Ang mga Relihiyon ba Karong Adlawa Nagapakaon o Nagapanit sa Panon?
“Alaut ang mga magbalantay sa karnero sa Israel, nga nagapasibsib hinoon sa ilang kaugalingon! Dili ba ang mga panon ang angay pasibsibon sa mga magbalantay?”—Ezekiel 34:2.
SAMA sa mga adlaw sa karaang Israel, kasagarang sama usab karon: Ang kadaghanan sa mga magbalantay sa relihiyon nagapakaon sa ilang kaugalingon ug gipagutman ang ilang mga panon. Sa miaging tuig nahimong sentro sa entablado ang mga ebanghelisador sa telebisyon, nga masibotong nagapanit sa mga karnero.
Ang nagadalang mga bitoon mao sila si Jim ug Tammy Bakker sa PTL, apan sila dunay madasigong kaubang mga artista. Lain pay ato, ang PTL nagkahulogang “Praise the Lord” ug “People That Love,” apan sa kataposan sa tuig daghang mga reporter sa balita nagaingon nga mas sibo ang “Pass the Loot” ug “Pay the Lady.” Gihisgotan sa usa ka magsusulat ang ilang ministeryo ingong “nagpailis ug kuwarta diha sa templo” ug gitawag kini: “Ang panglimbong sa pagwali sa ebanghelyo samtang gipanitan ang kabos.”
Ang mga Bakker maoy nagdumala niadto sa Heritage USA, usa ka 930 ka ektaryang balay-bakasyonan diha sa Fort Mill, South Carolina, nga may gibanabanang kantidad nga $178 milyones. Ang imperyo sa PTL nagapasulod ug $129 milyones sa usa ka tuig. Sukad sa 1984 ang mga taho sa balita nag-ingon nga nakadawat ang mga Bakker ug suweldo ug mga bonus nga mikantidad ug $4.8 milyones—sa 1986 ang suweldo ni Jim Bakker ginaingong $1.6 milyones, kang Tammy $300,000. Sila nagpuyo sa $1.3 milyones nga balay atubangan sa linaw sa South Carolina, ug dorado sa bulawan ang mga kasangkapan nga gitaod sa banyo—ug may balay sa mga iro sa likod nga may air-conditioner ug heater. Si Bakker nakaingon: “Buot ang Diyos nga ang iyang katawhan magkinabuhing primera klase.” Labing menos siya ug si Tammy ug ang ilang mga iro—samtang milungtad kini.
Apan nahugno kining tanan dihang gidawat ni Bakker ang iyang pagpanapaw sa sekretarya sa iglesya. Bisan pa sa $265,000 nga kuwartang pahilom sa PTL nga gigahin—kining gamayng iskandalo mao ang gibasehan sa “Pay the Lady” nga hubad sa PTL. Apan, wala gayod madawat kining kantidara sa babayeng nalangkit. Ang karismatikong Pentekostal nga PTL gihatag ngadto sa pundamentalistang si Jerry Falwell.
Nagsugod si Falwell sa bug-os nga gugma ug pagpasaylo, apan wala magdugay nangaway ug nanaot siya. Iyang gisaway ang PTL ni Bakker ingon nga mao “ang labing dakong kugan ug kanser sa Kristiyanidad sa miaging 2,000 ka tuig sa kasaysayan sa iglesya.” Uban sa maayong pasundayag sa matarong nga kasuko, si Falwell misinggit: “Akong nakita ang kahakog. Akong nakita ang pagkamaakohon. Akong nakita ang kahangol nga nakahulog kanila.” Busa dihang mipuli si Falwell sa PTL, siya misaad, sumala sa gitaho sa Newsweek: “Miingon si Falwell nga usa ka butang nga dili niya himoon mao ang ‘pagpangayog kuwarta diha sa telebisyon.’ Sa miaging semana nagpakita si Falwell sa telebisyon ug nangayo.”
