Otso Dolyares sa Usa ka Pinta

DIHA sa iyang librong The Tarnished Door, gisusi ni John Crewdson ang ulohan bahin sa agos sa mga lalin, legal ug ilegal, nga nagbaha ngadto sa Tinipong Bansa, ilabina gikan sa Mexico. Bahin niini mihatag usab siyag kadan-agan sa tuboran sa ubang dugo nga nakasulod sa mga bangko sa dugo sa T.B.

Iyang gibatbat ang paagi sa pagsubay sa Patrolya sa Utlanan sa T.B. sa pila ka ilegal nga mga lalin sa El Paso, Texas, pinaagi sa ilang dugo: “Ang unang adtoon sa ‘patrolya sa siyudad’ mao ang sentro sa blood plasma nga duol sa mga taytayan, ang usa sa siyam ka sentro sa Habagatan sa El Paso nga namalit ug dugo gikan sa mga tigtabok sa utlanan sa Mexico nga $8 sa usa ka pinta—ang katugbang sa suweldo sa Juárez [sa Mexico] sa usa ka adlaw—unya ibaliya kini sa $20 ngadto sa mga ospital ug sa mga laboratoryo sa pagdukiduki. Ang mga sentro nagapaanunsiyo sa ilang mga bintana nga makakuwarta ang regular nga kontribiyotor ug $81 sa usa ka bulan, ug ang tuboran sa kita sa kadaghanan diha sa Juárez mao ang mga bangko sa dugo.

“Si Williams [opisyal sa Patrolya sa Utlanan] kanunayng makadakop sa mga kontribiyotor diha sa mga sentro nga nanganha sa Juárez duha ka beses sa usa ka semana sa daghang mga tuig sa pagbaligya sa ilang dugo.” Busa palandonga lang kon unsang matanga sa dugo ang nakasulod sa mga bangko sa dugo.

Alang mga Kristohanon, nga nagatahod sa pagkabalaan sa dugo sumala sa hunahuna sa Diyos, daotan kining maong negosyo sa dugo. Ang mga pangulo sa unang Kristohanong kongregasyon misulat: “Kay gipakamaayo sa balaang espiritu ug namo ang dili pagdugang kabug-at kaninyo, gawas lamang sa pipila ka kinahanglanong butang, sa pagdumili . . . sa dugo . . . Kon managlikay kamo niining mga butanga, mouswag kamo. Maayong panglawas kaninyo!”—Buhat 15:28, 29.