukom kon unsay buhaton, ang mga nangebakwet gitugotang mopuyo kang bisan kinsang buot nila. Sila mipadulong sa Yugawara, diin ang anak lalaki ni Nishimura nagaalagad nga ansiano sa lokal nga kongregasyon. Ang apartment nga ilang gipuy-an nahimong sentro sa komunikasyon sa mga nangebakwet sa Oshima nga Kongregasyon.

Sa alas 8:00 sa sunod buntag, ang Komite sa Sanga sa hedkuwarter sa sangang-buhatan sa Watch Tower Society sa Ebina mihukom sa pagpadala dayon ug duha ka hawas sa sanga ngadto sa dapit sa Izu ug duha ngadto sa dapit sa Tokyo aron pag-organisar sa buluhaton sa paghinabang.

Samtang ang mga hawas sa sangang-buhatan naghisgot sa buluhatong panghinabang uban kang Nishimura, si Mitsuo Shiozaki miabot uban ang mga suplay nga hinabang gikan sa iyang kongregasyon sa Numazu. Ang mga nangebakwet nagpasalamat ilabina sa mga sinina nga iyang gipanghatag kanila, kay ubay-ubay kanila ang walay laing sinina gawas sa ilang gisul-ob sa ilang pagbiya sa ilang isla. Mapasalamaton usab nilang gidawat ang pagkaon nga iyang gidala.

Ang mga komite sa paghinabang gitudlo sa Izu ug sa Tokyo aron sa pag-apod-apod sa gikinahanglang salapi ngadto sa mga membro sa Oshima nga Kongregasyon. Ang maong mga komite nag-atiman usab sa espirituwal nga mga panginahanglan sa nangebakwet.

Buluhaton sa Panghinabang sa Tokyo

Sa alas 9:55 s.g. sa Nobyembre 21, sa paglarga sa pila ka barko nga may mga nangebakwet padulong sa mga siyudad sa Izu Peninsula, ang gobernador sa Tokyo nagmando nga ang tanang nangebakwet dad-on sa Tokyo. Si Yoshio Nakamura, usa ka ansiano sa Mita nga Kongregasyon sa mga Saksi ni Jehova sa Tokyo, gihangyo sa pag-organisar sa buluhaton sa panghinabang didto. Ang apartment ni Nakamura nahimong hedkuwarter sa buluhatong panghinabang sa Tokyo.

Iyang gihangyo ang pipila gikan sa iyang kongregasyon ug pipila gikan sa Shinagawa nga Kongregasyon nga mouban kaniya. Napulo kanila mibiya sa ila ni Nakamura sa mga alas dos sa buntag sa Sabado ug mipadulong sa mga pantalan diin ang mga barko gikan sa Oshima naeskedyul nga moabot. Ang mga igsoon nasangkapan sa mga karatula nga nag-ingon: “Mga Membro sa Oshima nga Kongregasyon sa mga Saksi ni Jehova, palihog sa pagpakigkita kanamo.”

Hangtod miabot ang kataposang barko, sila nagngadto-nganhi tali sa duha ka pantalan diin ang mga barko nangabot. Kadto maoy lapas na sa alas diyes sa buntag sa Sabado. Ang mga Saksi ni Jehova sa Chuo nga Kongregasyon nangadto usab sa laing pantalan diin ang mga barko gikan sa Oshima miabot. Kay wala masayod kon diing mga barkoha nagsakay ang ilang kaubang magtutuo, ang mga Saksi sa Tokyo naningkamot sa pagsugat sa tanang barko nga miabot sa Tokyo.

“Ang mga Saksi ni Jehova,” nahinumdom si Kazuyuki Kawashima, “mao ang bugtong mga hawas sa usa ka relihiyosong pundok nga miabot sa pagsugat sa ilang kaubang mga magtutuo sa pantalan. Ang bugtong laing pundok nga nagsugat sa mga nangebakwet mao ang gikan sa unyon sa mga magtutudlo.”

Sa pagkagabii sa Sabado, ang mga membro sa Mita ug Shinagawa nga mga Kongregasyon kinabubut-ong nagtigom ug sinina ug ubang suplay sa hinabang aron ipanagtag dayon sa ilang espirituwal nga mga igsoon gikan sa Oshima. Ang mga Saksi nagkarga sa maong mga suplay ngadto sa van ug nagduaw sa mga dangpanan diin nagpuyo ang Saksing mga nangebakwet. Ang mga Saksi gikan sa Oshima ingon man ang mga dili-Saksi nga didto niadto nakabenepisyo sa mga suplay sa hinabang.

Nadasig sa Pagkamahunahunaon sa Uban

Usa ka Saksing miebakwet miasoy: “Sa among pagbiya sa Oshima, kami mismo wala masayod kon asa kami moadto. Apan, sa pagkanaog namo sa barko among nasiplatan ang usa ka karatulang nag-ingon, ‘Mga Saksi ni Jehova.’ Tiaw na ang dako namong katingala ug kahingangha! Ang mga luha mitubod sa mga mata sa akong asawa samtang siya nahupayan sa pagkasayod nga ang among mga igsoon didto diay sa pagsugat kanamo sa pantalan.

“Igo ra kaming nakapahimutang sa Sports Hall sa Koto Ward ug nakatelepono kang Igsoong Nakamura dihang miabot ang mga hawas sa sangang-buhatan sa pagdasig kanamo. Kadto nakapahingangha gayod kanamo, ug wala kami makakaplag ug mga pulong sa pagpahayag sa among apresasyon.”

Sulod sa semana, ang mga membro sa komite sa panghinabang nagduaw sa tanang silonganan nga gipuy-an sa mga Saksi ug nagsusi sa mga panginahanglan sa ilang isigkamagtutuo. Ilang nakaplagang ang nangebakwet nga mga Saksi giatiman pag-ayo sa lokal nga mga kongregasyon. Ang pila ka estudyante sa Bibliya gidapit ngadto sa mga balay sa lokal nga mga Saksi alang sa pagkaon kada adlaw, ug, sila nagapasalamat sa maong mga buhat sa kalulot nga gipakita kanila sa mga Saksi kinsa dili nila kaila sa wala pa ang maong katalagman.

Ang maong pag-ebakwet nagmalamposon tungod kay gihatag ang nahiangayng mga pasidaan ug gipamatian kana sa katawhan. Apan ang tanang tawo nagaatubang sa labi pang dakong kapeligrohan nga tuling nagasingabot. Ang pasidaan karon ginahatag, nga nagapakita sa katawhan kon unsaon pag-ikyas sa maong kapeligrohan ug pagluwas sa ilang mga kinabuhi. Pamatian ba nimo ang maong pasidaan?

[Letrato sa panid 7]

Si Jiro Nishimura nagsusi kon diin ang kaubang mga magtutuoa

[Mga footnote]

[Mga Letrato sa panid 8]

Si Mitsuo Shiozaki nang-apod-apod sa mga suplay nga hinabang

Ang mga nangebakwet nangatulog sa bugnawng mga salog sa mga gymnasium