Ang Daily News sa New York, ubos sa ulohang “Falwell to Followers: Pass the Loot,” mipadayon sa pag-ingon: “Gibuklad na usab ni Jerry Falwell kagahapon ang iyang sapyaw sa kuwarta, gipugos ang iyang elektronikong panon sa paghatag ug dugang pang kuwarta.” Siya miingon ngadto sa iyang kongregasyon diin ang kadaghanan mga kabos: “Gikinahanglan namo ang labing sinakripisyong gasa nga inyong ikapadala. . . . Kon dili kamo buot nga magpadayon kining maong ministeryo, ayaw lang ninyo akog tagda.” Sila misanong. Ang kampaniya sa pagpundog kuwarta nakatigom ug $20,000,000. Nan—kay nanaad nga buhaton kini kon molampos ang kampaniya—nagsul-ob siya ug asul nga amerikana, mitindog sa ibabaw sa 50 ka metrong gitas-ong dailosan sa tubig sa Heritage USA, gibungat ang Pag-ampo sa Ginoo, ug mipadailos. Si Falwell sa ulahi miundang gikan sa PTL.
Ang Newsweek mitaho: “Si Michael Korpi, ang letratista niadto sa ‘Old Time Gospel Hour’ ni Falwell, misumbong nga ang ministeryo [ni Falwell] nakakita ug kapin sa $4 milyones diha sa hangyo sa 1979 alang sa mga lagiw sa Cambodia apan nagpadala lamang ug $100,000 sa pagtabang sa mga biktima.”
Gitugbangan sa ebanghelisador sa telebisyon nga si Oral Roberts ang buhat ni Falwell sa pagdailos sa tubig pinaagi sa iyang dramatikong buhat. Sayo sa miaging tuig iyang gisultihan ang iyang mga sumusunod nga gipasidan-an siya sa Diyos nga kon dili siya makapatunghag $8,000,000 sa pagka Marso 31, siya “papaulion.” Diha sa iyang panapos nga pag-ampo siya miingon: “Palugwaya pa ang akong kinabuhi. Hatagi akog kinabuhi saylo sa Marso.” Ang iyang anak nga lalaki nangaliyopo: “Dili nato tugotang kini na lang ang kataposang komplianyo sa akong papa!” Kining emosyonal nga panguwarta ni Roberts ug anak miobra. Nagpabilin si Roberts sa iyang torre sa pag-ampo—ginaingon nga nakapaduol kini kaniyag 61 ka metro sa Diyos—ug ang iyang tumatambong sa telebisyon nakatigom ug $8,000,000. Apan, ang usa sa iyang mga sumusunod, pilosopo bahin niini: “Kon ugaling namatay siya, dili kana daotan. Ang langit maoy usa ka maayong dapit nga puy-an.”
Usa ka higayon iyang gilingaw ang iyang tumatambong sa TV uban sa makasubong sugilanon nga may malipayong kataposan. Misulod ang Yawa sa iyang lawak ug nakigbugno kaniya. Sumala sa gipahayag ni Roberts: “Akong nabati kadtong maong mga kamot diha sa akong tutunlan, ug iyang gituok ako. Misinggit ako sa akong asawa, ‘Honey, dali!’ Miabot siya ug gimandoan ang yawa sa paggula. Nakaginhawa ako ug nakatindog sa akong katre nga malig-on.” Sa matin-aw, mas gamhanan ang iyang asawa batok sa Yawa kay kaniya.
Sa 1980 dihang nagkamenos ang pundong nagasulod, naghinugilon siyang nakakitag 270 ka metrong Jesus nga nagbarog nga nagtiniil nga nakigsulti kaniya. Kining maong panan-awon miresultag $5,000,000 nga mga donasyon. Nangangkon siya nga nakabanhaw siya ug mga patay. Sa usa ka okasyon, siya miingon: “Mihunong ako sa paghatag ug sermon, mibalik ug gibanhaw ang usa ka tawong patay.” Tungod niini ang Newsweek mikomento: “Miingon si Oral Roberts nga nakabangon siyag patay, apan ang pagbangon ug kuwarta maoy iyang tuyo.”
