Gikan sa Among mga Magbabasa
Depresyon
Dihang unang nakita ko ang inyong magasin bahin sa “Depresyon—Ikaw Mahimong Makadaog sa Bugno!” (Oktubre 22, 1987) ang akong nahunahunaan mao, ‘Pastilan! Laing artikulo na usab bahin sa imong buhaton lamang mao ang pagpalandong ug malipayong mga hunahuna, pahiyom, ug mawala ra kini.’ Nasusihan ako nga dunay S.A.D. (Seasonal Affective Disorder), busa dihang nakita ko ang gihisgotang artikulo, nalipay ako! Salamat kaninyo ilabina sa mga pulong nga misunod sa kahubitan niini: “Busa ang depresyon dili kanunay sa tanang panahon ‘sa hunahuna lang.’”
J. E. G., Tinipong Bansa
Edukasyon sa Kolehiyo
Supak ako sa artikulong “College Education—A Preparation for What?” (Enero 8, 1987 sa Ingles) ug sa sulat usab diha sa Agosto 22, 1987, nga gula. Ako mismo may nailhang mga batan-on nga nakatungha sa kolehiyo, ug sila dunay makaikag nga mga trabaho ug malig-ong Kristohanong mga kaminyoon. Ang kinabuhi dili lamang pagkakat-on sa praktikal nga mga butang. Samtang maglakaw kita sa mga kakahoyan, magtan-aw sa mga bitoon, magtuon sa pagdulag tennis, o magbasag libro bahin sa arte, dili praktikal nga mga butang ang atong gihimo, apan kining mga butanga makatugob ug dako sa atong mga kinabuhi.
A. J. M., Tinipong Bansa
Napikal ako sa inyong artikulo bahin sa edukasyon sa kolehiyo. Uyon ako sa magbabasa nga miingon nga dili kadto timbang ug may pagpihig, ug miuyon usab ako sa inyong tubag. (Nobyembre 8, 1987) Ang kolehiyo dunay iyang maayong mga punto ug may daotang mga punto. Kon malampos ug dili ang tawo sa kolehiyo o sa relihiyosong organisasyon nagadepende kon unsa ka maayo ang iyang pagpadapat sa butang nga iyang nakat-onan.
T. M., Tinipong Bansa
Uyon kami nga dunay daghang kaayohang makuha gikan sa dugang kahibalo nga ikahatag sa mga institusyon sa hataas nga edukasyon. Sa samang higayon, gidawat usab namo ang mga kaayohan nga nadawat sa katilingban gikan sa mga tawo sama kang Thomas Edison ug Henry Ford, nga gamay ra o walay pormal nga edukasyon. Wala kami maghukom sa gitawag nga hataas nga edukasyon sa ingon ug mopamatuod pag-usab sa gipahayag na namo sa miagi, nga ang pagtungha sa kolehiyo maoy usa ka indibiduwal nga butang. Sa samang higayon, natukmod kami sa pagpasiugda sa mga kapeligrohan sa palibot sa kolehiyo.
Una, bisag dunay mga eksipsiyon, ang ginapasiugda sa edukasyon sa kolehiyo sa katibuk-an nagabatok sa pagtuo sa Diyos ug nagapabor sa mga pilosopiya sa tawo.
Ikaduha, ang edukasyon sa kolehiyo sa kasagaran nagahatag pasiugda sa pag-asenso diha sa kalibotan ug sa pagkab-ot sa materyal nga kalamposan, nga lahi sa tambag ni Jesus ug ni apostol Juan.—Mateo 6:19-21, 25:34, 1 Juan 2:15, 16.
Ikatulo, ang kasagarang palibot sa kolehiyo nagadasig ug espiritu sa pagkinaugalingon ug pagkamatugoton, nga mosangpot ug seksuwal nga imoralidad ug pag-abuso sa droga nga malisod alang sa daghang mga batan-on sa pagsukol. Among gidasig ang mga batan-on sa pagpadayon sa pagkuhag kahibalo, ilabina nianang makita sa Bibliya tungod kay kini motultol sa pagkabaton ug kinabuhing walay kataposan. (Juan 17:3) Gidasig usab namo sila sa pagbansay sa mga katakos nga gikinahanglan aron makabaton ug mapuslanon, mabungahong kinabuhi nga ginapasiugda ang mga pulong ni Jesus diha sa Mateo 6:33, sa pag-una sa Gingharian sa Diyos ug sa iyang pagkamatarong.
Ug ikaupat, mubo na ang panahon. (Lucas 21:34-36; Efeso 5:15, 16) Ikagugol kini nga labing mapuslanon diha sa pag-alagad sa atong Maglalalang.—ED.