Gikan sa Among mga Magbabasa

Mga Pagsakripisyong Mohatag ug Tugob nga mga Balos

Salamat kaninyo, ilabina sa eksperyensiya ni Lynette Sigg, “Mga Pagsakripisyong Mohatag ug Tugob nga mga Balos.” (Agosto 22, 1987) Maayo pa unta nga duna ako nianang kaisipana nga gipakita. Magpunay akog reklamo sa mga butang nga wala nako mabatoni inay magpasalamat sa iyang nahatag kanako. Mapahitas-on ako ug wala gayod maghunahuna sa Usa nga akong nautangan sa akong kinabuhi. Buot kong masayran ninyo nga sukad karon magmatim-os pa ako sa akong mga paningkamot. Niining bahina ang sugilanon sa kinabuhi ni Lynette nakatabang kanako.

K. W., Japan

Masturbasyon

Salamat sa inyong artikulo bahin sa masturbasyon. (Septiyembre 8, 1987) Maoy akong pagtuo nga ang masturbasyon makapatay sa seksuwal nga mga kailibgon, apan uban sa tabang sa inyong artikulo, akong naamgohan nga dili diay kini tinuod. Masaligon ako karon nga nakabasa na sa inyong artikulo nga molampos ako sa pagbuntog niining daotang bisyo ug busa makatuman sa 2 Corinto 7:1. Salamat kaninyo pag-usab.

J. T., Tinipong Bansa

Ang artikulo bahin sa masturbasyon nakapatin-awg maayo nganong daotan ang maong bisyo apan sa aktuwal diyutayng tabang lamang ang gihatag kon unsaon sa paglikay niana. Kita giawhag sa ‘pagpatay sa mga sangkap sa atong lawas’ apan wala sultihi kon unsaon sa paghimo niini. Ang pipila ka praktikal nga mga sugyot kon unsaon sa pagbuntog sa problema pabilhan gayod.

S. J., Tinipong Bansa

Kini ang una sa tulo ka artikulo nga gipatik bahin sa ulohan. Ang ikaduha, nga migula sa among isyu sa Nobyembre 8, 1987, nag-ulohang “Mga Batan-on Nangutana . . . Nganong Lisod Kaayo ang Paglikay sa Masturbasyon?” Ang ikatulo, nga mogula sa among isyu sa Marso 8, 1988, nag-ulohang “Mga Batan-on Nangutana . . . Sa Unsang Paagi Ako Makigbugno sa Bisyo sa Masturbasyon?” Ang ikaduha ug ang ikatulong mga artikulo naghatag praktikal nga mga sugyot nga gihangyo.—ED.

Naguol kaayo ako dihang nagbasa sa inyong artikulo bahin sa masturbasyon. Wala gayod ako magtuo nga daotan kadto, sanglit wala ako mobating sad-an tungod sa pagbuhat niana. Kana nakapahunahuna kanako: ‘Kon daotan ang masturbasyon, sa unsang paagi kadtong sama kanamong bata pa kaayong magminyo mahupayan sa seksuwal nga mga kailibgon nga komun sa atong katuigan? Dugang pa, unsay ikasulti bahin sa “didatic” nga bili sa masturbasyon, sa ato pa, ang kasayoran sa natural nga mga obra sa iyang mga organo pinaagi sa pag-eksperyensiyag kalalim?’

T. D., Brazil

Sumala sa gipadayag sa among unang artikulo, ang masturbasyon dili makapatay kondili makapukaw sa seksuwal nga kailibgon. Ang tambag sa Bibliya mao ang ‘papatay sa mga sangkap sa imong lawas maylabot sa seksuwal nga kailibgon,’ dili pukawon sa dako pang mga kailibgon. (Colosas 3:5) Si apostol Pablo misulat diha sa 1 Corinto 9:27: “Gibun-og ko ang akong lawas ug gipanton kini,” nga dili makatugot sa yanong pagpadaog sa bisan unsang lawasnong mga kailibgon. Diha sa Galacia 5:23-25, ang mga Kristohanon giawhag sa pag-ugmad sa bunga sa espiritu, nga naglakip sa pagpugong sa kaugalingon, dili pagpatuyang sa kaugalingon. Ang masturbasyon dili kinahanglan nga mao ang paagi alang sa mga batan-on sa pagkat-on bahin sa kalalim, sanglit atimanon kini sa lawas sa natural nga paagi. Angay edukahon sa mga ginikanan ang ilang mga anak sa sayo pa bahin niining kausaban sa lawas. Dugang pa, ang masturbasyon dili mopaandam sa usa alang sa kaminyoon kondili, nagasentro sa pagtagad sa kaugalingong hakog nga katagbawan. Dili kini makaandam sa usa sa paghatag katagbawan sa umaabot nga kapikas sa kaminyoon.—ED.