Pagbuntog sa Pagpihig sa Rasa
NAGDAKO si Isaac Langa sa South Africa sa itom nga lungsod sa Alexandra, Johannesburg. Sanglit may kusganon rasanhong espiritu, iyang gidumtan ang mga puti ug giisip ang nasod nga Zulu nga superyor kay sa ubang mga itom. Mitambong sa mga tigom nga gihikay sa ANC (African National Congress), usa ka gidili batok-kagamhanang organisasyon, nalangkit si Isaac sa mga rayot sa Habagatang Aprikano sa 1976. Siya nanumdom: “Daghan ang gipamosil sa mga polis; ang uban nangaagol sa tibuok nga kinabuhi. Dihang nakita nako kining tanan, natugkan akog espiritu sa pagpanimalos. Gusto kong makabaton ug awtomatikong posil ug mamosil kutob sa akong mahimo sa dili pa nako patyon ang akong kaugalingon. Kay wala may nakita, midesider ako sa pagsunod sa pananglitan sa uban kinsa miadto sa silingang mga nasod aron mabansay sa militar.”
Nining masulayong panahon nga nakontak si Isaac sa mga Saksi ni Jehova diha sa ilang pagsangyaw sa balay-balay. Nabinlan siyag mga libro nga nagsaysay sa mensahe sa Bibliya, ug usa niini ang, Matuod nga Kalinaw ug Kasegurohan—Asa Gikan?, nakahatag malungtarong impresyon. Siya miingon: “Karon nakita na nako ang tinuod nga kalinaw nga akong gipangita. Akong nakat-onan ang gipamulong sa Bibliya: ‘Kadtong baliko dili na matul-id,’ ug: ‘Dili iya sa tawo nga nagalakaw sa pagtultol sa iyang kaugalingong dalan.’ (Ecclesiastes 1:15; Jeremias 10:23) Busa napatin-aw kanako nga ang among paningkamot walay kapuslanan tungod dili kadto makahatag kalinaw sa yuta. Ang Gingharian lamang sa Diyos ang makahimo. (Pinadayag 11:17, 18) Nakatabang usab ang Bibliya kanako sa pagbag-o sa akong kaisipan bahin sa ubang mga rasa. (Buhat 10:34, 35) Makalipay sa kasingkasing ang pagkasayod nga ang mga tawo sa tanang rasa ug mga tribo nagakinabuhi na nga may paglaom sa kinabuhing walay kataposan diha sa paraiso sa yuta ilalom sa Gingharian sa Diyos.”
Si Isaac karon nag-alagad ingong bug-os panahong nagapanawng ministro, nagapalig-on sa mga kongregasyon sa mga Saksi ni Jehova nga gilangkoban sa daghang nasodnong mga grupo.