Gikan sa Among mga Magbabasa

Atong Himalatyong Kalasangan

Nalipay kaayo ako sa pagkakitang gihatagan ninyog dakong lugar ang paghisgot sa lasang ug sa mga kapeligrohang giatubang niini. (Hunyo 22, 1987) Ang atong kalasangan maluwas lamang kon labing daghang lungsoranon ang makaamgo sa kapeligrohan ug mobuhat sa ilang bahin sa pagbugno niana. Ang tuyo sa among organisasyon mao ang pagtudlo sa populasyon nga seryosong nameligro ang atong kalasangan ug sa pagsulti kanila kon unsay mahimo sa matag tawo.—Nagadumalang Direktor, Endangered Forests Foundation.

C. A., Federal Republic of Germany

Pagpakigsinabot sa mga Igsoong Lalaki ug Babaye

Mapasalamaton kaayo ako sa artikulong “Mga Batan-on Nangutana . . . Nganong Lisod Kaayong Makigsinabot sa Akong Igsoong Lalaki ug Babaye?” (Hulyo 22, 1987) Ako nagapuyo sa usa ka pamilyang siyam ug sakop, ug natural lamang nga kami may kauban sa kuwarto. Ako 12, ug ang igsoong lalaking akong kauban maoy 5 anyos. Niadto ako malisdan sa pag-antos nga iyang ipundok ang mga dulaan ug sinina sa akong bahin sa kuwarto. Ang inyong artikulo nakatabang kanako nga mas makasabot kaniya. Kami maglalis gihapon, apan kami nagkaestorya ug nakaamgo nga kinahanglan ang duha aron mahimong higala. Kaming duha may pagkadamak, ug lagmit mobasol sa usag usa. Apan karon ako mangita sa iyang kaayohan ug nakadiskobreng sayon ang pagbuntog sa mga kabingkilan kon mosunod ka sa mga prinsipyo sa Bibliya.

E. H., Inglaterra

Edukasyon sa Kolehiyo

Nahiubos kaayo ako sa inyong pagpatik diha sa inyong panid sa “Gikan sa Among mga Magbabasa” sa sulat bahin sa edukasyon sa kolehiyo. (Agosto 22, 1987) Bisan kamo magaadmitir nga ang artikulong “Edukasyon sa Kolehiyo—Pagpangandam Alang sa Unsa?” (Enero 8, 1987) maoy dili makiangayon ug madapigon, ug nga sa kataposan ang desisyon sa pag-adto sa kolehiyo o dili kinahanglang himoon sa personal, responsable, indibiduwal nga paagi. Natino kong kamo nakadawat ug mga sulat nga misupak sa maong artikulo. May kaila akong daghan nga nagbasa niana ug naghunahunang kadto maoy punto de vista nga mapig-oton ug dili makiangayon, apan kamo wala gayod mopatik sa usa ka pulong nga masupakon. Karon, unom ka bulan sa ulahi, ang usa ka sulat nga samang mapig-oton miuyon sa artikulo ug gipatik.

T. B., U.S.C., Tinipong Bansa

Sa pagkamatuod, hangtod sa pag-abot sa imong sulat, walay mga sulat nga misupak sa artikulo bahin sa edukasyon sa kolehiyo ang giawhag sa among pagtagad. Mouyon kaming ang suliran kon kaha magbatog edukasyon sa kolehiyo o dili maoy personal ug indibiduwal nga butang. Bisan pa niana, among gibati nga ang katunga-sa-panid nga artikulo, nga gibase sa mga komento sa usa ka respetadong kolumnista, naghatag ug pila ka masinabtanon kaayo ug maugdang nga mga hunahuna. Bisan pag tingali bililhon ang pila ka kahibalong nakuha sa kolehiyo, kini dili ikatumbas sa kaalam nga makuha pinaagi sa kasinatian. Ang artikulo nagduhaduha sa praktikal nga bili sa pila ka butang makat-onan sa kolehiyo ug mihatag ug realistikong hunahuna sa posibilidad nga makab-ot sa mga estudyante sa kolehiyo ang ilang mga paglaom sa umaabot. Gawas pa, ang pasidaan gihatag batok sa pagtinguhag materyalistikanhong mga tumong. Dayag, ang kolumnistang gikutlo wala maghisgot sa tanang bahin sa ulohan, apan sa among hunahuna nga sa pila ka piniling pulong, iyang napahayag ang pila ka balidong mga punto nga takos palandongon nga maugdang.—ED.