Mga Batan-on Nangutana. . .

Unsa ka Kuyaw ang Masturbasyon?

“Ako nahibulong kon ang masturbasyon daotan ba sa mga mata sa Diyos. Makaapektar ba kini sa akong pisikal ug/o mental nga kahimsog sa umaabot ug dihang ako maminyo man?”—15-anyos nga Melissa.

KINING mga pangutanaha nakasamok sa daghang batan-on. Ang hinungdan? Ang masturbasyon, o tinuyong paggitik-sa-kaugalingon aron motungha ang kagana sa sekso, maoy kaylap. Gikataho, mga 97 porsiento sa mga lalaki ug kapin sa 90 porsiento sa mga babaye nakahimo sa masturbasyon sa pag-edad ug 21. Dugang pa, kining bisyoha gipasanginlan sa tanang matang sa mga sakit—gikan sa mga kalunggo ug namulang tabontabon sa mata ngadto sa patol ug sakit sa utok.

Bisan pa niana, napamatud-an sa modernong medikal nga panukiduki nga walay pisikal nga sakit ang ipahinabo sa masturbasyon. Midugang ang mga tigdukiduki nga si William Masters ug Virginia Johnson: “Walay lig-ong medikal nga ebidensiya nga ang masturbasyon, bisan unsa ka subsob, motultol sa sakit sa utok.”

Bisan pa niana, daghang Kristohanong batan-on nabalaka sa kapeligrohan niining bisyoha. “Sa nagpadaog ako niini [masturbasyon], akong gibati nga gipakyas ko si Jehova nga Diyos,” misulat ang usa ka batan-on. “May panahon nga akong gibati ang grabeng depresyon.” Ang laing batan-on nangutana: “Ang masturbasyon usa ba ka salang dili mapasaylo?”

Unsay Ginaingon sa Bibliya?

Bisan pag ang seksuwal nga mga sala sama sa una-kaminyoong sekso (pakighilawas), homoseksuwalidad, panapaw, ug bestialidad tin-awng gitunglo sa Bibliya ingong dagkong mga sala ang masturbasyon wala hisgoti sa Bibliya. (Genesis 39:7-9; Levitico 18:20, 22, 23; 1 Corinto 6:9, 10) Ang masturbasyon kasagaran sa nagsultig-Gregong kalibotan sa mga panahon sa Bibliya, ug daghang Gregong pulong ang gigamit sa pagbatbat sa bisyo. Makaiikag, walay mausa niining mga pulonga ang gigamit sa Bibliya.a

Sanglit ang masturbasyon wala laktud tungloha diha sa Bibliya, nagkahulogan ba nga kini dili makadaot? Wala gayod! Bisan kadtong wala mabalaka ilabina sa punto de vista sa Diyos mobatig kagil-as mahitungod sa bisyo. Pananglitan, si Dr. Aaron Hass sa iyang surbi sa seksuwal nga mga bisyo sa 625 ka tin-edyer mitaho: “Ang kinabag-an sa mga tin-edyer nga nagmasturbar mitahong mibati sa sala, kaulaw, kahugaw, kahungog, panglipaghong, o abnormal.” Tino, ang masturbasyon maoy hugaw nga bisyo. Apan sanglit ang “kahugawan,” sumala sa Bibliya, maoy usa ka pulong nagatugot sa nagkadaiyang sukod sa kaseryoso, ang masturbasyon dili iklasipikar nga kauban sa seryosong mga sala sama sa pakighilawas o ubang matang sa grabeng seksuwal nga imoralidad.—Efeso 4:19.

Bisan pa niana, ang Diyos nakaamgo nga dili sayon ang pagsunod sa mga pagdili sa Bibliya batok sa grabeng seksuwal nga imoralidad. Busa, siya nagahatag ug tambag kon unsaon paglikay sa seksuwal nga imoralidad. Siya ‘nagatudlo kanimo sa pagpahimulos sa imong kaugalingon.’ (Isaias 48:17) Ang mga prinsipyo sa iyang Pulong nagapaila nga ikaw “magpahimulos sa imong kaugalingon” pinaagi sa kusganong pagsukol niining mahugawng bisyo, ilabina kay kini . . .

