Ang Hunahuna sa Bibliya

Aborsiyon—Ang Sulbad sa Sobrang Populasyon?

KON kaha polisa sa nasod; o kaugalingong gusto, ang aborsiyon nahimong kasagarang paagi sa pagkontrol sa populasyon sa kagahapon ug sa karon.

Ang usa ka asoy sa Canadianong peryodiko nga nag-ulohang “Ang kasakit sa Tsina mao ang 53 milyong mga aborsiyon” nagkutlo sa Ministeryo sa Publikong Panglawas ingong nagtaho nianang talagsaong gidaghanon alang sa yugto nga 1979 hangtod 1984. Kining lima ka tuig nga katibuk-ang gidaghanon sa aborsiyon motumbas sa kapin sa doble sa populasyon sa Canada!

Ang Hapon nagbanabanang 30 porsiento sa 2.1 milyong isamkon kada tuig nianang nasora taktakon. Ang pipila niining mga batang wala pa matawo hinumdoman pinaagig gamayng bato, plastik, o sementong mga pigura nga ibutang sa Budhistang mga templo sa tibuok nasod.

Sa pikas nga bahin sa kalibotan, sa Sweden, ang aborsiyon nga pangayoon gitugot sukad sa 1946 tungod sa “medikal, sosyo-medikal, makitawhanon ug mga hinungdang maylabot sa maayong mga liwat o pagkadaot sa bata sa tiyan.” Karon, sama sa diha sa ubang nasod, daghang Swekong babaye nagtuo nga ang aborsiyon dinawat sa katilingban ug popular nga paagi sa paglimite sa gidak-on sa ilang mga pamilya.

Popular nga Karaang Batasan

Sa karaang Atenas, ang aborsiyon gigamit sa pagpaigoigo sa pag-uswag sa populasyon. “Ang kinabubut-ong paglimite sa pamilya mao ang nauso niadtong panahona, kon kaha pinaagi sa mga kontrasepsiyon, aborsiyon, o pagpatay sa masuso,” sumala sa historyanong si Will Durant diha sa The Story of Civilization.

Ang aborsiyon popular usab sa Romanhong imperyo. Tungod sa unsang mga katarongan? Nagpadayon si Durant: “Ang mga babaye gustong mahimong seksi inay kay maanyag nga inahan; sa kadaghanan ang tinguha sa indibiduwal nga kagawasan daw nahisupak sa mga panginahanglan sa rasa. . . . Sa mga minyo, ang kinabag-an daw naglimite sa ilang mga pamilya pinaagig aborsiyon, pagpatay sa mga bata, coitus interruptus, ug kontrasepsiyon.” Dili ba ang pag-uswag sa mga aborsiyon sa atong panahon tungod sa susamang mga katarongan?

Ang Unang-Kristohanong Hunahuna

Sa kasukwahi kaayo, ang unang mga Kristohanon nagbaton ug lig-ong baroganan supak sa mga aborsiyon. Si Durant midugang: “Ang aborsiyon ug pagpatay sa bata, nga nakapadiyutay sa paganong katilingban, gidili alang sa mga Kristohanon ingong katumbas sa pagbuno.” Busa bisan tuod ang paglimite sa pamilya nahimong talagsaong sosyal nga katingalahan sa mga panahong Grego ug Romano, ang Kristohanong komunidad mibarog nga lig-on sa mapig-otong moral nga kalagdaan nga nag-ugmad ug pagtahod sa kabalaan sa kinabuhi. Sama sa karaang Israel ang mga anak maoy usa ka timaan sa panalangin sa Maglalalang. Ang salmista nagaingon: “Tan-awa! Ang mga anak maoy panulondon gikan kang Jehova; ang mga bunga sa tiyan maoy usa ka ganti.”—Salmo 127:3.

Dayag gikan sa Pulong sa Diyos, ang Bibliya, nga si Jehova, ang “tinubdan sa kinabuhi,” nagaila sa katungod sa kinabuhi sa batang wala pa matawo. Sa unsang paagi? Nahauna, ang Bibliya nagapakitang giisip niya ang wala pa matawo nga dili lamang tibugol nga tisyu. Ang kaikag sa Diyos diha sa iyang kahibulongang kahikayan sa paglalang gibatbat sa salmista niining paagiha: “Ikaw [Jehova] nagtago kanako diha sa tiyan sa akong inahan. . . . Ang imong mga mata nakakita kanako sa akong pagkabinhi, ug sa imong basahon ang tanan niining bahin nahisulat.”—Salmo 36:9; 139:13-16.

