Gikan sa Among mga Magbabasa

Gramatika sa Magbabalak

Nalingaw kaayo ako sa pagbasa sa “Tall Sailing Ships Captivate Sydney” (Septiyembre 8, 1988). Gibati ko, hinunoa, nga angay kong awhagon ang inyong pagtagad sa pagkadili-tukma sa kinutlo gikan sa balak ni John Masefield nga “Sea-Fever” sumala sa gipatik diha sa kahon. Kini angay mabasa: “I must go down to the seas again.” Gisukip ko ang usa ka kopya sa tinubdan nga materyal.

D. S., Inglaterra

Ang among mga tinubdan sa kinutlo nga walay “go” mao ang Britanikong “Oxford Dictionary of Quotations” (Oxford University Press) ug ang “Familiar Quotations,” ni John Bartlett. Ang mga awtoridad nagpahibalo kanamo nga ang orihinal nga mabasa nga walay “go” nailalom sa “balaknong pagtugot.”—ED.

Naguol nga Kasingkasing

Bag-o ko pang nabasa ang “Sa Unsang Paagi Ako Maulian sa Kaguol sa Kasingkasing?” (Enero 22, 1988) Ang tanang inyong gisulti napadapat kanako. Gibugto sa akong trato ang among suod nga relasyon. Milihok siya sama sa giingon sa artikulo. Nahauna, misugod siya sa dili pagtagad kanako ingong iyang trato, nga samag mahanaw ra ang suliran. Sa dihang kadto wala mahanaw, unya siya milingkod ug misaysay sa kahimtang. Sa pila ka adlaw, ako wala makapasibo sa ideya, apan karong adlawa, ilabina tapos makabasa sa artikulo, gibating nahupayan, bisag wala pa malipay niana. Karon naamgohan ko nga ako dili mao ang una, ni mahimong kataposan, nga makaagi niini.

C. V., Brazil

Nahidangat ako sa punto nga gikinahanglan ko ang tabang bahin niining ulohana. Nakigsulti ako sa akong inahan ug usa ka higala, ug silang duha miingon nga ako buangbuang. Sila miingon nga kana mahanaw ra. Apan sumala sa gibatbat sa Pagmata!, nahugno ang akong balatian ug ako naguol. Kadto morag wala nay laing bililhon sa kinabuhi. Ang Pagmata! mihatag kanako sa tabang nga labaw kong gikinahanglan kay sa bisan unsa pa.

M. M., Portugal

Ako 13 anyos niadto. Kadto milungtad sa usa ka tuig ug tunga. Ako nasakit kaayo ug naglagot nga nakabaton akog pagdumot batok ni bisan kinsang lalaki. Dili ako makigsulti ni bisan kinsang lalaki gawas kon kinahanglan, o gawas kon siya minyo. Karon nasabtan ko nga ako nasayop. Ang inyong artikulo nakatabang nako sa pagsabot nga tingali may moabot ra nga mahimong mas maayong kapikas sa kaminyoon.

J. W., Tinipong Bansa

Gibati ko karon nga ako anaa sa mas maayong kahimtang sa emosyon, mental, ug espirituwal aron mangitag usa ka kapikas. Gitin-aw sa artikulo nga walay sayon ug dili-masakit nga paagi sa pagbugto sa usa ka kasabotang magminyo. Kini ug ang langkit nga mga artikulo dakog mahimo sa paghimo sa mga batan-on nga mas maalamon bahin sa pagpakigsabot nila sa kaminyoon, sa ingon makapamenos sa kaguol ug kasub-anan nga mosangpot sa pagminyo tungod sa kaluoy.

A. U. I., Nigeria

Panganunsiyo

Ako suskritor sa inyong mga magasin, bisan pag dili usa sa mga Saksi ni Jehova. Buot kong pasalamatan kamo tungod sa mga artikulong inyong ginapatik. Ako may lisod ug delikadong trabaho sa usa ka sikyatrikong ospital. Nagaatender ako sa tulo-ka-tuig interuniversity nga kurso sa sikyatriya, ug sa pila ka adlaw nga miagi, ako mikuha sa akong una- ug ikaduhang-tuig nga mga pasulit. Ang mga artikulo bahin sa panganunsiyo sa Pebrero 8, 1988, nga isyu sa Pagmata! maoy labing dakong tabang sa akong pasulit sa sosyolohiya. Ang akong preparasyon gibase gayod sa inyong magasin! Nakakuha akog maayong mga resulta. Salamat pag-usab, ug nanghinaot ako sa kaayohan sa inyong labing makaiikag nga mga magasin.

P. V., Italya