Nagapukaw sa “Gana sa Sekso”

“Busa, patya ninyo ang mga sangkap sa inyong lawas,” nagaawhag ang Bibliya, “kon mahitungod sa . . . gana sa sekso.” (Colosas 3:5) Kining “gana sa sekso” dili mao ang bag-ong mga pagbati sa sekso nga bation sa kadaghanang batan-on panahon sa pagkatin-edyer, nga angay dili ikaulaw. Ang “gana sa sekso” nagalungtad dihang kining mga pagbatia pakusgon mao nga ang usa mawad-ag pagpugong. Ang maong gana sa sekso mitultol sa grabeng seksuwal nga imoralidad sama sa gibatbat ni Pablo sa Roma 1:26, 27.b

Apan dili ba ang masturbasyon “magpatay” niining mga tinguhaa? Sa kaatbang, sumala sa gisugid sa usa ka batan-on: “Dihang ikaw magmasturbar, ikaw maghunahuna sa daotang mga tinguha, ug ang ginabuhat lamang niini mao ang pagpasamot sa imong gana niana.” Kadaghanan ang imoral nga handurawan gamiton sa pagpasamot sa seksuwal nga kalipay. (Mateo 5:27, 28) Dali kang mahulog sa imoralidad kon hatagan sa hustong mga kahimtang. Usa ka batan-on nagmahay tapos makahilawas: “Sa usa ka panahon, akong gibati nga ang masturbasyon maghupay sa pagbati sa kapakyasan nga ako dili malangkit sa usa ka babaye. Apan akong naugmad ang naglabing tinguha nga malangkit sa usa ka babaye.” Ngani, ang tibuok-nasod nga pagtuon nagpadayag nga sa mga tin-edyer nga nagmasturbar, ang kadaghanan nagbuhat usab sa pakighilawas. Nalabwan nilag 50 porsiento kadtong mga putli! Ang bisyo tinong wala makapakunhod sa ilang “gana sa sekso”!

Bisan pag imong gibati nga ikaw makapugong diha sa kahimtang nga peligroso sa moral, nganong mamasin pinaagi sa pagpagana sa imong kaugalingon sa sekso pinaagi sa pagmasturbar? Kon motungha ang higayon sa pagbuhat sa pakighilawas, makaarang kaha ka sa pag-ingong dili?

Makapahugaw sa Hunahuna ug Emosyon

Ang masturbasyon magsilsil usab sa pila ka tinamdan nga makadaot sa hunahuna. (Itandi ang 2 Corinto 11:3.) Kining bisyoha nagatudlo sa usa sa pag-isip nga ang iyang lawas maoy butang lamang nga gamiton alang sa kalipay sa sekso. Kon magmasturbar o mag-ugay sa kaugalingon, ang usa ka tawo nagahunahuna lamang sa iyang lawasnong mga pagbati—bug-os nga pagkamahunahunaon-sa-kaugalingon. Ang sekso mabulag sa gugma ug ginapaubos ngadto sa usa ka reflex o pangsanong nga mopahungaw sa tensiyon. Apan ang tuyo sa Diyos mao nga ang seksuwal nga mga tinguha tagbawon sa seksuwal nga relasyon, usa ka pagpahayag sa gugma tali sa lalaki ug sa iyang asawa.—Proverbio 5:15-19.