Dugang pa, papanubagon sa Diyos ang tawo nga sa aksidente magbalda sa kinaiyanhong lakaw sa mga panghitabo maylabot sa usa ka batang wala pa matawo. Matikdi nga ang Moisesnong Kasugoan nagbutang ug bug-at nga responsabilidad niana nila, nga nagaingon: “Kon ang mga lalaki magdumogay, ug makasamad sa usa ka babayeng mabdos, mao nga ang iyang bunga mogawas, ug bisan pa niana dili mosangpot ang kadaot; siya pagamultahan gayod, sumala sa ipahamtang kaniya sa bana sa babaye; ug siya magabayad sumala sa ihukom sa mga maghuhukom. Apan kon mosangpot ang kadaot, nan iyang igahatag ang kinabuhi ilis sa kinabuhi.”—Exodo 21:22, 23, American Standard Version.

Karon kon si Jehova magaisip sa aksidenteng pagbalda sa batang wala pa matawo ingong butang nga may seryosong sangpotanan, unsa ka dako pang tulubagon ang anaa sa tinuyong pagbalda, sama sa kaso sa aborsiyon! Gawas pa, sanglit ang Diyos wala maghatag ug mga limitasyon kon bahin sa edad sa wala pa matawo diha sa iyang kasugoan nga gipahayag sa Exodo kapitulo 21, ang mga argumento bahin sa edad mawalay hinungdan.

Ang Sulbad sa Sobrang Populasyon

Bisan pa niana, ang pipila tingali mangatarongan nga tungod sa miuswag nga mga kanihit sa pagkaon, kakulang sa igong balay, ug nagkadiyutayng suplay sa tab-ang nga tubig, ang piniling aborsiyon ingong paagi sa pagkontrol sa populasyon makahupay sa kalisdanan sa umaabot nga mga kaliwatan. Ugaling, kini ba ang bugtong paagi sa pagpatimbang sa populasyon sa kalibotan ug sa silinganan sa yuta?

Mga 6,000 ka tuig kanhi, gipasiugda ni Jehova nga Diyos ang iyang katuyoan mahitungod sa populasyon sa planetang Yuta. Si Jehova nagpahayag ngadto sa unang magtiayon: “Magmabungahon kamo ug magdaghan ug pun-a ninyo ang yuta ug gamhi kini.” (Genesis 1:28) Matikding ang gipahayag nga katuyoan sa Diyos mao ang pagpuno, dili pagpasobra sa tawo, sa yuta. Ang Maglalalang magpatuman sa katimbang sa populasyon sa kalibotan—magpaigoigo sa gidaghanon sa mga tawo, sa katimbang sa ekolohiya, ug igong produksiyon sa pagkaon.—Isaias 65:17-25.

Makataronganon ang paghinapos nga ang Maglalalang sa tawhanong gahom sa pagsanay magpaigoigo mismo sa paggamit niini aron makab-ot ang hingpit nga katimbang. Dili kinahanglan unya ang mga aborsiyon sa paglimite sa pag-uswag sa populasyon. Si Jehova pinaagi sa Gingharian sa iyang Anak, si Kristo Jesus, magtinong ang yuta sa kahamugaway mapuno sa masinugtanong mga tawo nga magapuyo sa tibuok-yutang paraiso.—Isaias 55:8-11; Pinadayag 21:1-5.

[Blurb sa panid 27]

“Ang aborsiyon ug pagpatay sa masuso . . . gidili alang sa mga Kristohanon ingong mga katumbas sa pagbuno.”—Will Durant, historyano

[Letrato sa panid 26]

“Sa panahong ang bata sa tiyan maoy unom ka bulan kini makakita, makadungog, makasinati, makatilaw ug makakat-on pa.”—Dr. T. Verny, awtor sa librong “The Secret Life of the Unborn”