Gikan sa Among mga Magbabasa

Maayong Panglawas

Salamat kaayo sa artikulong “Good Health Is Good for Business.” (Pebrero 22, 1987 sa Ingles) Bisan wala ako magtrabaho gawas sa balay, mas daghan ang akong nahimo sa balay sukad nga gisugdan ko ang regular nga ehersisyo sa miaging tuig, ug migaan ako ug 80 ka libra.

J. W., Tinipong Bansa

Acne

Ang inyong artikulo bahin sa acne ilabinang nakaikag kanako, tungod kay kining problemaha nahimong hinungdan sa dakong kahasol sa tin-edyer pa ako. (Pebrero 22, 1987 sa Ingles) Ang nakatabang kanako mao ang tambal nga gihatag kanako sa usa ka Indian nga taga Bolivia. Ania. Kaon ug daghang natural nga yogurt, labing maayo ang walay kalamay. Hilam-osi ang nawong ug tubig nga may duga sa lemon kada adlaw (usa ka lemon sa usa ka litrong tubig). Pahirig dugos ang nawong kas-a sa usa ka semana, pasagdi kini diha sulod sa usa ka oras.

J. D. S., Brazil

Nalipay kami nga nakatabang ang maong tambal. Wala magduso ang “Pagmata!” ug bisan unsang partikular nga tambal. Ang makaayo sa usa ka tawo tingali dili makaayo sa uban.—ED.

Paglaom Alang sa Masakiton sa Utok

Nakadayeg kaayo kami sa inyong mga artikulo bahin sa “Paglaom Alang sa Masakiton sa Utok.” (Septiyembre 8, 1986) Ang among grupo, Nova Scotia Friends of Schizophrenics, natukod na sukad pa sa 1981. Nakaagi kamig igong kalisod ug mga suliran ingong mga higala ug mga paryente sa mga minahal nga nag-antos sa schizophrenia. Kami anam-anam nga milampos sa pag-atubang ug sa pagtambal niining sakita. Ang inyong pagdukiduki ug tukmang pagtaho diha sa tulo ka artikulo maayo kaayo ug dakong tabang sa pagpaedukar sa publiko aron atong makuha ang ilang pagsabot ug pagtabang.

C.L.C., Canada

Pagpanganak? O Aborsiyon?

Nabasa nako ang inyong mga artikulo bahin sa “Pagpanganak? O Aborsiyon?” (Abril 8, 1987) Nakita nakong mapuslanon kaayo kini, maayong pagkasulat ug impormatibo. Ako nagsulat dili ingon nga usa lamang ka magbabasa kondili ingong doktor aron sa pagpasalamat kaninyo. Ginaatubang ko ang mga pasyenteng nakahimo nag desisyon nga magpaaborsiyon. Ihatag ko kining gulaa sa mga pasyente nga nagplano sa paghulog sa bata. Nagsulat ako sumala sa eksperyensiya niining bahina. Dili nga ginahimo ko ang mga aborsiyon kondili ingon nga hapit na akong maaborsiyon sa miagi. Nagsabak ang akong inahan sa pila ka bulan tapos nga gipanganak ang akong igsoong babaye. Siya ug ang akong amahan nagsabot nga siya magpaaborsiyon, tungod kay dili man sila makaabot sa pagbaton dayon ug laing anak. Dihang nagpaingon sa opisina sa doktor, nausab ang hunahuna sa akong inahan. Natawo ako sa miagi ang usa ka tuig ug duha ka adlaw sunod sa akong igsoong babaye. Usa ako karon ka doktor ug obstetrics-gynecology, bana, ug amahan. Naglaom ako nga kining mga artikuloha makatabang sa mga pasyente sa pagkakita sa bili sa kinabuhi alang sa atong langitnong Amahan.

R.R., M.D., Tinipong Bansa

Mapasalamaton Tungod sa Akong Nabatonan

Bag-o ko pa lang natapos pagbasa ang artikulong “Mapasalamaton Tungod sa Akong Nabatonan” ni Lindsay Stead. (Mayo 8, 1987) Makasubo kaayo kadtong sugilanona nga akong nabasa sa dugay nang panahon. Kadto mipabati kanako nga sad-an karon dihang magpalandong sa akong pagreklamo usahay nga walay katarongan. Nakahilak ako sa maong sugilanon.

S. v. A., Zimbabwe