Dugang Lugar nga Kapuy-an Alang sa Nagkadakong Pamilya
KINING magasina, Pagmata!, ug ang kauban niini, Ang Bantayanang Torre, maoy produksiyon sa pamilya. Kini gihimo nianang gitawag nga pamilyang Bethel, ang “Bethel” nagkahulogang “Balay sa Diyos.” Ang kapin sa 11 ka milyong kopya sa matag gula sa Awake! ug kapin sa 13,000,000 ka kopya sa The Watchtower gipatik diha sa gipadagan sa pamilya nga mga pabrika sa tibuok kalibotan. Sanglit diha sa dagkong mga pinulongan ang duha ka magasin mogula man duha ka besis sa usa ka bulan, kana maoy duolan sa 50 ka milyong kopya nga ginapatik sa usa ka bulan, o hapit 2 milyones matag adlaw sa pagtrabaho! Dugang pa, ang pamilyang Bethel nagagamag tinagpulo ka milyong mga Bibliya, mga libro, ug mga pulyeto matag tuig.
Ang pamilyang Bethel sa tibuok-kalibotan mitubo sa kapin sa 9,000 ka membro. Lakip kanila mao ang mga ulitawo ug dalaga, maingon man mga minyo. Ang internasyonal nga mga hedkuwarter sa mga Saksi ni Jehova, nga nahimutang sa Brooklyn Heights sa seksiyon sa Brooklyn, New York, mao ang labing dakong indibiduwal nga pamilya, nga may gidaghanong 2,800. Kana maoy pag-uswag gikan sa mga 600 ka membro sukad sa 1960. Busa sa milabay ang mga tuig, dugang ug dugang lugar nga kapuy-an ang gikinahanglan alang niining nagtubong pamilya sa Brooklyn. Ang labing dakong pasilidad, ang Towers Hotel niadto, gipalit sa 1975 ug giremodel aron makapapuyo ug mga 800 ka tawo. Apan dili pa dugay tulo ka dagkong mga pasilidad ang nadugang niining luna sa Bethel.
97 Columbia Heights Usa niini mao ang matahom bag-ong 11-ka-andanang tinukod nga nag-umbaw sa East River, nga nahimutangan sa luna sa Hotel Margaret niadto. Kini dunay walay nakasalipod nga talan-awon sa usa sa kanunayng ginakuhaan ug letrato sa tanang panahon, ang mga hatag-as kaayong mga tinukod sa Lower Manhattan ug sa iladong distrito niini sa negosyo. Labing hinungdanon, kini nahimutang sunod sa 107 ug 124 Columbia Heights, dagkong mga puy-anan nga nakapapuyog kapin sa usa ka libong membro sa pamilyang Bethel.
Usa ka gatos pa lamang ka tuig kanhi, ang 50 ka metrong Hotel Margaret natapos diha sa 97 Columbia Heights ug nainila sa tibuok-kalibotan. Sa Pebrero 1980, samtang nagkamulo pang gihimo ang Margaret nga usa ka maluhong mga apartment, naugdaw kini sa sunog ug sa ulahi giguba. Sa 1986, human nakadawat ang magtutukod sa kataposan ug permiso sa pagpadayon sa bag-ong konstruksiyon, iyang gibaligya ang propidad ngadto sa Watchtower Society, ang legal nga ahensiya sa mga Saksi ni Jehova. Samtang giandam ang sunodsunod nga mga andana sa tinukod aron kapuy-an sa 1988, ang total nga 250 ka membro sa pamilyang Bethel mibalhin.
Ang tigpamaba sa kampaniya nga nagdesinyo sa tinukod miingon nga gisulayang “buhion ang pila ka handumanan sa Margaret.” Ang paagi sa paggama sa mga bentana, pananglitan, makapadumdom sa tumbagang-pamanday diha sa Margaret. Ang tigpamaba midugang: “Among gipadak-an ang tinukod paingon sa tubig ug gipagamyan paingon sa komunidad.” Busa, ang tinukod natupong sa mga tinukod sa duol.
Standish Hotel Ang ikaduhang dakong nadugang sa luna sa Bethel mao kining 12-ka-andanang Standish Hotel, nga duol ra sa karsada, diha sa 169 Columbia Heights. Ang kasaysayan sa pagtukod ning maong hotel, ginganlan gikan kang Miles Standish sa sayong kabantog sa New England. Ang Brooklyn Daily Eagle miingon sa 1903: “Ang kompaniya nagtuo nga ang lugar nga napili niini, tungod sa iyang palibot ug sa dili-hitupngang talan-awon nga makita diha sa East River ug sa palibot nga mga talan-awong makapainteres, mao ang maayong lugar alang sa usa ka hotel ug nagplano kini sa pagtukod ug usa sa labing maayong pagkatrabaho ug labing sinangkapang mga balay sa nasod.”
Ang hotel gibuksan wala magdugay human niadto, apan sa katuigang 1970 kini gubaon na kaayo. Gipalit kini sa Cohi Towers Asscociates sa unang mga tuig sa 1980, ug gihimo ang bug-os nga pagbag-o nga ang tuyo mao ang paghatag dugang puy-anan alang sa pamilyang Bethel. Sa 1986 natapos ang pagbag-o, ug sa 1988 gipalit sa Watchtower Society and Standish. Kini nakapapuyog 140 ka membro sa pamilyang Bethel ug duolan sa 25 sa orihinal nga mangangabang nagpuyo gihapon didto.
