Gikan sa Among mga Magbabasa

Tabang Alang sa Baldado

Gipabilhan gayod nako ang labing makadasig nga artikulo (Oktubre 22, 1988). Aron ang tawong baldado magmalipayon, siya dili kinahanglan nga tabangan kanunay. Naputlan akog tuong kamot. Ginabantayan ang tanan nakong lihok aron tabangan ako sa panahon sa pangaon diha sa lamesa. Ako gisilbihan, ang akong tinapay ginahiwa ug ginapanitan ang akong prutas, ug bisan ang akong keso gipreparar alang nako. Siyempre, kini gihimo tungod sa kaluoy, apan sa sulod, miresulta kini alang nako ug daotang buot diha sa mga tawong may maayong tuyo alang nako. Ug sa kataposan, dili gani ako moingon ug salamat. Sa mag-inusara ako, sa katingalahan malipayon ako sa pagbuhat sa tanang butang sa akong kaugalingon. Salamat sa inyong gipakitang mga gamit; wala gayod ako makatuo nga mabatonan kining mga butanga. Sila simple, apan makatabang gayod.

C. C., Pransiya

Buot kong pasalamatan kamo sa artikulo sa Pagmata! bahin sa “Pagsabot sa Hagit sa Nganga” (Pebrero 22, 1987). Gibalikbalik nako kinig basa, natandog kaayo, sanglit nag-antos ako sa pagpihig sa mga tawo nga mosulogsulog ug moyubit sa mga nganga. Sa kataposan may magasin ako nga seryosong nagtagad sa problema ug nangandam ug maayong materyal bahin niining malisod ug panagsa rang hisgotang ulohan. Pinaagi sa pagbasa sa materyal, may nailhan akong doktor nga espesyalista sa mga problema sa pagsulti, ug karon gitambalan ako sa usa. Sa hunahuna ko ang inyong mga magsusulat takos ug ganti diha sa literatura.

J. M. S., Brazil

Kabataan Nagakamatay

Giapresyar ko ang paagi sa pagpunting sa artikulong “Minilyong Kabataan Mangamatay” (Septiyembre 22, 1988) sa mga paagi nga mahimong buhaton sa mga ginikanan sa ilang mga anak nga makapabiling himsog bisan pa sa dili-maayong mga kahimtang. Tinuod nga ang pagpasuso dunay epekto samag kontraseptibo. Ako nabalaka, hinunoa, nga basig magtuo ang pila ka magbabasa nga ang pagpasuso maoy kasaligang paagi sa pagpugong sa pagpanganak. Sa akong eksperyensiya ingong nars sa maternity, akong nakita nga ang mga inahan nga nagsalig sa pagpasuso ingong kontraseptibo nagsabak hinoon.

A. S., Tinipong Bansa

Si A. S. husto. Ang among artikulo nagpunting sa katibuk-an sa mga dapit sa kalibotan diin ang kontraseptibo dili mabatonan. Kini yanong nag-ingon nga ang pagpasuso “daw makalangan sa pagsugod sa pagregla.” Kini mosipyat gayod.—ED.

Tinudlong-Buluhaton sa mga Ginikanan

Para nako, ingong inahan ug maestra, ang Pagmata! sa Septiyembre 8, 1988, dakong tabang. Napukaw nako ang interes sa prinsipal sa tunghaan diha sa ulohang “Mga Ginikanan—Kamo May Tinudlong-Buluhaton Usab!” Diha sa tigom sa mga ginikanan, iyang gidayeg ang materyal ug nag-apod-apod diha sa mga ginikanan ug mga papel nga niini iyang gikopya ang pipila ka mga sugyot nga gihimo diha sa magasin. Dayon iyang gipakita kanila ang magasin, gisultihan sila kon diin niya kuhaa ang materyal.

M. G. S., Brazil

Glaucoma

Ang artikulo (Mayo 8, 1988) maayog pagkasulat ug maayong pagkatuki. Akong ipakita kini sa among senemanang tigom sa mga doktor, ug pasidan-an ang among 31 ka empliyado aron ilang ipahibalo sa among mga pasyente kining ekselenting bahin sa artikulo.

D. D. S., MD, FACS, Director, Eye Center, Propesor sa Ophthalmology, Tinipong Bansa