Ang Pentekostal nga ebanghelisador si Jimmy Swaggart ginaingon nga mao ang labing popular nga ebanghelisador sa TV, nga dunay walo ka milyong mga tumatan-aw kada Dominggo. Usa siya ka iladong mag-aawit sa ebanghelyo, siya nakakitag $100 ka milyon gikan sa iyang mga plaka. Mahitungod sa nahitabo kang Bakker, si Swaggart miingon: “Nagtuo ako nga ang bug-os nga kapakyasan maoy usa ka kanser nga kinahanglang kuhaon gikan sa lawas ni Kristo.” Diha sa ulahi nga okasyon si Swaggart midugang: “Ang mga tawo moingon, ‘Oy, ilang gitulisan ang katilingban.’ Ug prangkahan ko kamo, mao gayod kana ang ginahimo.”
Apan sumala sa mga taho sa balita daw wala maiwit si Swaggart. Ang Newsweek mitaho nga si George Jernigan, ehekutibo niadto ni Swaggart, miingon nga si Swaggart “nakatigom ug $20 milyones alang sa pundo sa mga bata apan nakagasto ug ubos sa 10 porsiento niana diha sa programa. Si Jernigan miingon: ‘ang nahibilin gigasto diha sa Baton Rouge’ nga diin, ang WBRZ-TV mitaho, nga ang propidad ni Swaggart natindogan sa $1 ka milyong balay ni Jimmy, rantso sa iyang anak nga lalaki nga balor ug $776,000 ug air-conditioned ang balaybalay diha sa kahoy sa iyang apo.”
Diha sa usa sa seryal sa mga programa sa Nightline sa ABC bahin sa mga ebanghelisador sa telebisyon, ang koresponsal sa ABC si Marshall Frady miingon: “Labing menos, sumala sa namatikdan na sa pipila, ang tanang mga dayandayan sa modernong ebanghelismo sa telebisyon halayo kaayo gikan sa orihinal nga kayano nianang madasigon katingalahang batan-ong taga Galilea nga walay kabtangan, walay mga hunta direktiba, nga nagbaktas lamang sa abugong suok sa yuta nga nagapakigsulti, duha ka libo ka tuig kanhi.”
Tinuod nga “ang tanang mga dayandayan sa modernong ebanghelismo sa telebisyon” halayo kaayo gikan sa mga paagi nga gigamit ni Jesus. Apan tinuod usab nga bag-o na ang panahon. Aron makawali sa tibuok-kalibotan ngadto sa milyonmilyon kinahanglang gamitan kinig modernong mga pasilidad ug maayong organisasyon, ug kini nagkinahanglan ug dakong kantidad nga salapi. Bisan pa, ang sukaranang paagi sa kinabuhi ni Jesus nagpabiling sulondan alang sa mga Kristohanon. Ang mga lagda ug mga prinsipyo nga iyang gihatag mao lamang ang dalan alang sa mga Kristohanon karong adlawa.—1 Pedro 2:21.
Ania ang pila niadtong mga prinsipyoha: ‘Kamo nakadawat sa kamatuoran nga walay bayad, ihatag kini nga walay bayad. Ayaw pagkabalaka bahin sa materyal nga mga butang. Pangitaa pag-una ang Gingharian. Mas dako ang kalipay sa paghatag kay sa pagdawat. Panudlo diha sa mga balay sa mga tawo. Ang Pulong sa Diyos mao ang kamatuoran. Higugmaa ang Diyos, higugmaa ang imong silingan. Buhati ang tawo sa mga butang nga gusto nimong buhaton diha kanimo. Pakan-a ang akong mga karnero.’ Wala mobag-o ang tinuod nga Kristiyanidad; ang mga pasilidad lamang niini sa pagpakaylap ang nabag-o.
Dili ang dakong kantidad sa salaping nalangkit ang gitutolan. Nagkinahanglan ug milyonmilyon aron sa pagwali sa tibuok-kalibotan. Dili daotan ang salapi. Ang gugma sa salapi mao ang gamot sa tanang matang sa mga daotan. Ang mga paagi sa pagsikop sa kuwarta—ang mga pangaliyopo, ang mga gimik, ang pagpangayo, ang panglimbong, ang pagpamakak—ang daotan. Ang malimbongong pagkuha niana gikan sa kabos pinaagi sa pangilad nga mga dula ang daotan. Ug ang pagkolekta alang sa usa ka katuyoan, unya gamiton sa lain, alang sa pagpadato sa kaugalingon—kana pagpangawkaw. Ang mga Pariseo mahigugmaon sa salapi. Gibaligya ni Judas si Kristo alang sa salapi. Daghang mga magbalantay karon sa relihiyon nagalakaw sa tunob sa ilang mga tiil inay sa tunob ni Jesus.
