Gikan sa Among mga Magbabasa
Pagdaog sa Acne
Buot kong magpasalamat kaninyo sa artikulo sa mga seryal sa “Mga Batan-on Nangutana . . .” nga nag-ulohang “Can’t I Do Something About My Acne?” (Pebrero 22, 1987 sa Ingles) Miabot kining artikuloha sa panahong naguol ako, ug dako kaayo ang natabang niadto kanako sa pagpadayon sa akong pagtambal. Karon nasayod ako nga ang pagkamalahutayon lamang ang makapaarang-arang niini.
S. C., Pransiya
Pagpanganak o Aborsiyon
Sa panuigong 20, minyo na ako ug inahan sa tres-anyos nga anak nga lalaki, ug hapit akong magpaaborsiyon. Malipayon kaayo ako nga wala kadto mahinayon. Nakalingkawas ako gikan sa daghang mga kagul-anan nga ako untang mabatonan. Karon ang akong duha ka anak nga lalaki, siyam ug sayis anyos, mga magbabasa sa inyong magasin. Padayon sa pagpatik ug maayong mga artikulo sama niini. (Abril 8, 1987) Basin ug makatabang kini sa ubang mga babaye aron dili magpaaborsiyon.
E. B., Federal Republic of Germany
Pagbuntog sa Kapit-osan
Dili pa dugay nag-antos ako sa grabeng kapit-osan, ug wala makabuntog niini. Sa miaging Disyembre natapos ko ang akong pagtungha, mitrabaho ingong teknisyon sa nutrisyon ug diyeta, apan sulod lamang sa upat ka semana miundang ako. Akong giisip ang akong kaugalingon nga dili makasugakod sa pagdawat ug responsibilidad, talawan, ug pakyas. Dako kaayo ang akong kabalaka bahin niini nga ang tanang tawo ug ang tanang butang makapahilak o makapasuko kanako, ug gani gusto usab nga mamatay. Gisulayan ko ang daghang mga paagi apan diyutay ray kalamposan. Dayon miabot ang artikulong “Mga Batan-on Nangutana . . . Makabuntog ba Ako sa Kapit-osan?” (Abril 8, 1987) Nahuwasan ako sa pagkasayod nga kitang tanan bation ug kapit-osan sa usa ka paagi ug nga mamenosan ug makontrolar kini. Karon nasayod na ako nga mabuntog ko kini.
N. V. O., Brazil
Edukasyon sa Kolehiyo
Sa sinugdan sa pagbasa ko sa inyong artikulong “College Education—A Preparation for What?” nagpalandong ako: ‘Laing pabugnaw bahin sa edukasyon sa kolehiyo.’ (Enero 8, 1987 sa Ingles) Apan tapos sa maayong pagtimbangtimbang, karon nga nakatapos na ako sa kolehiyo, gipabilhan ko ang tambag nga gihatag. Bisan ug ulahi na kaayo alang kanako, nanghinaot ako nga ang mga batan-ong makabasa sa artikulo makasabot nga ang edukasyon sa kolehiyo nagaandam kanimo sa walay kapuslanan. Nagapalandong ako sa nangagi ug nagbasol niadtong mga tuiga sa akong kinabuhi.
S. B., Tinipong Bansa
Mga Kaayohan sa Pagbasa sa Pagmata!
Tinuod nga gipabilhan kog dako ang pagbasa sa inyong magasin. Ang unod niini tinuod nga pagkaon sa hunahuna. Nagahisgot kini sa nagkalainlaing malisod nga mga ulohan diha sa yano, tukmang paagi, nga nagpahimo kanilang madaling masabtan sa tanan. Lain pa, ang tambag nga gihatag praktikal ug walay-bayad. Akong nakita kini nga takos pagasundon. Girekomendar ko ang inyong mga magasin sa mga batan-ong nagtuon sa langyawng mga pinulongan. Akong gisugyot nga mosuskriber sila sa magasin sa Pranses ug sa pinulongan nga ilang gitun-an. Ning paagiha may kapilian silang mga tektso nga maayo kaayong pagkahubad.
R. M., Pransiya