Sa Dihang ang Tanang mga Anak Magmahimsog

USA ka krimen ang pag-abog ug tawo gikan sa iyang tolda ug putos nga katulgan diha sa gabii sa Arctico, nga paantuson siya sa katugnaw diha sa iyang nipis nga sapot sa ilalom. Sa susama, usa ka krimen ang ahat nga paghandos sa bata gikan sa iyang mainit, mapanalipdanong dapit sa tagoangkan bisan dili pa siya andam sa pag-atubang sa kalibotan sa gawas. Apan kinsa o unsa ang responsabli niining daotan kaayong krimen?

Siyempre walay tuyo ang mga ginikanan nga hatagag kalisod ang ilang gamayng anak. Sa pagkatinuod, ang inahan dili makapugong sa iyang pagbati sa dihang mosugod na kini, mahitabo man kini sa tukmang panahon sa bata o kulang pa sa bulan. Bisan ang mga eksperto sa medisina wala gayod makasabot sa tukma kon unsay mopasugod sa pagbati sa pagpanganak, kon kulang sa bulan o husto sa bulan. Hinunoa, ang nahibaloan mao nga may mga panahon nga mahitabo ang usa ka daotang butang, ug ipanganak ang bata sa kalibotan nga kulang sa sangkap nga mabuhi.

Gisaysay sa Bibliya kon nganong nahitabo kini. Ang dinasig nga salmista misulat: “Tan-awa! Ako natawo sa kasal-anan, ug sa sala gisamkon ako sa akong inahan.” (Salmo 51:5) Ang rebelyoso espirituhanong linalang ang naghulhog sa unang tawhanong magtiayon sa pag-alsa batok sa Diyos, ug busa nahimong mga makasasala. Sila misipyat sa pagsunod sa tukmang pagkamasugtanon sa ilang Maglalalang. Busa, ang tanan nilang mga anak gisamkon sa sala, o dili-kahingpitan. (Roma 5:12) Ang mga resulta mao ang sakit ug kamatayon, ug nagkalainlaing depekto sa lawas, lakip sa sistema sa pagsanay nga usahay mopagawas ug mahal kaayong anak nga ahat.

Usa ka Kalibotan nga Walay mga Batang Ahat

Kon nagpabilin pa ang mga tawo sa ilang kahingpitan, wala untay mga bata nga matawo nga wala sa ilang panahon aron sa pag-atubang sa mga katalagman nga ginaatubang sa daghan kaayong mga batang ahat karon. Ug moabot ra sa dili madugay ang panahon sa dihang ang inahan dili na manganak ug batang ahat. Ang dinasig nga propetang si Isaias misulat bahin nianang panahona, nga naghatag kanatog saad sa atong mahigugmaong Maglalalang: “Ako magahimo ug bag-ong mga langit ug usa ka bag-ong yuta, ug ang unang butang dili na pagahinumdoman, ni motungha pa sa hunahuna.”—Isaias 65:17, The Jerusalem Bible.

Ang tagna sa Bibliya ni Isaias mipadayon sa pag-asoy bahin sa makalilipayng mga kahimtang nga maglungtad diha sa bag-ong kalibotan sa Diyos, nga nagaingon: “Dili na pagahidunggan pa diha kaniya ang tingog sa pagbakho; diha kaniya, wala na unyay bata nga mabuhi sa pipila lamang ka adlaw . . . Sila dili magabuhat nga walay kapuslanan o manganak sila alang sa ilang kaugalingong kalaglagan, kay sila mao ang kaliwatan nga gipanalanginan ni Yahweh, ug ang ilang mga anak magauban kanila.”—Isaias 65:19-24, JB.

Pagkatahom unya sa dihang ang tanang tawhanong pag-antos ug kagul-anan mahimo nang panumdoman, sa dihang wala na unyay panginahanglan pag sobrang medikal nga mga paagi ug mga intensibong yunit sa pag-atiman aron lang sa pagpabuhi sa mga bata nga natawong kulang sa bulan! Sanglit ang tawhanong pagkadili-kahingpitan wagtangon na man unya pinaagi sa dakong tagana sa lukat sa atong dakong Diyos, wala na gayod unyay mga batang ipagawas sa tagoangkan una sa panahon nga kini hingpit nga masangkapan aron sa pagpahimulos sa kinabuhi sa bug-os.—Pinadayag 21: 3, 4.

[Kahon sa panid 11]

Imong Makab-ot ang Tinuod nga Paglipay

◆ Kon mamatay ang imong anak, dawata ang tabang ug pagdasig gikan sa mga higala ug mga paryenti. Tingali kadtong namatyan ug mga anak makatabang sa paglipay nimo.

◆ Tingali nagtuo ka sa paglaom sa pagkabanhaw, apan ayaw kakurat kon kana nga pagtuo dili mohatag kanimog dihadiha nga kahupayan. Samtang ang panahon mosugod sa pag-ayo niadtong mga samara, ikaw, sa walay duhaduha, modangat sa pagpabili sa paglaom sa pagkakita sa imong minahal pag-usab.—Isaias 25:8; 65:23; Juan 5:28, 29; 1 Corinto 15:25, 26.

◆ Sulay sa pagsalig kang Jehova, “ang Diyos sa tanang paglipay.” (2 Corinto 1:3) Siya mao ang Usa nga nagtaganag paagi sa “paglaglag sa usa nga may gahom sa kamatayon, sa ato pa, ang Yawa.”—Hebreohanon 2:14.

◆ Kon usa ikaw ka higala sa nagbangotang mga ginikanan, labing maayo ang dili pag-ingon nga sila makaanak pa ug lain. Nianang yugtoa, walay makapuli sa maong anak. Labing maayo niining kasoha ang “pagbangotan uban sa mga tawong nagbangotan.” (Roma 12:15) Ang imong pagdawat sa kamatayon ug sa pagbangotan uban sa ginikanan mohatag paglipay kanila, sama nga ang pag-ambit sa kaguol makakunhod niana.

◆ Maayo ug makatabang ang pagpahayag sa kaguol, busa hatagi ang imong kaugalingon ug panahon sa paghupay sa mga pagbati sa kaguol ug kapildihan. (Tan-awa ang “Pagmata!” sa Abril 22, 1985, “Kon ang Usa sa Imong Minahal Mamatay,” ug sa Agosto 8, 1987, “Pag-atubang sa Kamatayon sa Usa ka Anak.”)