Gikan sa Among mga Magbabasa

“Lami” nga Artikulo

Buot kong ipahayag ang akong pasalamat sa “Paglutog mga Utanon—Ininsek nga Paagi.” (Mayo 8, 1988) Nagluto ako nga gisunod ang mga sugyot sa artikulo ug gidayeg sa akong pamilya tungod niana. Nanghinaot ako nga mopadayon kamo sa pagsulat nianang “lami” nga mga artikulo.

R.G.O., Brazil

Paglayas

Sa “Ang Paglayas Mao ba ang Sulbad?” (Marso 22, 1988), wala kamo mobulag sa inyong naandan nga paggamit sa abanteng mga katilingban ingong sentro. Kanus-a ba ninyo tagdon ang dili kaayo bulahang katilingban sama sa Aprika? Alang kanako, ang inyong sugyot sa solusyon maoy kulang sa panabot ug mapihigon. Wala ninyo ipunting nga kining kahimtanga nagagikan sa materyalistikong mga hilig ug mga ambisyon sa pila ka ginikanan karong adlawa. Kining tagsulat maoy biktima. Pila ka tuig nga miagi sa dihang puno ang akong bulsa, ako ang pinanggang anak sa akong ginikanan, apan dihang tungod sa mga sirkumstansiya kana wala nay sulod, ako gitamay. Sa mubo, ang akong inahan mao ang migun-ob sa akong kaugmaon. Angay untang sawayon ninyo sa tino ang materyalistikanhong tinamdan sa pila ka ginikanan karong mga adlawa.

T. T., Nigeria

Kining artikuloha mao ang ikaduha sa serye bahin sa mga nanglayas. Ang unang artikulo (Pebrero 22, 1988) miila nga nagalungtad ang dili-makataronganong mga kahimtang ug, usahay, mga ginikanan ang mabasol. Ang “Pagmata!” naningkamot nga mahuptan ang internasyonal nga kinaiya. Ang among mga ulohan sa hapin sa Marso 8, 1987, ug Hunyo 22, 1988, naghisgot sa tino sa Aprikanhong mga ulohan gikan sa Aprikanhong mga tinubdan. Daghang indibiduwal nga mga artikulo naghimo usab niana.—ED.

Naglaom ako nga mabasa sa matag batan-on ang inyong “Mga Batan-on Nangutana . . . ” nga mga artikulo. Gipabilhan ko ilabina ang “Angay Bang Molayas Ako sa Balay?” (Pebrero 22, 1988) Gipalandong ko kana, ug nausab ang akong hunahuna.

C. H., Tinipong Bansa

Pagmata! Gipabilhan

Ingong regular nga magbabasa sa Pagmata!, nakadayeg akog maayo sa inyong ekselenteng paagi sa pagpresentar sa mga suliran aron hisabtan sa tanan. Kini dili kasagaran sa gitawag intelektuwal nga mga pundok. Gidayeg ko usab ang inyong kamanggihatagon, inyong tinguha nga makaamot sa kalipay sa tawo nga dili kamo ang makabenepisyo, kay ang inyong mga basahon gipanagtag nga walay ganansiya, ug kamo dili mangolekta sama sa daghan nga uban.

J. B., M.D., Pransiya

Ako 16 anyos, ug ako Muslim. Bisan pa niana, nakaangay ako sa makaiikag nga mga artikulo alang sa mga batan-on ug sa ilang mga ginikanan. Maayo untag ang dugang mga batan-on nga sama nakog edad mag-isip sa mga butang sumala sa inyong ginaingon. Ang inyong mga libro nagahimong mas maantos ang mamingaw nga mga gabii. Salamat sa pag-apil kanamong mga batan-on.

F. R., Tinipong Bansa

Nakaangay ako sa halalom nga pagsabot nga inyong ginahatag sa tanang matang sa mga suliran nga motungha sa kinabuhi, uban ang maayong tambag. Ang tanan nga ubang relihiyon may mga panagsumpaki, apan ang mga pagtulon-an sa inyong mga basahon wala gayod magkabangi. Sila makataronganon ug, labaw sa tanan, tukma. Ang nakapalipay kaayo nako mao nga inanay kong gibati nga ang akong kinabuhi mas kahimut-anan samtang ako nabalhin gikan sa walay-kahulogang kinabuhi nako hangtod karon ngadto sa usa nga mapuslanon.

M. O., Hapon