Ang Bossert Hotel Ang ikatulong dakong nadugang sa luna sa Bethel mao ang 12-ka-andanang Bossert Hotel sa Montague Street, wala ray singko-minutos nga paglakaw gikan sa Standish. Unang gibuksan sa 1909 nga dunay 200 ka kuwarto, kini giila nga mao ang labing maayong hotel sa Brooklyn. Ang katibuk-ang estilo sa arkitektura maoy sa ika-15ng siglo Italyanong Renaisance.
Niadtong 1914 laing 175 ka kuwarto ang gidugang, ug sa milabay ang duha ka tuig nadugang ang restawran sa ibabaw sa atop nga kini kaamgid sa lugar nga kalakawlakawan sa pribadong barko. “Walay makatupong sa katahom sa talan-awon niini diha sa siyudad,” mitaho ang Brooklyn Daily Eagle sa 1949. “Ang iladong mga tawo sa publikong kinabuhi, sa teyatro ug sa kalibotan sa mga dula nangabot sa Marine Roof.” Gitagamtam sa mga tigpangaon, ug sa mga molupyo sa itaas nga andana, ang matahom nga talan-awon sa pantalan sa New York, sa Governor’s Island, sa Statue of Liberty, sa baybayon sa Jersey, ug sa ubos nga bahin sa Manhattan.
Sa ulahi, ang matahom niadto nga hotel nadaot tungod sa edad ug sa pagpasagad. Gipalit kini sa Cohi Towers Associates sa 1983, ug dakong proyekto sa pagbag-o gisugdan. Dayon gipalit sa Watchtower Society ang Bossert sa 1988. Kini karon gipuy-an ug duolan sa 270 ka membro sa pamilya, samtang 40 o kapin pa sa orihinal nga mga mangangabang nagpuyo gihapon didto.
Ang trabaho sa pagbag-o nagkinahanglag pag-ilis sa tanang mga pultahan ug mga bentana ug sa enterong sistema sa tubo, pagpainit, ug koryente. Usa ka bag-ong elibetor gitaod usab, ug sa pagkakaron duha o tulo sa orihinal nga mga elibetor giayo. Ang sayawanan gihimong tulo ka dagkong komedor, ug ang kosena sa silong gihinloan, giayo, ug gitaorag modernong mga kasangkapan. Ang mga lawak sa tibuok hotel giusab. Lain pa, gipasig-uli ang lawak-hulatanan aron mapabilin ang linain nga estilo niini, nga nag-apil sa pag-ayo sa nadaot nga mga haliging marmol pinaagi sa usa ka proseso nga sa katibuk-an nahimong nawalang arte.
Diha sa gawas, ang enterong tinukod gihinloan, ang masoneriya giayo, ug ang dakong bahin sa dayandayang obra-sa-bato gitukod pag-usab. Mitabang sa paghinlo, pag-ayo, ug trabaho sa pagpasig-uli mao ang ginatos ka buluntaryong mga trabahante gikan sa tibuok Tinipong Bansa. Ilang gidonar ang ilang panahon ug abilidad sa usa ka semana o kapin pa sa usa ka higayon. Ang trabahante sa 39 ka batan-ong mga babaye, mga Saksi, nga makita dinhi sa atop sa Bossert, nagtrabaho sa daghang bulan diha sa mga damba, nga nag-ayo sa masoneriya gawas sa hotel.
Tanan-tanan, ang pamilya sa Brooklyn Bethel karon nagpuyo diha sa mga 20 ka puy-anan diha sa Brooklyn Heights, ang tanan duol rang lakwon sa usa ug usa. Sa pagkamatuod, ang Towers, sa 124 Columbia Heights, 107 Columbia Heights, ug 119 Columbia Heights, nga nagpapuyog halos 2,000 sa pamilya, konektado sa mga tanel sa ilalom sa yuta. May mga plano alang sa tinukod sa 97 Columbia Heights nga ikonektar kanila pinaagi sa tanel sa dili madugay. Ang Bossert ug ang Standish Arms, hinunoa, layo kaayo gikan niining maong mga tinukod aron masumpay pinaagi sa tanel ilalom sa mga karsada.
Ang pagdako sa pamilyang Bethel nagpabanaag sa nagatubong pagsanong sa pagwali sa balita sa Gingharian sa mga Saksi ni Jehova. (Mateo 24:14) Ang 3,592,654 nga nakigbahin sa buluhaton sa miaging tuig maoy kapin sa duha ka pilo sa gidaghanon nga nakigbahin niini sa 1973. Ang mga membro sa pamilyang Bethel sa Brooklyn, New York, malipayon sa pribilehiyo sa pag-alagad sa espirituwal nga mga panginahanglan sa ilang mga igsoong lalaki ug babaye sa tibuok-kalibotan. Ug sila sa pagkamatuod mapasalamaton sa nagkadakong lugar nga kapuy-an nga gitagana alang kanila.
[Mga Letrato sa panid 24, 25]
Ang Standish Hotel ug ang lawak-hulatanan niini
Sa pikas panid: ang Bossert Hotel ug ang lawak-hulatanan niini
[Mga Letrato sa panid 26]
Buluntaryong mga trabahante nga nag-ayo sa gawas nga masoneriya sa Bossert Hotel