Gikan sa Among mga Magbabasa
Pagkakitag Trabaho
Akong gisunod ang inyong sugyot sa artikulo “Kon Unsaon sa Pagsagubang sa Pagkawalay Trabaho.” (Disyembre 22, 1984) Sanglit usa ka inahan sa gamayng bata, nagkinahanglan akog trabaho nga dili magkinahanglag dakong panahon ug nga duol sa balay. Human sa pagbasa sa inyong artikulo midesider ako sa paghimog bug-os nga pagpanghinlo sa kabalayan sa ubang tawo. Nagpaanunsiyo ako sa lokal nga tindahan sa groseriya. Karon aduna na akoy tulo ka trabaho sa paghinlo sa balay nga duol ra usab sa balay. Daghan kaayong salamat sa maayong sugyot.
P. S., Illinois
“Mga Batan-on Nangutana”
Salamat kaninyo sa mga artikulong “Mga Batan-on Nangutana.” Katingalahan ba kanang pamation gikan sa 47 anyos nga babaye? Nakabaton ako ug magubot kaayong katuigan sa pagkabatan-on ug sa tin-edyer, ug wala ako makasabot sa akong gibati hangtod nga inyong gipatik kining mga artikuloha.
N. W., Texas
Ang inyong tukma sa panahong mga artikulo “Mga Batan-on Nangutana” nakatabang ug dako kanako ingong ginikanan sa 17-anyos nga lalaki. Nasayod ako kon unsay akong gikinahanglan kaniya apan malisdan sa pagsulti sa akong katarongan ngadto kanila. Ang inyong mga artikulo nakahatag kanakog dugang mga pulong sa paggiya kanila sa panahon ning magubot kaayo nga katuigan. Bisag ang mga artikulo gitumong alang sa mga batan-on, kaming mga edad-edaran natabangan usab. Buhaton ko ang tanan kong mahimo kon nabatonan ko pa unta kining tambaga sa 17 anyos pa ako!
S. S., Alabama
Pagtahod sa mga Baldado
Naikag kaayo ako sa artikulong “Ayaw Tan-awa ang Silya sa Bakol—Tan-awa Ako!” (Nobyembre 8, 1984) Aduna akoy higala nga nagakot sa silya sa bakol. Ang inyong artikulo nagpakita kanako sa pagkabililhon sa pagtratar sa tanang baldado sa matinahurong paagi ug sa pakigsulti direkta kanila. Salamat sa inyong tambag.
L. L., Washington
Kolehiyo o Magtuon ug Kapangabuhian
Sa inyong artikulong “Moeskuyla sa Kolehiyo . . . o Magtuon ug Kapangabuhian?” (Abril 22, 1985) akong namatikdan ang sayop nga pagsabot nga imo lamang makat-onan ang de-opisinang propesyon sa diha sa kolehiyo. Dili kini tinuod. Ang tanang matang sa panarbaho nga ginamit ang kusog nga imong mahunahunaan kinahanglang tun-an sa tunghaan. Diha sa kadaghanang mga programa sa kolehiyo ginatudloan ang mga estudyante sa tanang butang gikan sa dali nga pagpangluto o sa pagpanolda o elektroniks. Mas barato ang pagtungha niining mga programaha kay sa pag-eskuyla diha sa eskuylahan sa pamuhatbuhat. Dili mahal nga kasangkapan ang kolehiyo sa pagkakat-on ug abilidad o panarbaho.
P. M., California
Ang artikulo nga gihisgotan wala magtamay sa edukasyon sa kolehiyo, apan gipasiugda niini nga adunay daghang mga bentaha sa pagkakat-on ug panarbaho nga ginamit ang kusog kay sa mangandam sa de-opisinang propesyon. Samtang ang programa sa sertipiko sa kolehiyo tingali mohatag ug maayo nga pagbansay sa nagkalainlaing mga panarbaho, ang kasagarang gihatagag dakong pasiugda sa mga programa sa pagtudlo sa kolehiyo o sa unibersidad, maingon man sa palibot sa kolehiyo, daw magpalayo gikan sa maayong espirituwal nga tumong nga gilatid diha sa Bibliya, sama sa pagpauswag sa pagtuo sa Diyos ug sa iyang mga katuyoan ug sa paghupot ug maayo, maligdong nga pamatasan. Ang desisyon kon moeskuyla ba sa kolehiyo o dili maoy personal nga desisyon, apan among nakita nga maayong makahatag pasidaan sa kalagmitang kapeligrohang nalangkit.—ED.