Gikan sa Among mga Magbabasa

Balangaw Ang inyong “Paggama sa Imong Kaugalingong Balangaw” nga artikulo sa (Enero 8, 1989) nakapatingala nako tungod kay kamo naglikay pinaagi sa pag-ingon, “Wala iapil sa mga eksperto ang indigo.” Kini ang angay nga mabasa sa “tanang pisisista.” Sa dihang nadiskobrehan ni Sir Isaac Newton nga ang puti nga silaw mabungkag pinaagi sa prisma, siya mibutyag ug unom ka kolor. Misupak ang iglesya, kay daotan man nga numero ang unom, ug gipasulti siya nga ang labing matahom nga ilhanan sa Diyos ngadto sa tawo maoy pito ka kolor, sanglit balaang numero man ang pito.

J. F., Scotland

Ang gipahayag ni J. F. makaikag. Kami makadugang nga ang “The New Encyclopedia Britannica” (1987), kansang mga kontributor malagmit nag-apil sa mga pisisista, nag-ingon nga ang komung balangaw dunay mga arko sa “biyoleta, indigo, asul, berde, dalag, orens, ug pula.”—ED.

Tinudlong-Buluhaton sa mga Ginikanan Bag-o lang akong nakatapos sa pagbasa “Mga Ginikanan—Kamo May Tinudlong-Buluhaton Usab!” (Septiyembre 8, 1988) Gikinahanglan gayod nako kadtong artikuloha. Ako 27 anyos ug may 4 anyos nga lalaking anak. Ang ginikanan usahay okupado kaayo sa ilang trabaho nga wala na silay panahon pa sa pakigdula sa ilang mga anak o sa paggugol ug panahon uban nila. Apan salamat sa inyong artikulo, sukad karon ako determinado sa paggahin ug panahon alang sa akong anak nga lalaki. Bisag magsugod ako pinaagi sa paggahin ug napulo ka minutos sa tagsa ka higayon. Nahibalo akong mapuslanon kini—ang akong anak mas importante kay sa ubang butang.

A. F., Italya

Ingong magtutudlo, giapresyar ko ang maayong mga artikulo. Ang mga magtutudlo nagkinahanglan sa tabang sa mga ginikanan sa pagdisiplina ug kinahanglang masayod nga sila mapaluyohon. Ang maong mga ginikanan okupado kaayo sa paggahin ug panahon aron magpakigsulti sa mga magtutudlo. Ilang gilaoman nga ang mga magtutudlo ang mohimo sa kaakohan sa ginikanan alang kanila ug kasagaran pasanginlan ang mga magtutudlo kon dunay daotang butang mahitabo. Ang inyong mga artikulo naghatag daghang maayong mga sugyot kon sa unsang paagi ang mga ginikanan makatabang pinaagi pakiglangkit ug labing hinungdanon pinaagi sa pagpahibalo sa bata nga sila may pagtagad sa ilang buluhaton sa tunghaan. Salamat na usab sa pagpagula niining problemaha ug sa sulbad sa pagtagad sa mga ginikanan. Gikinahanglan sa mga magtutudlo ang ilang pagpaluyo!

R. N., Tinipong Bansa

Ako ang presidente sa Parent-Teachers Association sa La Cumbre Junior High School. Inyong gipatik ang mga serye sa mga artikulo maylabot sa mga tunghaan, sa mga kaakohan sa ginikanan, ubp., nga gusto nakong mabatonan sa atong mga ginikanan. Duna kitay daghan nga kinahanglang makabasa sa materyal nga sama niini.

G. B., Tinipong Bansa

Obra sa Arte Ang hulagway nga makita sa sulod nga panid sa hapin sa Hulyo 8, 1988, sa Pagmata! tinuod gayod nga mamugnaon ug matahom! Ingong usa ka dibuhista, nga nagtan-aw sa dagway sa magasin, sa kolor, ug mga desinyo, akong nakita nga kini tinuod gayod nga maanindot! Ang arte sa pagprinta nunot sa panahon. Ang arte sa pagdibuho nakakomplemento sa impormatibo kaayong mga artikulo ug tinuod makapukaw sa gana. Sama sa mga kaso sa daghang makaganang pagkaon, ang mga mata mao ang unang “makatilaw.”

E. S., Tinipong Bansa

Akong gibasa ang ulohan sa hapin (Agosto 22, 1988), nakakita sa nasubong bata nga nagtan-aw sa nukleyar nga kagun-oban, ug dayon gipakli ang panid! Dili na kinahanglan pa ang mga pulong. Pagkadako sa epekto ang nahatag sa duha ka hulagway. Ania ang magasin nga sa duha lang ka hulagway makahatag paglaom, matuod nga paglaom, sa daghang kabataan.

V. K., Tinipong Bansa

Usa ka naulahing pasalamat alang sa artikulong “Ang Katolikong Iglesya sa India” diha sa Pagmata! sa Septiyembre 22, 1987. Niadtong panahona dapig pa kaayo ako alang sa iglesya, apan miduaw ang mga Saksi, ug misugod ako sa pagduhaduha. Kadtong mga hulagwaya diha sa artikulo tinuod nga nakabuka sa akong mga mata. Karon iya na ako sa mga Saksi ni Jehova. Daghang salamat.

A. L., Pederal nga Republika sa Alemanya