Ilang ginapakaon ang ilang kaugalingon, dili ang panon. Ug dili lamang ang mga Pentekostal. Ang mga pundamentalista nagatudlog Trinidad, impiyernong-kalayo, ang yuta sunogon—tanang paganong mga doktrina sa karaang Babilonya ug Ehipto. Ginalimod sa mga modernista ang Bibliya—nga dili dinasig, masayop, ang mga basahon niini wala sulata sa mga tawong nangangkon nga maoy nagsulat o sa panahon nga ginaingong gisulat kini, ug nagalaban dili paglalang kondili ebolusyon. Dayon anaa ang mga ebanghelisador nga nagapamaligyag popular nga sikolohiya, ang nagpakabuotang mga mamumulong nga nagapahayag ug maulog-ulogong mga butang nga nagagitik sa mga dalunggan sa dili-modawat sa prangkang kamatuoran sa Bibliya. Dili ang trigo kondili ang tahop mao ang ilang ginapakaon sa ilang mga karnero.—Isaias 30:10; 2 Timoteo 4:3, 4.
Sa pagkatinuod, sama sa mga adlaw ni Jesus karong mga adlawa: “Sa pagkakita sa mga panon sa mga tawo siya giabot ug kaluoy kanila, tungod kay sila nangapanit ug nanagkatibulaag sama sa karnero nga walay magbalantay.” (Mateo 9:36) Ug sa pagkakita kanila, “siya misugod sa pagtudlo kanila sa daghang mga butang.” (Marcos 6:34) Si Jesus dunay mga sumusunod sa yuta karong adlawa nga nagasunod sa iyang mga tunob, nagawali sama sa iyang paagi, ug nagatudlo sa mga kamatuoran sa Bibliya nga nakabawi sa espirituwal nga kagutmanan.—Amos 8:11.
Kadtong maong mga sumusunod mao ang mga Saksi ni Jehova. Ang ilang tibuok-kalibotang buluhaton sa pagsangyaw nagkinahanglan ug dakong kantidad nga salapi, apan kini nagagikan sa kinabubut-on, wala-pangayoang mga kontribusyon. Ang literatura ginapatik ug giapod-apod sa gamay nga kantidad. Ang senemanang mga pagtuon sa Bibliya ginadumala diha sa mga balay nga walay bayad. Ang mga tigom sa kongregasyon walay bayad, walay koleksiyong ginakuha, walay gihimong mga pangaliyopo sa pagpangayog kuwarta, walay mga suweldong ginabayad. Daghang mga Saksi dunay sekular nga trabaho alang sa ilang pangabuhian ug nagaamot sa panahon ug salapi aron matuman ang pagwali sa maayong balita sa Gingharian.—Mateo 24:14; Buhat 1:8.
Ilang gihimo ang gisugo ni Jesus: “Kamo nakadawat nga walay bayad, busa panghatag kamo nga walay bayad.” Ilang gihimo ang gisugo ni Pedro: “Tagda ninyo ang panon sa Diyos nga gipiyal kaninyo, dili nga daw sa gipugos kamo, kondili sa kinabubut-on; dili alang sa malimbongong pagpanapi, kondili inubanan sa kadasig; dili sa hinarihari nga pagdumala niadtong panulondon sa Diyos, kondili mahimong mga pananglitan sa panon.”—Mateo 10:8; 1 Pedro 5:2, 3.
[Blurb sa panid 6]
“Miingon si Oral Roberts nga nakabangon siyag patay, apan ang pagbangon ug kuwarta maoy iyang tuyo”
[Blurb sa panid 6]
“Ang panglimbong sa pagwali sa ebanghelyo samtang nagapanit sa kabos”
[Blurb sa panid 8]
“Kamo nakadawat nga walay bayad, panghatag kamo nga walay bayad”