Kon Nganong ang Teolohiya sa Kagawasan Dili Alang Kanako

MAO kana ang nakadani kanako sa teolohiya sa kagawasan—ang saad sa kausaban, sumala sa gipadayag sa ibabaw nga koro sa usa ka awit nga among ginaawit. Apan ang ako bang paglaom alang sa usa ka kausaban sa kalibotan maoy usa ka tinuod nga paglaom?

Sayo nga Pagmatuto Diha sa Katoliko

Gihimugso sa Katolikong mga ginikanan, ako gimatuto “sulod sa iglesya.” Miapil ako sa klab sa mga sakristan sa pagtabang sa pari sa panahon sa Misa. sa panuigong 17, napili akong presidente sa klab, ug kini nakapasuod kanako sa mga pari. Makalipay ang pagkadungog sa mga butang nga ilang ginahisgotan ug sa pagbasa sa ilang ginabasa. Ilabinang nakaikag kanako mao ang mga basahon sa teolohiya bahin sa kagawasan nga naghisgot sa katawhan nga sa ulahi luwason gikan sa pagdaogdaog.

Sa dugang nakong pagbasa ug pagpamati, dugang akong nakombinsir sa panginahanglan sa tawo sa pagtuon niining mga butanga ug sa pagkamatikod sa ilang mga katungod. Busa nalipay ako sa dihang naporma kadtong gitawag base community sa among parokya. Ang mga base community maoy mga grupo diin ang “pastoral nga pag-alagad” sa kabus duyogag edukasyon ug mga panawag alang sa politikal nga aksiyon. Sa Brazil lamang, dunay duolan sa 70,000 ka base communities.

Ang tumong ning maong mga komunidad mao ang pag-organisar ug may-kahibalong mga Katoliko diha sa mga sentro sa pagtudlo ug alang sa mga rali. Ako ang nagplano ug nagpaprintag mga paskin ug mga bandera sa protesta ug tigdala sa mga membro sa among grupo diha sa linain nga mga Misa sa ubang mga komunidad ug sa pagprotesta sa mga martsa.

Nagaobra Diha sa mga Base Community

Ang ubang mga tawo sa among sentro sa Belém nagpuyo sa ubos, lamakang dapit nga niini sila migamit ug mga tablang taytayan nga agianan paingon sa ilang mga balay. Ang siyudad nagplano sa pagbawi sa mga balay ug sa pagbalhin sa mga tawo sa ubang lokasyon, ulian sila sa gasto. Gisugo ako sa pagpaluya sa buut sa mga tawo sa pagdawat sa tanyag sa siyudad ug sa pagpahinumdom kanila nga ang atong pari miingon nga kon sila mobarog nga malig-on, ang siyudad mosurender ra ug mohimog kauswagan sa ilang propidad. Ingong resulta, ang uban midumili sa pagbalhin. Apan pagkamakasubo ang pagtan-aw sa mga bombero nga gipapahawa sila gikan sa ilang mga balay pinaagi sa mga hos sa tubig! Mibati nga gipakyas ko ang mga tawo sa among sentro, mibalhin ako sa laing komunidad.

Ang panag-away bahin sa yuta miulbo niining higayona, ug 13 ka iskuwater ug 2 ka paring Pranses gidakop. Ang mga iskuwater ug ang mga pari gidala sa Belém nga naghulat sa bista. Ang pagdakop kanila daw dili-makataronganon alang kanamo. Busa giuyonan nga ang tanang mga base community sa Belém moduyog sa malinawong protesta sa atubangan sa estasyon sa polis. Sa usa ka gabii bisan ang akong igsoong babaye ug apohan mirelyibo lakip sa uban. Ang among protesta nagpabilin sulod sa 24 oras, nga puli-puli, ug natapos lamang sa dihang gidala ang mga binilanggo sa Brasília alang sa husay.

Usa ka tibuok-gabiing demonstrasyon ang giplano sa bisperas sa husay. Apan, gikanselar kini sa dihang miabot ang mga sundalo. Ang demonstrasyon gibalhin sa laing lokasyon, sunod sa gamayng Simbahan sa Holy Trinity. Sa dihang miabot ang mga sundalong may dalang mga bombang tear-gas, kaming tanan mihugop sa simbahan.

Dunay mga 2,000 ang nagpunsisok sa sulod ug 1,200 ka sundalo ang anaa sa gawas. Sa tunga sa kagubot, ako nahibulong: ‘Kini ba mga katawhan sa Diyos? Malagmit, kay wala ba moingon si Jesus: “Kon ila akong gilutos, kamo ilang pagalutoson usab”?’—Juan 15:20.

Sa pagkagabii gigutom kaming tanan, sanglit wala man makakaon sa tibuok adlaw. Miabot ang obispo ug gipahilom ang mga tawo, nga nag-ingon: ‘Mga igsoon, maayong manggawas kita sa simbahan, kay wala may tubig o elektrisidad, ug ambot kon unsay ilang buhaton nato inigkagabii.’

Unya misulti ang iladong abogado: ‘Mga kauban, kita nagpuyo diha sa demokrasya, ug dili sila mohimog daotan kanato, busa magpabilin lang kita dinhi.’

Human sa dugayng panaglalis, ang mga lider sa grupo midesider nga kinahanglang manggawas kami. Malinawong gipagawas kami sa mga polis.