Ang pagkawala niining punto de vista mahimong motultol sa mga suliran sa pagpasibo sa matarong nga relasyon uban sa kaatbang nga sekso. Atong maisip sila nga mga tumong sa sekso inay sensitibong mga tawo. Ang usa basin makiling sa pagpahimulos sa lain isip yanong galamiton sa katagbawan sa sekso. Ang maong daotang mga tinamdan nga gitudlo sa masturbasyon makahugaw sa “espiritu” sa usa, o sa dominanteng kiling sa hunahuna. Sa maayong hinungdan, ang Pulong sa Diyos nagaawhag: “Mga hinigugma, atong hinloan ang atong kaugalingon sa tanang kahugawan sa unod ug espiritu.” (2 Corinto 7:1) Matuod, human sa kasal ang kadaghanang magtiayon makasulbad sa mga suliran nga gipahinabo sa masturbasyon. Bisan pa niana, daghang panig-ingnan nagapamatuod unsa kalisod ug kamalahutayon ang pila niining mga sulirana, nga kadaghanan mag-apektar sa pagkabagay sa magtiayon.

Apan unsa man kon ang usa ka tawo naningkamot sa pagbuntog niining daotang bisyo ug, bisan pag malamposon sa katibuk-an, may suliran gihapon niini?

Usa ka Timbang nga Pag-isip sa Sala

Bisan tuod ang sala maoy sala, ang Bibliya nagapakita nga ang Diyos nagaisip sa atong buhat nga daotan ingong may nagkadaiyang sukod sa kagrabe, ug siya maoy maluluy-on kaayo. “Kay ikaw, Oh Jehova, maoy maayo ug andam magpasaylo; ug dagaya ang mahigugmaong-kalulot ngadto sa tanan nga nagasangpit kanimo.” (Salmo 86:5) Sa dihang ang Kristohanon mopadaog sa masturbasyon, ang kasingkasing niya kadaghanan mahukmanon sa kaugalingon. Apan, ang Bibliya nagapahayag nga “ang Diyos labaw kay sa atong mga kasingkasing ug nasayod sa tanang butang.” (1 Juan 3:20) Ang atong mga sala dili mao ra ang makita sa Diyos. Kay dako ang iyang kahibalo siya makapamati sa atong sinserong mga hangyo sa kapasayloan uban ang simpatiya. Sumala sa gisulat sa usa ka batan-ong babaye: “Akong gibati ang sala sa usa ka paagi, apan ang pagkahibalo nga si Jehova mahigugmaon kaayong Diyos ug siya makabasa sa akong kasingkasing ug nahibalo sa tanan kong paningkamot ug mga tuyo nagapugong nako sa pagbati sa labihang depresyon kon ako mapakyas usahay.” Pinaagi sa pagbugno sa masturbasyon, kalagmitan dili ka makahimo sa seryosong sala sa pakighilawas.

Ang Pebrero 15, 1954, isyu sa among kaubang magasin, The Watchtower, nagpahayag: “Kita [tingali] mapandol ug mapakyas sa daghang beses mahitungod sa usa ka daotang bisyo nga nakadulot nga mas lalom sa atong unang paagi sa kinabuhi kay sa atong maamgohan. Nan kita makiling nga maluya kaayo ug mobating dili takos . . . Ayaw kaguol. Ayaw ihinapos nga ikaw nakabuhat sa salang dili mapasaylo. Kana gayod ang buot ni Satanas nga imong ipangatarongan. Ang kamatuorang ikaw naguol ug napikal sa imong kaugalingon maoy pamatuod nga ikaw wala pa kaayo mahilayo. Ayaw pagkataka sa pagdangop sa mapaubsanon ug sa tim-os ngadto sa Diyos, nga mangayo sa iyang kapasayloan ug sa paghinlo ug sa tabang. Duol kaniya sama sa pagduol sa anak sa iyang amahan kon siya may suliran, bisan pag ka pila mahitungod sa samang kahuyangan, ug si Jehova maluluy-ong mohatag kanimo sa tabang tungod sa iyang dili-takos nga kalulot ug, kon ikaw sinsero, iyang ihatag kanimo ang kaamgohan sa usa ka mahinlong tanlag.”

[Mga footnote]

[Letrato sa panid 21]

Bisan pag ang masturbasyon makapahinabo sa kusganong mga pagbati sa sala, ang tim-os nga pag-ampo alang sa kapasayloan sa Diyos ug paningkamot nga suklan ang bisyo makahatag ug maayong konsensiya sa usa