Kapeligrohan sa Panglawas Bisan Diha sa Lugar nga “Gidili ang Pagpanabako”

ANG The Journal of the American Medical Association (JAMA), Pebrero 10, 1989, mitaho: “Ang National Academy of Sciences nagrepaso sa impormasyon bahin sa dili-kinabubut-ong pagsigarilyo . . . , gihisgotan ilabina ang palibot sa mga biyahe sa ayroplano.” Ang rekomendasyon: “Idili ang pagpanabako diha sa tanang komersiyal nga mga biyahe sulod sa nasod alang sa upat ka dakong mga katarongan: aron mamenosan ang kasuko, mamenosan ang pagkadaot sa panglawas, mamenosan ang kapeligrohan sa sunog, ug aron ang kalidad sa hangin sa cabin makaabot sa mga sukdanan alang sa ubang siradong mga palibot.”

Ang masusihong pagtuon sa akademiya nagpadayag: “Ang pagkaladlad sa nikotina nga gisukod sa panahon sa mga biyahe ginamit ang personal nga exposure monitors nakita nga nagabag-obag-o, diin ang ubang mga dapit nga gidili ang pagpanabako dunay sukod nga sama sa dapit nga gitugot ang pagpanabako. Ang mga atendant nga giasayn sa pagtrabaho sa lugar nga gidili ang pagpanabako dili-maampingan gikan sa pagkaladlad sa aso.”

Ang pagtuon nagpakita nga “ang sukod sa nikotena diha sa hangin nagabag-o, ang ubang mga lugar nga gidili ang pagtabako dunay mas dakong sukod kay sa niadtong ubang mga lugar nga gitugotan ang pagpanabako” ug nagpahinumdom sa mga magbabasa nga “ang dili maayong mga epekto sa panglawas diha sa dili-tigtabako nga dili-direkta, o dili-kinabubut-on, nga pagtabako nag-apil sa kanser sa baga ug sakit sa respiratoryo.”

Kining mao gihapong isyu sa JAMA nga nagtaho mahitungod sa pagtuon nga nagtino nga dunay makagiyan nga gahom ang nikotena, nag-ingon: “Ang mga tawo nga nagpatambal tungod sa pagdepende sa droga kalagmitan nga moklasipikar sa gana sa tabako ug sa kalisod sa paghunong sa pagtabako sama ra o taas pa kay sa ilang pangunang suliran sa substansiya [alkohol, cocaine, heroina].

Gidili sa Canada ang pagpanabako sa mga biyahe sa ayroplano nga moabot ug duha ka oras o ubos pa sa miaging 1987. Ang duha ka dagkong kompaniya sa ayroplano sa Canada mihimo pa gayod ug laing lakang, gidili ang pagpanabako diha sa tanan nilang mga biyahe sa Amihanang Amerika. Didto sa Tinipong Bansa, gidili sa pederal nga balaod ang pagpanabako diha sa mugbong mga biyahe, ug “ang usa ka kompaniya sa ayroplano sa T.B. kinabubut-ong nagdili sa pagpanabako sa mga biyahe sa sulod sa Tinipong Bansa, gawas sa mga biyahe ngadto-nganhi sa Hawaii.” Samtang nagkadaghang kompaniya sa ayroplano ang misagop sa samang mga polisa sa pagdili sa pagtabako sila nakatabang sa pagkunhod sa mga riyesgo sa paglupad.