Panginahanglan sa Pagsulbad sa mga Pangutana

Samtang nagpadayon ang akong buluhaton diha sa sentro, midesider ako sa pagtudlo sa mga bata sa among grupo, ginamit ang librong Pagpatalinghog sa Dakong Magtutudlo nga gihatag sa akong apohang babaye kanako sa 1974. Ang libro naghisgot sa maayong pamatasan, pagsunod sa mga awtoridad, ug sa dili paggamit ug mga imahen. Apan unsaon nako sa pagtakdo niining pinasukad sa Bibliya nga mga pagtulon-an uban sa among ginahimo?

Kini ang mitultol sa akong paggawas gikan sa komunidad. Ako dunay daghang mga pangutana sa akong hunahuna nga nagkinahanglag tubag. Pananglit: Kon kadtong nagasuportar sa teolohiya sa kagawasan mao ang tinuod nga katawhan sa Diyos, nganong dili man sila mosunod sa hataas nga sukdanan sa moral ni Jesus? Lain pa, gigamit sa Diyos si Moises sa pagpagawas sa gidaogdaog nga mga Israelinhon sa Ehipto, busa nganong ang ubang mga politiko human nga makab-ot ang mga posisyon sa awtoridad makalimot man sa mga tawong dinaogdaog nga angay nilang hatagag kaluwasan?

Sa milabay ang unom ka bulan sa ulahi usa ka babaye mituktok sa akong pultahan ug misugod sa pagsulti mahitungod sa Gingharian sa Diyos. Usa siya ka misyonero sa mga Saksi ni Jehova. Human sa mubong pagsultihay, iya akong gitunolan ug librong Ang Imong Pagkabantan-on—Pagpahimulos sa Labing Maayo Niini. Sa ulahi gisugdan ang pagtuon sa Bibliya uban nako, ug ako gidapit sa pagtambong sa tigom diha sa Kingdom Hall. Mipauli ako sa balay human sa paghunahuna bahin sa kalainan niadtong tigoma ug sa tigom nga akong natambongan diha sa sentro. Diha sa Kingdom Hall walay nagtabako, nag-inom, o nagsultig malaw-ayng mga komedya.

Niining higayona mitambong akog seminar sa Katolikong Iglesya bahin sa “Pagtuo ug Politika.” Didto, ang pagtuo ug ang politika gisaysay nga duha ka kiliran sa usa ka sensilyo. Ang Kristohanong may pagtuo, ginaangkon, kinahanglang moapil sa politika ug dili kay mosunod lang dayon sa mga mando sa kagamhanan. Apan nakurat ako sa komento sa usa ka kauban. “Unya miabot si apostol Pablo ug giwala ang tanan,” siya miingon.

“Unsay imong ipasabot, Demetrius?” nangutana ako.

“Dili ka makasabot,” siya mitubag. “Kalimti kini.”

Apan gusto kong makasabot ug dili lang kana kalimtan, busa midesider ako sa pagpadayon nga mas seryoso sa akong pagtuon sa Bibliya uban sa mga Saksi ni Jehova ug misulay sa pagsusi.

Teolohiya sa Kagawasan ug ang Bibliya

Diha sa tigom sa Kingdom Hall, ang mamumulong naghisgot bahin sa Roma 13:1, 2, nga nag-ingon nga ang ‘tanang kalag kinahanglan magpasakop sa labaw nga kagamhanan, ug nga ang naglungtad nga labaw nga kagamhanan nagabarog diha sa ilang relatibong mga posisyon sa Diyos. Busa, ang mosukol sa awtoridad managpanukol batok sa kahikayan sa Diyos.’

Nagpalandong ako: ‘Mao kana ang gihisgotan ni Demetrius! Uban niadtong mga pulonga, giwala ni apostol Pablo ang tanang butang nga nagapasiugda sa teolohiya bahin sa kagawasan. Sayop alang sa mga Kristohanon ang pagsukol sa mga awtoridad sa kagamhanan.’

Nakat-onan nako nga ang Bibliya nagtanyag sa tinuod nga sulbad sa paglibre sa katawhan gikan sa pagdaogdaog—ang Gingharian sa Diyos diha sa mga kamot sa iyang Hari, si Kristo Jesus. Sanglit ang mga Saksi ni Jehova lamang ang nagawali niining kagamhanan sa Gingharian, mihukom ako sa pakig-uban kanila sa ilang buluhatong pagsangyaw. Wala magdugay gibawtismohan ako ug nahimong payunir, mga maoy pagtawag sa bug-os panahong mga ministro sa mga Saksi ni Jehova, ug sukad sa Agosto 1985, nag-alagad ako ingong espesyal payunir. Sa ulahi naminyo ako ug usa ka payunir, ug kaming duha karon nag-alagad sa bug-os panahong ministeryo.

Mapasalamaton kaayo ako kang Jehova nga Diyos nga nakakat-on sa ‘kamatuoran nga nagapahigawas’ ug sa pribilehiyo sa pagtabang sa uban aron malibre gikan sa bakak nga mga ideolohiya. (Juan 8:32) Lakip sa mga tawo nga akong natabangan mao ang duha ko ka higala nga nagtrabaho uban nako sa sentro sa Katoliko, ug sa akong igsoong babaye ug sa akong apohang babaye. Sama nako, sila nakakita karon kon nganong ang teolohiya bahin sa kagawasan dili tinuod nga sulbad sa mga suliran sa kabus.—Sumala sa giasoy ni Átila Monteiro Carneiro.

[Letrato sa panid 9]

Wala ako molampos sa akong paningkamot sa pagpauswag sa mga kahimtang sa pagkinabuhi sa mga tawong kabus sa Belém

[Letrato sa panid 10]

Akong asawa ug ako nga nagdala sa mensahe sa tinuod nga kagawasan ngadto sa kabus